সূক্ত 28

28.1

দীর্ঘায়ুঃ। ১-১৪ অথর্বা। ত্রিবৃৎ, অগ্ন্যাদয়ঃ। ত্রিষ্টুপ্, ৬ পঞ্চপদাতিশক্বরী, ৭,৯-১০,১২ ককুম্মত্যনুষ্টুপ্ ১৩ পুরউষ্ণিক্।

নব প্রাণান্ নবভিঃ সং মিমীতে দীর্ঘায়ুত্বায় শতশারদায় ।
হরিতে ত্রীণি রজতে ত্রীণ্যয়সি ত্রীণি তপসাবিষ্ঠিতানি ॥১॥

অগ্নিঃ সূর্যশ্চন্দ্রমা ভূমিরাপো দ্যৌরন্তরিক্ষং প্রদিশো দিশশ্চ ।
আর্তবা ঋতুভিঃ সংবিদানা অনেন মা ত্রিবৃতা পারয়ন্তু ॥২॥

ত্রয়ঃ পোষাস্ত্রিবৃতি শ্রয়ন্তামনক্তু পূষা পয়সা ঘৃতেন ।
অন্নস্য ভূমা পুরুষস্য ভূমা ভূমা পশূনাং ত ইহ শ্রয়ন্তাম্ ॥৩॥

ইমমাদিত্যা বসুনা সমুক্ষতেমমগ্নে বর্ধয় ববৃধানঃ ।
ইমমিন্দ্র সং সৃজ বীর্যেঽণাস্মিন্ ত্রিবৃচ্ছ্রয়তাং পোষয়িষ্ণু ॥৪॥

ভূমিষ্ট্বা পাতু হরিতেন বিশ্বভৃদগ্নিঃ পিপর্ত্বয়সা সজোষাঃ ।
বীরুদ্ভিষ্টে অর্জুনং সংবিদানং দক্ষং দধাতু সুমনস্যমানম্ ॥৫॥

ত্রেধা জাতং জন্মনেদং হিরণ্যমগ্নেরেকং প্রিয়তমং বভূব সোমস্যৈকং হিংসিতস্য পরাপতৎ।
অপামেকং বেধসাং রেত আহুস্তৎ তে হিরণ্যং ত্রিবৃদস্ত্বায়ুষে ॥৬॥

ত্র্যায়ুষং জমদগ্নেঃ কশ্যপস্য ত্র্যায়ুষম্।
ত্রেধামৃতস্য চক্ষণং ত্রীণ্যায়ূংষি তে ঽকরম্ ॥৭॥

ত্রয়ঃ সুপর্ণাস্ত্রিবৃতা যদায়ন্নেকাক্ষরমভিসংভূয় শক্রাঃ ।
প্রত্যৌহন্ মৃত্যুমমৃতেন সাকমন্তর্দধানা দুরিতানি বিশ্বা ॥৮॥

দিবস্ত্বা পাতু হরিতং মধ্যাৎ ত্বা পাত্বর্জুনম্।
ভূম্যা অয়স্ময়ং পাতু প্রাগাদ্ দেবপুরা অয়ম্ ॥৯॥

ইমাস্তিস্রো দেবপুরাস্তাস্ত্বা রক্ষন্তু সর্বতঃ ।
তাস্ত্বং বিভ্রদ্ বর্চস্ব্যুত্তরো দ্বিষতাং ভব ॥১০॥

পুরং দেবানামমৃতং হিরণ্যং য আবেধে প্রথমো দেবো অগ্রে ।
তস্মৈ নমো দশ প্রাচীঃ কৃণোম্যনু মন্যতাং ত্রিবৃদাবধে মে ॥১১॥

আ ত্বা চৃতত্বর্যমা পূষা বৃহস্পতিঃ ।
অহর্জাতস্য যন্নাম তেন ত্বাতি চৃতামসি ॥১২॥

ঋতুভিষ্ট্বার্তবৈরায়ুষে বর্চসে ত্বা ।
সংবত্সরস্য তেজসা তেন সংহনু কৃণ্মসি ॥১৩॥

ঘৃতাদুল্লুপ্তং মধুনা সমক্তং ভূমিদৃংহমচ্যুতং পারয়িষ্ণু।
ভিন্দৎ সপত্নানধরাংশ্চ কৃণ্বদা মা রোহ মহতে সৌভগায় ॥১৪॥