সূক্ত 23

23.1

ক্রিমিঘ্নম্। ১-১৩ কণ্বঃ। ইন্দ্রঃ। অনুষ্টুপ্, ১৩ বিরাট্।

ওতে মে দ্যাবাপৃথিবী ওতা দেবী সরস্বতী ।
ওতৌ ম ইন্দ্রশ্চাগ্নিশ্চ ক্রিমিং জম্ভয়তামিতি ॥১॥

অস্যেন্দ্র কুমারস্য ক্রিমীন্ ধনপতে জহি ।
হতা বিশ্বা অরাতয় উগ্রেণ বচসা মম ॥২॥

যো অক্ষ্যৌঽপরিসর্পতি যো নাসে পরিসর্পতি ।
দতাং যো মধ্যং গচ্ছতি তং ক্রিমিং জম্ভয়ামসি ॥৩॥

সরূপৌ দ্বৌ বিরূপৌ দ্বৌ কৃষ্ণৌ দ্বৌ রোহিতৌ দ্বৌ।
বভ্রুশ্চ বভ্রুকর্ণশ্চ গৃধ্রঃ কোকশ্চ তে হতাঃ ॥৪॥

যে ক্রিময়ঃ শিতিকক্ষা যে কৃষ্ণাঃ শিতিবাহবঃ ।
যে কে চ বিশ্বরূপাস্তান্ ক্রিমীন্ জম্ভয়ামসি ॥৫॥

উৎ পুরস্তাৎ সূর্য এতি বিশ্বদৃষ্টো অদৃষ্টহা।
দৃষ্টাংশ্চ ঘ্নন্নদৄষ্টাংশ্চ সর্বাংশ্চ প্রমৃণন্ ক্রিমীন্ ॥৬॥

যেবাষাসঃ কষ্কষাস এজত্কাঃ শিপবিত্নুকাঃ ।
দৃষ্টাংশ্চ হন্যতাং ক্রিমিরুতাদৃষ্টশ্চ হন্যতাম্ ॥৭॥

হতো যেবাষঃ ক্রিমীণাং হতো নদনিমোত।
সর্বান্ নি মষ্মষাকরং দৃষদা খল্বাঁ ইব ॥৮॥

ত্রিশীর্ষাণং ত্রিককুদং ক্রিমিং সারঙ্গমর্জুনম্।
শৃণাম্যস্য পৃষ্টীরপি বৃশ্চামি যচ্ছিরঃ ॥৯॥

অত্রিবদ্ বঃ ক্রিময়ো হন্মি কণ্ববজ্জমদগ্নিবৎ।
অগস্ত্যস্য ব্রহ্মণা সং পিনষ্ম্যহং ক্রিমীন্ ॥১০॥

হতো রাজা ক্রিমীণামুতৈষাং স্থপতির্হতঃ ।
হতো হতমাতা ক্রিমির্হতভ্রাতা হতস্বসা ॥১১॥

হতাসো অস্য বেশসো হতাসঃ পরিবেশসঃ ।
অথো যে ক্ষুল্লকা ইব সর্বে তে ক্রিময়ো হতাঃ ॥১২॥

সর্বেষাং চ ক্রিমীণাং সর্বাসাং চ ক্রিমীনাম্।
ভিনদ্ম্যশ্মনা শিরো দহাম্যগ্নিনা মুখম্ ॥১৩॥