সূক্ত 11

11.1

সংপত্কর্ম। ১-১১ অথর্বা। বরুণঃ (প্রশ্নোত্তরম্)। ত্রিষ্টুপ্, ১ ভুরিক্, ৩ পঙ্ক্তিঃ, ৬ পঞ্চপদা অতিশক্বরী, ১১ ত্র্যবসানা ষট্-পদা অত্যষ্টিঃ।

কথং মহে অসুরায়াব্রবীরিহ কথং পিত্রে হরয়ে ত্বেষনৃম্ণঃ ।
পৃশ্নিং বরুণ দক্ষিণাং দদাবান্ পুনর্মঘ ত্বং মনসাচিকিত্সীঃ ॥১॥

11.2

ন কামেন পুনর্মঘো ভবামি সং চক্ষে কং পৃশ্নিমেতামুপাজে ।
কেন নু ত্বমথর্বন্ কাব্যেন কেন জাতেনাসি জাতবেদাঃ ॥২॥

11.3

সত্যমহং গভীরঃ কাব্যেন সত্যং জাতেনাস্মি জাতবেদাঃ ।
ন মে দাসো নার্যো মহিত্বা ব্রতং মীমায় যদহং ধরিষ্যে ॥৩॥

11.4

ন ত্বদন্যঃ কবিতরো ন মেধয়া ধীরতরো বরুণ স্বধাবন্।
ত্বং তা বিশ্বা ভুবনানি বেত্থ স চিন্নু ত্বজ্জনো মায়ী বিভায় ॥৪॥

11.5

ত্বং হ্য১ঙ্গ বরুণ স্বধাবন্ বিশ্বা বেত্থ জনিম সুপ্রণীতে ।
কিং রজস এনা পরো অন্যদস্ত্যেনা কিং পরেণাবরমমুর ॥৫॥

11.6

একং রজস এনা পরো অন্যদস্ত্যেনা পর একেন দুর্ণশং চিদর্বাক্।
তৎ তে বিদ্বান্ বরুণ প্র ব্রবীম্যধোবচসঃ পণয়ো ভবন্তু নীচৈর্দাসা উপ সর্পন্তু ভূমিম্ ॥৬॥

11.7

ত্বং হ্য১ঙ্গ বরুণ ব্রবীষি পুনর্মঘেষ্ববদ্যানি ভূরি ।
মো ষু পণীংরভ্যে৩তাবতো ভূন্মা ত্বা বোচন্নরাধসং জনাসঃ ॥৭॥

11.8

মা মা বোচন্নরাধসং জনাসঃ পুনস্তে পৃশ্নিং জরিতর্দদামি ।
স্তোত্রং মে বিশ্বমা যাহি শচীভিরন্তর্বিশ্বাসু মানুষীষু দিক্ষু ॥৮॥

11.9

আ তে স্তোত্রাণ্যুদ্যতানি যন্ত্বন্তর্বিশ্বাসু মানুষীষু দিক্ষু।
দেহি নু মে যন্মে অদত্তো অসি যুজ্যো মে সপ্তপদঃ সখাসি ॥৯॥

11.10

সমা নৌ বন্ধুর্বরুণ সমা জা বেদাহং তদ্ যন্নাবেষা সমা জা।
দদামি তদ্ যৎ তে অদত্তো অস্মি যুজ্যস্তে সপ্তপদঃ সখাস্মি ॥১০॥

11.11

দেবো দেবায় গৃণতে বয়োধা বিপ্রো বিপ্রায় স্তুবতে সুমেধাঃ ।
অজীজনো হি বরুণ স্বধাবন্নথর্বাণং পিতরং দেববন্ধুম্।
তস্মা উ রাধঃ কৃণুহি সুপ্রশস্তং সখা নো অসি পরমং চ বন্ধুঃ ॥১১॥