সূক্ত 112

112.1

পাশমোচনম্। ১-৩ অথর্বা। অগ্নিঃ। ত্রিষ্টুপ্।

মা জ্যেষ্ঠং বধীদয়মগ্ন এষাং মূলবর্হণাৎ পরি পাহ্যেনম্।
স গ্রাহ্যাঃ পাশান্ বি চৃত প্রজানন্ তুভ্যং দেবা অনু জানন্তু বিশ্বে ॥১॥

112.2

উন্মুঞ্চ পাশাংস্ত্বমগ্ন এষাং ত্রয়স্ত্রিভিরুত্সিতা যেভিরাসন্।
স গ্রাহ্যাঃ পাশান্ বি চৃত প্রজানন্ পিতাপুত্রৌ মাতরং মুঞ্চ সর্বান্ ॥২॥

112.3

যেভিঃ পাশৈঃ পরিবিত্তো বিবদ্ধোঽঙ্গেঅঙ্গ আর্পিত উত্সিতশ্চ ।
বি তে মুচ্যন্তং বিমুচো হি সন্তি ভ্রূণঘ্নি পূষন্ দুরিতানি মৃক্ষ্ব ॥৩॥