সূক্ত 94

94.1

আ যাত্বিন্দ্রঃ স্বপতির্মদায় যো ধর্মণা তূতুজানস্তুবিষ্মান্।
প্রত্বক্ষাণো অতি বিশ্বা সহাংস্যপারেণ মহতা বৃষ্ণ্যেন ॥১॥

সুষ্ঠামা রথঃ সুয়মা হরী তে মিম্যক্ষ বজ্রো নৃপতে গভস্তৌ ।
শীভং রাজন্ সুপথা যাহ্যর্বাঙ্ বর্ধাম তে পপুষো বৃষ্ণ্যানি ॥২॥

এন্দ্রবাহো নৃপতিং বজ্রবাহুমুগ্রমুগ্রাসস্তবিষাস এনম্।
প্রত্বক্ষসং বৃষভং সত্যশুষ্মমেমস্মত্রা সধমাদো বহন্তু ॥৩॥

এবা পতিং দ্রোণসাচং সচেতসমূর্জ স্কম্ভং ধরুণ আ বৃষায়সে ।
ওজঃ কৃষ্ব সং গৃভায় ত্বে অপ্যসো যথা কেনিপানামিনো বৃধে ॥৪॥

গমন্নস্মে বসূন্যা হি শংসিষং স্বাশিষং ভরমা যাহি সোমিনঃ ।
ত্বমীশিষে সাস্মিন্না সত্সি বর্হিষ্যনাধৃষ্যা তব পাত্রাণি ধর্মণা ॥৫॥

পৃথক্ প্রায়ন্ প্রথমা দেবহূতয়োঽকৃণ্বত শ্রবস্যাঽনি দুষ্টরা ।
ন যে শেকুর্যজ্ঞিয়াং নাবমারুহমীর্মৈব তে ন্যবিশন্ত কেপয়ঃ ॥৬॥

এবৈবাপাগপরে সন্তু দূঢ্যোঽশ্বা যেষাং দুর্যুজ আয়ুয়ুজ্রে।
ইত্থা যে প্রাগুপরে সন্তি দাবনে পুরূণি যত্র বয়ুনানি ভোজনা ॥৭॥

গিরীংরজ্রান্ রেজমানাং অধারয়দ্ দ্যৌঃ ক্রন্দদন্তরিক্ষাণি কোপয়ৎ।
সমীচীনে ধিষণে বি ষ্কভায়তি বৃষ্ণঃ পীত্বা মদ উক্থানি শংসতি ॥৮॥

ইমং বিভর্মি সুকৃতং তে অঙ্কুশং যেনারুজাসি মঘবং ছফারুজঃ ।
অস্মিন্ত্সু তে সবনে অস্ত্বোক্ত্যং সুত ইষ্টৌ মঘবন্ বোধ্যাভগঃ ॥৯॥

গোভিষ্টরেমামতিং দুরেবাং যবেন ক্ষুধং পুরুহূত বিশ্বাম্।
বয়ং রাজভিঃ প্রথমা ধনান্যস্মাকেন বৃজনেনা জয়েম ॥১০॥

বৃহস্পতির্নঃ পরি পাতু পশ্চাদুতোত্তরস্মাদধরাদঘায়োঃ ।
ইন্দ্রঃ পুরস্তাদুত মধ্যতো নঃ সখা সখিভ্যো বরিবঃ কৃণোতু ॥১১॥