সূক্ত 7

7.1

গৌঃ ১-২৬ ( একঃ পর্যায়ঃ) ব্রহ্ম। গৌঃ। ১ আর্চী বৃহতী, ২ আর্চ্যুষ্ণিক্, ৩, ৫ আর্চ্যনুষ্টুপ্, ৪, ১৪-১৬ সাম্নী বৃহতী, ৬,৮ আসুরী গায়ত্রী, ৭ ত্রিপদা পিপীলিকমধ্যা নিচৃদ্গায়ত্রী, ৯, ১৩ সাম্নী গায়ত্রী, ১০ পুর উষ্ণিক্, ১১-১২, ১৭, ২৫ সাম্ন্যুষ্ণিক্, ১৮, ২২ একপদাঽসুরী জগতী, ১৯ একপদাঽসুরী পঙ্ক্তিঃ, ২০ যাজুষী জগতী, ২১ আসুর্যনুষ্টুপ্, ২৩ একপদাঽঽসুরী বৃহতী, ২৪ সাম্নী ভুরিগ্বৃহতী, ২৬ সাম্নী ত্রিষ্টুপ্, (৭, ১৮-১৯, ২২-২৩ আভ্যোঽতিরিক্তা দ্বিপদা)।

প্রজাপতিশ্চ পরমেষ্ঠী চ শৃঙ্গে ইন্দ্রঃ শিরো অগ্নির্ললাটং যমঃ কৃকাটম্ ॥১॥

7.2

সোমো রাজা মস্তিষ্কো দ্যৌরুত্তরহনুঃ পৃথিব্যঽধরহনুঃ ॥২॥

7.3

বিদ্যুজ্জিহ্বা মরুতো দন্তা রেবতির্গ্রীবাঃ কৃত্তিকা স্কন্ধা ঘর্মো বহঃ ॥৩॥

7.4

বিশ্বং বায়ুঃ স্বর্গো লোকঃ কৃষ্ণদ্রং বিধরণী নিবেষ্যঃ ॥৪॥

7.5

শ্যেনঃ ক্রোডো৩ঽন্তরিক্ষং পাজস্যং১ বৃহস্পতিঃ ককুদ্ বৃহতীঃ কীকসাঃ ॥৫॥

7.6

দেবানাং পত্নীঃ পৃষ্টয় উপসদঃ পর্শবঃ ॥৬॥

7.7

মিত্রশ্চ বরুণশ্চাংসৌ ত্বষ্টা চার্যমা চ দোষণী মহাদেবো বাহূ ॥৭॥

7.8

ইন্দ্রাণী ভসদ্ বায়ুঃ পুচ্ছং পবমানো বালাঃ ॥৮॥

7.9

ব্রহ্ম চ ক্ষত্রং চ শ্রোণী বলমূরূ ॥৯॥

7.10

ধাতা চ সবিতা চাষ্ঠীবন্তৌ জঙ্ঘা গন্ধর্বা অপ্সরসঃ কুষ্ঠিকা অদিতিঃ শফাঃ ॥১০॥

7.11

চেতো হৃদয়ং যকৃন্মেধা ব্রতং পুরীতৎ ॥১১॥

7.12

ক্ষুৎ কুক্ষিরিরা বনিষ্ঠুঃ পর্বতাঃ প্লাশয়ঃ ॥১২॥

7.13

ক্রোধো বৃক্কৌ মন্যুরাণ্ডৌ প্রজা শেপঃ ॥১৩॥

7.14

নদী সূত্রী বর্ষস্য পতয় স্তনা স্তনয়িত্নুরূধঃ ॥১৪॥

7.15

বিশ্বব্যচাস্চর্মৌষধয়ো লোমানি নক্ষত্রাণি রূপম্ ॥১৫॥

7.16

দেবজনা গুদা মনুষ্যাঽ আন্ত্রাণ্যত্রা উদরম্ ॥১৬॥

7.17

রক্ষাংসি লোহিতমিতরজনা ঊবধ্যম্ ॥১৭॥

7.18

অভ্রং পীবো মজ্জা নিধনম্ ॥১৮॥

7.19

অগ্নিরাসীন উত্থিতোঽশ্বিনা ॥১৯॥

7.20

ইন্দ্রঃ প্রাঙ্ তিষ্ঠন্ দক্ষিণা তিষ্ঠন্ যমঃ ॥২০॥

7.21

প্রত্যঙ্ তিষ্ঠন্ ধাতোদঙ্ তিষ্ঠন্ত্সবিতা ॥২১॥

7.22

তৃণানি প্রাপ্তঃ সোমো রাজা ॥২২॥

7.23

মিত্র ঈক্ষমাণ আবৃত্ত আনন্দঃ ॥২৩॥

7.24

যুজ্যমানো বৈশ্বদেবো যুক্তঃ প্রজাপতির্বিমুক্তঃ সর্বম্ ॥২৪॥

7.25

এতদ্ বৈ বিশ্বরূপং সর্বরূপং গোরূপম্ ॥২৫॥

7.26

উপৈনং বিশ্বরূপাঃ সর্বরূপাঃ পশবস্তিষ্ঠন্তি য এবং বেদ ॥২৬॥