সূক্ত 101

101.1

১২ বুধঃ সৌম্যঃ। বিশ্বে দেবা, ঋত্বিজো বা । ত্রিষ্টুপ্ ৪, ৬ গায়ত্রী, ৫ বৃহতী, ৯,১২ জগতী।

উদ্বুধ্যধ্বং সমনসঃ সখায়ঃ সমগ্নিমিন্ধ্বং বহবঃ সনীলাঃ ।
দধিক্রামগ্নিমুষসং চ দেবীমিন্দ্রাবতোঽবসে নি হ্বয়ে বঃ ॥১॥

মন্দ্রা কৃণুধ্বং ধিয় আ তনুধ্বং নাবমরিত্রপরণীং কৃণুধ্বম্ ।
ইষ্কৃণুধ্বমায়ুধারং কৃণুধ্বং প্রাঞ্চং যজ্ঞং প্র ণয়তা সখায়ঃ ॥২॥

যুনক্ত সীরা বি যুগা তনুধ্বং কৃতে যোনৌ বপতেহ বীজম্ ।
গিরা চ শ্রুষ্টিঃ সভরা অসন্নো নেদীয় ইত্সৃণ্যঃ পক্বমেয়াৎ ॥৩॥

সীরা যুঞ্জন্তি কবয়ো যুগা বি তন্বতে পৃথক্ । ধীরা দেবেষু সুম্নয়া ॥৪॥

নিরাহাবান্কৃণোতন সং বরত্রা দধাতন । সিঞ্চামহা অবতমুদ্রিণং বয়ং সুষেকমনুপক্ষিতম্ ॥৫॥

ইষ্কৃতাহাবমবতং সুবরত্রং সুষেচনম্ । উদ্রিণং সিঞ্চে অক্ষিতম্ ॥৬॥

প্রীণীতাশ্বান্হিতং জয়াথ স্বস্তিবাহং রথমিত্কৃণুধ্বম্ ।
দ্রোণাহাবমবতমশ্মচক্রমংসত্রকোশং সিঞ্চতা নৃপাণম্ ॥৭॥

ব্রজং কৃণুধ্বং স হি বো নৃপাণো বর্ম সীব্যধ্বং বহুলা পৃথূনি ।
পুরঃ কৃণুধ্বমায়সীরধৃষ্টা মা বঃ সুস্রোচ্চমসো দৃংহতা তম্ ॥৮॥

আ বো ধিয়ং যজ্ঞিয়াং বর্ত ঊতয়ে দেবা দেবীং যজতাং যজ্ঞিয়ামিহ ।
সা নো দুহীয়দ্যবসেব গত্বী সহস্রধারা পয়সা মহী গৌঃ ॥৯॥

আ তূ ষিঞ্চ হরিমীং দ্রোরুপস্থে বাশীভিস্তক্ষতাশ্মন্ময়ীভিঃ ।
পরি ষ্বজধ্বং দশ কক্ষ্যাভিরুভে ধুরৌ প্রতি বহ্নিং যুনক্ত ॥১০॥

উভে ধুরৌ বহ্নিরাপিব্দমানোঽন্তর্যোনেব চরতি দ্বিজানিঃ ।
বনস্পতিং বন আস্থাপয়ধ্বং নি ষূ দধিধ্বমখনন্ত উত্সম্ ॥১১॥

কপৃন্নরঃ কপৃথমুদ্দধাতন চোদয়ত খুদত বাজসাতয়ে ।
নিষ্টিগ্র্যঃ পুত্রমা চ্যাবয়োতয় ইন্দ্রং সবাধ ইহ সোমপীতয়ে ॥১২॥