সূক্ত 111

111.1

১০ বৈরূপোঽষ্টাদংষ্ট্রঃ। ইন্দ্রঃ। ত্রিষ্টুপ্।

মনীষিণঃ প্র ভরধ্বং মনীষাং যথায়থা মতয়ঃ সন্তি নৃণাম্ ।
ইন্দ্রং সত্যৈরেরয়ামা কৃতেভিঃ স হি বীরো গির্বণস্যুর্বিদানঃ ॥১॥

111.2

ঋতস্য হি সদসো ধীতিরদ্যৌত্সং গার্ষ্টেয়ো বৃষভো গোভিরানট্ ।
উদতিষ্ঠত্তবিষেণা রবেণ মহান্তি চিত্সং বিব্যাচা রজাংসি ॥২॥

111.3

ইন্দ্রঃ কিল শ্রুত্যা অস্য বেদ স হি জিষ্ণুঃ পথিকৃত্সূর্যায় ।
আন্মেনাং কৃণ্বন্নচ্যুতো ভুবদ্গোঃ পতির্দিবঃ সনজা অপ্রতীতঃ ॥৩॥

111.4

ইন্দ্রো মহ্না মহতো অর্ণবস্য ব্রতামিনাদঙ্গিরোভির্গৃণানঃ ।
পুরূণি চিন্নি ততানা রজাংসি দাধার যো ধরুণং সত্যতাতা ॥৪॥

111.5

ইন্দ্রো দিবঃ প্রতিমানং পৃথিব্যা বিশ্বা বেদ সবনা হন্তি শুষ্ণম্ ।
মহীং চিদ্দ্যামাতনোত্সূর্যেণ চাস্কম্ভ চিত্কম্ভনেন স্কভীয়ান্ ॥৫॥

111.6

বজ্রেণ হি বৃত্রহা বৃত্রমস্তরদেবস্য শূশুবানস্য মায়াঃ ।
বি ধৃষ্ণো অত্র ধৃষতা জঘন্থাঽথাভবো মঘবন্বাহ্বোজাঃ ॥৬॥

111.7

সচন্ত যদুষসঃ সূর্যেণ চিত্রামস্য কেতবো রামবিন্দন্ ।
আ যন্নক্ষত্রং দদৃশে দিবো ন পুনর্যতো নকিরদ্ধা নু বেদ ॥৭॥

111.8

দূরং কিল প্রথমা জগ্মুরাসামিন্দ্রস্য যাঃ প্রসবে সস্রুরাপঃ ।
ক্ব স্বিদগ্রং ক্ব বুধ্ন আসামাপো মধ্যং ক্ব বো নূনমন্তঃ ॥৮॥

111.9

সৃজঃ সিন্ধূঁরহিনা জগ্রসানাঁ আদিদেতাঃ প্র বিবিজ্রে জবেন ।
মুমুক্ষমাণা উত যা মুমুচ্রেঽধেদেতা ন রমন্তে নিতিক্তাঃ ॥৯॥

111.10

সধ্রীচীঃ সিন্ধুমুশতীরিবায়ন্ত্সনাজ্জার আরিতঃ পূর্ভিদাসাম্ ।
অস্তমা তে পার্থিবা বসূন্যস্মে জগ্মুঃ সূনৃতা ইন্দ্র পূর্বীঃ ॥১০॥