সূক্ত 162

162.1

২২ দীর্ঘতমা ঔচথ্যঃ। অশ্বঃ। ত্রিষ্টুপ্, ৩-৬ জগতী।

মা নো মিত্রো বরুণো অর্যমায়ুরিন্দ্র ঋভুক্ষা মরুতঃ পরি খ্যন্ ।
যদ্ বাজিনো দেবজাতস্য সপ্তেঃ প্রবক্ষ্যামো বিদথে বীর্যাণি ॥১॥

যন্নির্ণিজা রেক্ণসা প্রাবৃতস্য রাতিং গৃভীতাং মুখতো নয়ন্তি ।
সুপ্রাঙজো মেম্যদ্ বিশ্বরূপ ইন্দ্রাপূষ্ণোঃ প্রিয়মপ্যেতি পাথঃ ॥২॥

এষ চ্ছাগঃ পুরো অশ্বেন বাজিনা পূষ্ণো ভাগো নীয়তে বিশ্বদেব্যঃ ।
অভিপ্রিয়ং যত্পুরোলাশমর্বতা ত্বষ্টেদেনং সৌশ্রবসায় জিন্বতি ॥৩॥

যদ্ধবিষ্যমৃতুশো দেবয়ানং ত্রির্মানুষাঃ পর্যশ্বং নয়ন্তি ।
অত্রা পূষ্ণঃ প্রথমো ভাগ এতি যজ্ঞং দেবেভ্যঃ প্রতিবেদয়ন্নজঃ ॥৪॥

হোতাধ্বর্যুরাবয়া অগ্নিমিন্ধো গ্রাবগ্রাভ উত শংস্তা সুবিপ্রঃ ।
তেন যজ্ঞেন স্বরংকৃতেন স্বিষ্টেন বক্ষণা আ পৃণধ্বম্ ॥৫॥

যূপব্রস্কা উত যে যূপবাহাশ্চষালং যে অশ্বয়ূপায় তক্ষতি ।
যে চার্বতে পচনং সম্ভরন্ত্যুতো তেষামভিগূর্তির্ন ইন্বতু ॥৬॥

উপ প্রাগাৎ সুমন্মেঽধায়ি মন্ম দেবানামাশা উপ বীতপৃষ্ঠঃ ।
অন্বেনং বিপ্রা ঋষয়ো মদন্তি দেবানাং পুষ্টে চকৃমা সুবন্ধুম্ ॥৭॥

যদ্ বাজিনো দাম সংদানমর্বতো যা শীর্ষণ্যা রশনা রজ্জুরস্য ।
যদ্ বা ঘাস্য প্রভৃতমাস্যে ৩ তৃণং সর্বা তা তে অপি দেবেষ্বস্তু ॥৮॥

যদশ্বস্য ক্রবিষো মক্ষিকাশ যদ্ বা স্বরৌ স্বধিতৌ রিপ্তমস্তি ।
যদ্ধস্তয়োঃ শমিতুর্যন্নখেষু সর্বা তা তে অপি দেবেষ্বস্তু ॥৯॥

যদূবধ্যমুদরস্যাপবাতি য আমস্য ক্রবিষো গন্ধো অস্তি ।
সুকৃতা তচ্ছমিতারঃ কৃণ্বন্তূত মেধং শৃতপাকং পচন্তু ॥১০॥

যৎ তে গাত্রাদগ্নিনা পচ্যমানাদভি শূলং নিহতস্যাবধাবতি ।
মা তদ্ ভূম্যামা শ্রিষন্মা তৃণেষু দেবেভ্যস্তদুশদ্ভ্যো রাতমস্তু ॥১১॥

যে বাজিনং পরিপশ্যন্তি পক্বং য ঈমাহুঃ সুরভির্নির্হরেতি ।
যে চার্বতো মাংসভিক্ষামুপাসত উতো তেষামভিগূর্তির্ন ইন্বতু ॥১২॥

যন্নীক্ষণং মাংস্পচন্যা উখায়া যা পাত্রাণি যূষ্ণ আসেচনানি ।
ঊষ্মণ্যাপিধানা চরূণামঙ্কাঃ সূনাঃ পরি ভূষন্ত্যশ্বম্ ॥১৩॥

নিক্রমণং নিষদনং বিবর্তনং যচ্চ পড্বীশমর্বতঃ ।
যচ্চ পপৌ যচ্চ ঘাসিং জঘাস সর্বা তা তে অপি দেবেষ্বস্তু ॥১৪॥

মা ত্বাগ্নির্ধ্বনয়ীদ্ধূমগন্ধির্মোখা ভ্রাজন্ত্যভি বিক্ত জঘ্রিঃ ।
ইষ্টং বীতমভিগূর্তং বষট্কৃতং তং দেবাসঃ প্রতি গৃভ্ণন্ত্যশ্বম্ ॥১৫॥

যদশ্বায় বাস উপস্তৃণন্ত্যধীবাসং যা হিরণ্যান্যস্মৈ ।
সংদানমর্বন্তং পড্বীশং প্রিয়া দেবেষ্বা যাময়ন্তি ॥১৬॥

যৎ তে সাদে মহসা শূকৃতস্য পার্ষ্ণ্যা বা কশয়া বা তুতোদ ।
স্রুচেব তা হবিষো অধ্বরেষু সর্বা তা তে ব্রহ্মণা সূদয়ামি ॥১৭॥

চতুস্ত্রিংশদ্ বাজিনো দেববন্ধোর্বঙ্ক্রীরশ্বস্য স্বধিতিঃ সমেতি ।
অচ্ছিদ্রা গাত্রা বয়ুনা কৃণোত পরুষ্পরুরনুঘুষ্যা বি শস্ত ॥১৮॥

একস্ত্বষ্টুরশ্বস্যা বিশস্তা দ্বা যন্তারা ভবতস্তথ ঋতুঃ ।
যা তে গাত্রাণামৃতুথা কৃণোমি তাতা পিণ্ডানাং প্র জুহোম্যগ্নৌ ॥১৯॥

মা ত্বা তপৎ প্রিয় আত্মাপিয়ন্তং মা স্বধিতিস্তন্ব ১ আ তিষ্ঠিপত্তে ।
মা তে গৃধ্নুরবিশস্তাতিহায় ছিদ্রা গাত্রাণ্যসিনা মিথূ কঃ ॥২০॥

ন বা উ এতন্ম্রিয়সে ন রিষ্যসি দেবাঁ ইদেষি পথিভিঃ সুগেভিঃ ।
হরী তে যুঞ্জা পৃষতী অভূতামুপাস্থাদ্ বাজী ধুরি রাসভস্য ॥২১॥

সুগব্যং নো বাজী স্বশ্ব্যং পুংসঃ পুত্রাঁ উত বিশ্বাপুষং রয়িম্ ।
অনাগাস্ত্বং নো অদিতিঃ কৃণোতু ক্ষত্রং নো অশ্বো বনতাং হবিষ্মান্ ॥২২॥