সূক্ত 47

47.1

তমিন্দ্রং বাজয়ামসি মহে বৃত্রায় হন্তবে । স বৃষা বৃষভো ভুবৎ ॥১॥

ইন্দ্রঃ স দামনে কৃত ওজিষ্ঠঃ স মদে হিতঃ । দ্যুম্নী শ্লোকী স সোম্যঃ ॥২॥

গিরা বজ্রো ন সংভৃতঃ সবলো অনপচ্যুতঃ । ববক্ষ ঋষ্বো অস্তৃতঃ ॥৩॥

ইন্দ্রমিদ্ গাথিনো বৃহদিন্দ্রমর্কেভিরর্কিণঃ । ইন্দ্রং বাণীরনূষত ॥৪॥

ইন্দ্র ইদ্ধর্যোঃ সচা সংমিশ্ল আ বচোয়ুজা । ইন্দ্রো বজ্রী হিরণ্যয়ঃ ॥৫॥

ইন্দ্রো দীর্ঘায় চক্ষস আ সূর্যং রোহয়দ্ দিবি। বি গোভিরদ্রিমৈরয়ৎ ॥৬॥

আ যাহি সুষুমা হি ত ইন্দ্র সোমং পিবা ইমম্। এদং বর্হিঃ সদো মম ॥৭॥

আ ত্বা ব্রহ্ময়ুজা হরী বহতামিন্দ্র কেশিনা । উপ ব্রহ্মাণি নঃ শৃণু ॥৮॥

ব্রহ্মাণস্ত্বা বয়ং যুজা সোমপামিন্দ্র সোমিনঃ । সুতাবন্তো হবামহে ॥৯॥

যুঞ্জন্তি ব্রধ্নমরুষং চরন্তং পরি তস্থুষঃ । রোচন্তে রোচনা দিবি ॥১০॥

যুঞ্জন্ত্যস্য কাম্যা হরী বিপক্ষসা রথে । শোণা ধৃষ্ণূ নৃবাহসা ॥১১॥

কেতুং কৃণ্বন্নকেতবে পেশো মর্যা অপেশসে । সমুষদ্ভিরজায়থাঃ ॥১২॥

উদু ত্যং জাতবেদসং দেবং বহন্তি কেতবঃ । দৃশে বিশ্বায় সূর্যম্ ॥১৩॥

অপ ত্যে তায়বো যথা নক্ষত্রা যন্ত্যক্তুভিঃ । সূরায় বিশ্বচক্ষসে ॥১৪॥

অদৃশ্রন্নস্য কেতবো বি রশ্ময়ো জনাং অনু । ভ্রাজন্তো অগ্নয়ো যথা ॥১৫॥

তরণির্বিশ্বদর্শতো জ্যোতিষ্কৃদসি সূর্য । বিশ্বমা ভাসি রোচন ॥১৬॥

প্রত্যঙ্ দেবানাং বিশঃ প্রত্যঙ্ঙুদেষি মানুষীঃ । প্রত্যঙ্ বিশ্বং স্বর্দৃশে ॥১৭॥

যেনা পাবক চক্ষসা ভুরণ্যন্তং জনাং অনু । ত্বং বরুণ পশ্যসি ॥১৮॥

বি দ্যামেষি রজস্পৃথ্বহর্মিমানো অক্তুভিঃ । পশ্যং জন্মানি সূর্য ॥১৯॥

সপ্ত ত্বা হরিতো রথে বহন্তি দেব সূর্য । শোচিষ্কেশং বিচক্ষণম্ ॥২০॥

অয়ুক্ত সপ্ত শুন্ধ্যুবঃ সূরো রথস্য নপ্ত্যঃ । তাভির্যাতি স্বয়ুক্তিভিঃ ॥২১॥