সূক্ত 113

113.1

২০ কুত্স আঙ্গিরসঃ। ১উষাঃ (উত্তরার্ধস্য) রাত্রিশ্চ, ২-২০ উষাঃ। ত্রিষ্টুপ্।

ইদং শ্রেষ্ঠং জ্যোতিষাং জ্যোতিরাগাচ্চিত্রঃ প্রকেতো অজনিষ্ট বিভ্বা ।
যথা প্রসূতা সবিতুঃ সবায়ঁ এবা রাত্র্যুষসে যোনিমারৈক্ ॥১॥

রুশদ্বত্সা রুশতী শ্বেত্যাগাদারৈগু কৃষ্ণা সদনান্যস্যাঃ ।
সমানবন্ধূ অমৃতে অনূচী দ্যাবা বর্ণং চরত আমিনানে ॥২॥

সমানো অধ্বা স্বস্রোরনন্তস্তমন্যান্যা চরতো দেবশিষ্টে ।
ন মেথেতে ন তস্থতুঃ সুমেকে নক্তোষাসা সমনসা বিরূপে ॥৩॥

ভাস্বতী নেত্রী সূনৃতানামচেতি চিত্রা বি দুরো ন আবঃ ।
প্রার্প্যা জগদ্ব্যু নো রায়ো অখ্যদুষা অজীগর্ভুবনানি বিশ্বা ॥৪॥

জিহ্মশ্যে ৩ চরিতবে মঘোন্যাভোগয় ইষ্টয়ে রায় উ ত্বম্ ।
দভ্রং পশ্যদ্ভ্য উর্বিয়া বিচক্ষ উষা অজীগর্ভুবনানি বিশ্বা ॥৫॥

ক্ষত্রায় ত্বং শ্রবসে ত্বং মহীয়া ইষ্টয়ে ত্বমর্থমিব ত্বমিত্যৈ ।
বিসদৃশা জীবিতাভিপ্রচক্ষ উষা অজীগর্ভুবনানি বিশ্বা ॥৬॥

এষা দিবো দুহিতা প্রত্যদর্শি ব্যুচ্ছন্তী যুবতিঃ শুক্রবাসাঃ ।
বিশ্বস্যেশানা পার্থিবস্য বস্ব উষো অদ্যেহ সুভগে ব্যুচ্ছ ॥৭॥

পরায়তীনামন্বেতি পাথ আয়তীনাং প্রথমা শশ্বতীনাম্ ।
ব্যুচ্ছন্তী জীবমুদীরয়ন্ত্যুষা মৃতং কং চন বোধয়ন্তী ॥৮॥

উষো যদগ্নিং সমিধে চকর্থ বি যদাবশ্চক্ষসা সূর্যস্য ।
যন্মানুষান্ যক্ষ্যমাণাঁ অজীগস্তদ্ দেবেষু চকৃষে ভদ্রমপ্নঃ ॥৯॥

কিয়াত্যা যৎ সময়া ভবাতি যা ব্যূষুর্যাশ্চ নূনং ব্যুচ্ছান্ ।
অনু পূর্বাঃ কৃপতে বাবশানা প্রদীধ্যানা জোষমন্যাভিরেতি ॥১০॥

ঈয়ুষ্টে যে পূর্বতরামপশ্যন্ ব্যুচ্ছন্তীমুষসং মর্ত্যাসঃ ।
অস্মাভিরূ নু প্রতিচক্ষ্যাভূদো তে যন্তি যে অপরীষু পশ্যান্ ॥১১॥

যাবয়দ্ দ্বেষা ঋতপা ঋতেজাঃ সুম্নাবরী সূনৃতা ঈরয়ন্তী ।
সুমঙ্গলীর্বিভ্রতী দেববীতিমিহাদ্যোষঃ শ্রেষ্ঠতমা ব্যুচ্ছ ॥১২॥

শশ্বৎ পুরোষা ব্যুবাস দেব্যথো অদ্যেদং ব্যাবো মঘোনী ।
অথো ব্যুচ্ছাদুত্তরাঁ অনু দ্যূনজরামৃতা চরতি স্বধাভিঃ ॥১৩॥

ব্য ১ ঞ্জিভির্দিব আতাস্বদ্যৌদপ কৃষ্ণাং নির্ণিজং দেব্যাবঃ ।
প্রবোধয়ন্ত্যরুণেভিরশ্বৈরোষা যাতি সুয়ুজা রথেন ॥১৪॥

আবহন্তী পোষ্যা বার্যাণি চিত্রং কেতুং কৃণুতে চেকিতানা ।
ঈয়ুষীণামুপমা শশ্বতীনাং বিভাতীনাং প্রথমোষা ব্যশ্বৈৎ ॥১৫॥

উদীর্ধ্বং জীবো অসুর্ন আগাদপ প্রাগাৎ তম আ জ্যোতিরেতি ।
আরৈক্ পন্থাং যাতবে সূর্যায়াগন্ম যত্র প্রতিরন্ত আয়ুঃ ॥১৬॥

স্যূমনা বাচ উদিয়র্তি বহ্নিঃ স্তবানো রেভ উষসো বিভাতীঃ ।
অদ্যা তদুচ্ছ গৃণতে মঘোন্যস্মে আয়ুর্নি দিদীহি প্রজাবৎ ॥১৭॥

যা গোমতীরুষসঃ সর্ববীরা ব্যুচ্ছন্তি দাশুষে মর্ত্যায় ।
বায়োরিব সূনৃতানামুদর্কে তা অশ্বদা অশ্নবৎ সোমসুত্বা ॥১৮॥

মাতা দেবানামদিতেরনীকং যজ্ঞস্য কেতুর্বৃহতী বি ভাহি ।
প্রশস্তিকৃদ্ব্র ব্রহ্মণে নো ব্যু ১ চ্ছা নো জনে জনয় বিশ্ববারে ॥১৯॥

যচ্চিত্রমপ্ন উষসো বহন্তীজানায় শশমানায় ভদ্রম্ ।
তন্নো মিত্রো বরুণো মামহন্তামদিতিঃ সিন্ধুঃ পৃথিবী উত দ্যৌঃ ॥২০॥