UtshovChapter 1
1.1
वैशंपायन उवाच
ततोऽब्रवीन्मयः पार्थं वासुदेवस्य संनिधौ
प्राञ्जलिः श्लक्ष्णया वाचा पूजयित्वा पुनः पुनः
Vaishampayana uvacha
Tatobravinmayah partham vasudevasya sannidhau
Pranjalih shlakshnaya vacha pujayitva punah punah
1.2
अस्माच्च कृष्णात्संक्रुद्धात्पावकाच्च दिधक्षतः
त्वया त्रातोऽस्मि कौन्तेय ब्रूहि किं करवाणि ते
Asmachcha krishnatsankruddhatpavakachcha didhakshatah
Tvaya tratosmi kaunteya bruhi kim karavani te
1.3
अर्जुन उवाच
कृतमेव त्वया सर्वं स्वस्ति गच्छ महासुर
प्रीतिमान्भव मे नित्यं प्रीतिमन्तो वयं च ते
Arjuna uvacha
Kritameva tvaya sarvam svasti gachchha mahasura
Pritimanbhava me nityam pritimanto vayam cha te
1.4
मय उवाच
युक्तमेतत्त्वयि विभो यथात्थ पुरुषर्षभ
प्रीतिपूर्वमहं किंचित्कर्तुमिच्छामि भारत
Maya uvacha
Yuktametattvayi vibho yathattha purusharshabha
Pritipurvamaham kinchitkartumichchhami bharata
1.5
अहं हि विश्वकर्मा वै दानवानां महाकविः
सोऽहं वै त्वत्कृते किंचित्कर्तुमिच्छामि पाण्डव
Aham hi vishvakarma vai danavanam mahakavih
Soham vai tvatkrite kinchitkartumichchhami pandava
1.6
अर्जुन उवाच
प्राणकृच्छ्राद्विमुक्तं त्वमात्मानं मन्यसे मया
एवं गते न शक्ष्यामि किंचित्कारयितुं त्वया
Arjuna uvacha
Pranakrichchhradvimuktam tvamatmanam manyase maya
Evam gate na shakshyami kinchitkarayitum tvaya
1.7
न चापि तव संकल्पं मोघमिच्छामि दानव
कृष्णस्य क्रियतां किंचित्तथा प्रतिकृतं मयि
Na chapi tava sankalpam moghamichchhami danava
Krishnasya kriyatam kinchittatha pratikritam mayi
1.8
वैशंपायन उवाच
चोदितो वासुदेवस्तु मयेन भरतर्षभ
मुहूर्तमिव संदध्यौ किमयं चोद्यतामिति
Vaishampayana uvacha
Chodito vasudevastu mayena bharatarshabha
Muhurtamiva sandadhyau kimayam chodyatamiti
1.9
चोदयामास तं कृष्णः सभा वै क्रियतामिति
धर्मराजस्य दैतेय यादृशीमिह मन्यसे
Chodayamasa tam krishnah sabha vai kriyatamiti
Dharmarajasya daiteya yadrishimiha manyase
1.10
यां कृतां नानुकुर्युस्ते मानवाः प्रेक्ष्य विस्मिताः
मनुष्यलोके कृत्स्नेऽस्मिंस्तादृशीं कुरु वै सभाम्
Yam kritam nanukuryuste manavah prekshya vismitah
Manushyaloke kritsnesminstadrishim kuru vai sabham
1.11
यत्र दिव्यानभिप्रायान्पश्येम विहितांस्त्वया
आसुरान्मानुषांश्चैव तां सभां कुरु वै मय
Yatra divyanabhiprayanpashyema vihitanstvaya
Asuranmanushanshchaiva tam sabham kuru vai maya
1.12
प्रतिगृह्य तु तद्वाक्यं संप्रहृष्टो मयस्तदा
विमानप्रतिमां चक्रे पाण्डवस्य सभां मुदा
Pratigrihya tu tadvakyam samprahrishto mayastada
Vimanapratimam chakre pandavasya sabham muda
1.13
ततः कृष्णश्च पार्थश्च धर्मराजे युधिष्ठिरे
सर्वमेतद्यथावेद्य दर्शयामासतुर्मयम्
Tatah krishnashcha parthashcha dharmaraje yudhishthire
Sarvametadyathavedya darshayamasaturmayam
1.14
तस्मै युधिष्ठिरः पूजां यथार्हमकरोत्तदा
स तु तां प्रतिजग्राह मयः सत्कृत्य सत्कृतः
Tasmai yudhishthirah pujam yatharhamakarottada
Sa tu tam pratijagraha mayah satkritya satkritah
1.15
स पूर्वदेवचरितं तत्र तत्र विशां पते
कथयामास दैतेयः पाण्डुपुत्रेषु भारत
Sa purvadevacharitam tatra tatra visham pate
Kathayamasa daiteyah panduputreshu bharata
1.16
स कालं कंचिदाश्वस्य विश्वकर्मा प्रचिन्त्य च
सभां प्रचक्रमे कर्तुं पाण्डवानां महात्मनाम्
Sa kalam kanchidashvasya vishvakarma prachintya cha
Sabham prachakrame kartum pandavanam mahatmanam
1.17
अभिप्रायेण पार्थानां कृष्णस्य च महात्मनः
पुण्येऽहनि महातेजाः कृतकौतुकमङ्गलः
Abhiprayena parthanam krishnasya cha mahatmanah
Punyehani mahatejah kritakautukamangalah
1.18
तर्पयित्वा द्विजश्रेष्ठान्पायसेन सहस्रशः
धनं बहुविधं दत्त्वा तेभ्य एव च वीर्यवान्
Tarpayitva dvijashreshthanpayasena sahasrashah
Dhanam bahuvidham dattva tebhya eva cha viryavan
1.19
सर्वर्तुगुणसंपन्नां दिव्यरूपां मनोरमाम्
दशकिष्कुसहस्रां तां मापयामास सर्वतः
Sarvartugunasampannam divyarupam manoramam
Dashakishkusahasram tam mapayamasa sarvatah