সূক্ত 122

122.1

৮ চিত্রমহা বাসিষ্ঠঃ । অগ্নিঃ। জগতীঃ ১,৫ ত্রিষ্টুপ্।

বসুং ন চিত্রমহসং গৃণীষে বামং শেবমতিথিমদ্বিষেণ্যম্ ।
স রাসতে শুরুধো বিশ্বধায়সোঽগ্নির্হোতা গৃহপতিঃ সুবীর্যম্ ॥১॥

জুষাণো অগ্নে প্রতি হর্য মে বচো বিশ্বানি বিদ্বান্বয়ুনানি সুক্রতো ।
ঘৃতনির্ণিগ্ব্রহ্মণে গাতুমেরয় তব দেবা অজনয়ন্ননু ব্রতম্ ॥২॥

সপ্ত ধামানি পরিয়ন্নমর্ত্যো দাশদ্দাশুষে সুকৃতে মামহস্ব ।
সুবীরেণ রয়িণাগ্নে স্বাভুবা যস্ত আনট্ সমিধা তং জুষস্ব ॥৩॥

যজ্ঞস্য কেতুং প্রথমং পুরোহিতং হবিষ্মন্ত ঈলতে সপ্ত বাজিনম্ ।
শৃণ্বন্তমগ্নিং ঘৃতপৃষ্ঠমুক্ষণং পৃণন্তং দেবং পৃণতে সুবীর্যম্ ॥৪॥

ত্বং দূতঃ প্রথমো বরেণ্যঃ স হূয়মানো অমৃতায় মত্স্ব ।
ত্বাং মর্জয়ন্মরুতো দাশুষো গৃহে ত্বাং স্তোমেভির্ভৃগবো বি রুরুচুঃ ॥৫॥

ইষং দুহন্ত্সুদুঘাং বিশ্বধায়সং যজ্ঞপ্রিয়ে যজমানায় সুক্রতো ।
অগ্নে ঘৃতস্নুস্ত্রিৠতানি দীদ্যদ্বর্তির্যজ্ঞং পরিয়ন্ত্সুক্রতূয়সে ॥৬॥

ত্বামিদস্যা উষসো ব্যুষ্টিষু দূতং কৃণ্বানা অয়জন্ত মানুষাঃ ।
ত্বাং দেবা মহয়ায্যায় বাবৃধুরাজ্যমগ্নে নিমৃজন্তো অধ্বরে ॥৭॥

নি ত্বা বসিষ্ঠা অহ্বন্ত বাজিনং গৃণন্তো অগ্নে বিদথেষু বেধসঃ ।
রায়স্পোষং যজমানেষু ধারয় যূয়ং পাত স্বস্তিভিঃ সদা নঃ ॥৮॥