অধ্যায় 1

1.1

বৈশংপায়ন উবাচ
ততোঽব্রবীন্ময়ঃ পার্থং বাসুদেবস্য সংনিধৌ
প্রাঞ্জলিঃ শ্লক্ষ্ণয়া বাচা পূজয়িত্বা পুনঃ পুনঃ

অস্মাচ্চ কৃষ্ণাত্সংক্রুদ্ধাত্পাবকাচ্চ দিধক্ষতঃ
ত্বয়া ত্রাতোঽস্মি কৌন্তেয় ব্রূহি কিং করবাণি তে

অর্জুন উবাচ
কৃতমেব ত্বয়া সর্বং স্বস্তি গচ্ছ মহাসুর
প্রীতিমান্ভব মে নিত্যং প্রীতিমন্তো বয়ং চ তে

ময় উবাচ
যুক্তমেতত্ত্বয়ি বিভো যথাত্থ পুরুষর্ষভ
প্রীতিপূর্বমহং কিংচিত্কর্তুমিচ্ছামি ভারত

অহং হি বিশ্বকর্মা বৈ দানবানাং মহাকবিঃ
সোঽহং বৈ ত্বত্কৃতে কিংচিত্কর্তুমিচ্ছামি পাণ্ডব

অর্জুন উবাচ
প্রাণকৃচ্ছ্রাদ্বিমুক্তং ত্বমাত্মানং মন্যসে ময়া
এবং গতে ন শক্ষ্যামি কিংচিত্কারয়িতুং ত্বয়া

ন চাপি তব সংকল্পং মোঘমিচ্ছামি দানব
কৃষ্ণস্য ক্রিয়তাং কিংচিত্তথা প্রতিকৃতং ময়ি

বৈশংপায়ন উবাচ
চোদিতো বাসুদেবস্তু ময়েন ভরতর্ষভ
মুহূর্তমিব সংদধ্যৌ কিময়ং চোদ্যতামিতি

চোদয়ামাস তং কৃষ্ণঃ সভা বৈ ক্রিয়তামিতি
ধর্মরাজস্য দৈতেয় যাদৃশীমিহ মন্যসে

যাং কৃতাং নানুকুর্যুস্তে মানবাঃ প্রেক্ষ্য বিস্মিতাঃ
মনুষ্যলোকে কৃত্স্নেঽস্মিংস্তাদৃশীং কুরু বৈ সভাম্

যত্র দিব্যানভিপ্রায়ান্পশ্যেম বিহিতাংস্ত্বয়া
আসুরান্মানুষাংশ্চৈব তাং সভাং কুরু বৈ ময়

প্রতিগৃহ্য তু তদ্বাক্যং সংপ্রহৃষ্টো ময়স্তদা
বিমানপ্রতিমাং চক্রে পাণ্ডবস্য সভাং মুদা

ততঃ কৃষ্ণশ্চ পার্থশ্চ ধর্মরাজে যুধিষ্ঠিরে
সর্বমেতদ্যথাবেদ্য দর্শয়ামাসতুর্ময়ম্

তস্মৈ যুধিষ্ঠিরঃ পূজাং যথার্হমকরোত্তদা
স তু তাং প্রতিজগ্রাহ ময়ঃ সত্কৃত্য সত্কৃতঃ

স পূর্বদেবচরিতং তত্র তত্র বিশাং পতে
কথয়ামাস দৈতেয়ঃ পাণ্ডুপুত্রেষু ভারত

স কালং কংচিদাশ্বস্য বিশ্বকর্মা প্রচিন্ত্য চ
সভাং প্রচক্রমে কর্তুং পাণ্ডবানাং মহাত্মনাম্

অভিপ্রায়েণ পার্থানাং কৃষ্ণস্য চ মহাত্মনঃ
পুণ্যেঽহনি মহাতেজাঃ কৃতকৌতুকমঙ্গলঃ

তর্পয়িত্বা দ্বিজশ্রেষ্ঠান্পায়সেন সহস্রশঃ
ধনং বহুবিধং দত্ত্বা তেভ্য এব চ বীর্যবান্

সর্বর্তুগুণসংপন্নাং দিব্যরূপাং মনোরমাম্
দশকিষ্কুসহস্রাং তাং মাপয়ামাস সর্বতঃ