UtshovSukta 47
47.1
तमिन्द्रं॑ वाजयामसि म॒हे वृ॒त्राय॒ हन्त॑वे । स वृषा॑ वृष॒भो भु॑वत् ॥१॥
Tamindram vajayamasi mahe vritraya hantave, sa vrisha vrishabho bhuvat
47.2
इन्द्रः॒ स दाम॑ने कृ॒त ओजि॑ष्ठः॒ स मदे॑ हि॒तः । द्यु॒म्नी श्लो॒की स सो॒म्यः ॥२॥
Indrah sa damane krita ojishthah sa made hitah, dyumni shloki sa somyah
47.3
गि॒रा वज्रो॒ न संभृ॑तः॒ सब॑लो॒ अन॑पच्युतः । व॒व॒क्ष ऋ॒ष्वो अस्तृ॑तः ॥३॥
Gira vajro na sambhritah sabalo anapachyutah, vavaksha rishvo astritah
47.4
इन्द्र॒मिद् गा॒थिनो॑ बृ॒हदिन्द्र॑म॒र्केभि॑र॒र्किणः॑ । इन्द्रं॒ वाणी॑रनूषत ॥४॥
Indramid gathino brihadindramarkebhirarkinah, indram vaniranushata
47.5
इन्द्र॒ इद्धर्योः॒ सचा॒ संमि॑श्ल॒ आ व॑चो॒युजा॑ । इन्द्रो॑ व॒ज्री हि॑र॒ण्ययः॑ ॥५॥
Indra iddharyoh sacha sammishla a vachoyuja, indro vajri hiranyayah
47.6
इन्द्रो॑ दी॒र्घाय॒ चक्ष॑स॒ आ सूर्यं॑ रोहयद् दि॒वि। वि गोभि॒रद्रि॑मैरयत् ॥६॥
Indro dirghaya chakshasa a suryam rohayad divi, vi gobhiradrimairayat
47.7
आ या॑हि सुषु॒मा हि त॒ इन्द्र॒ सोमं॒ पिबा॑ इ॒मम्। एदं ब॒र्हिः स॑दो॒ मम॑ ॥७॥
A yahi sushuma hi ta indra somam piba imam, edam barhih sado mama
47.8
आ त्वा॑ ब्रह्म॒युजा॑ हरी॒ वह॑तामिन्द्र के॒शिना॑ । उप॒ ब्रह्मा॑णि नः शृणु ॥८॥
A tva brahmayuja hari vahatamindra keshina, upa brahmani nah shrinu
47.9
ब्र॒ह्माण॑स्त्वा व॒यं यु॒जा सो॑म॒पामि॑न्द्र सो॒मिनः॑ । सु॒ताव॑न्तो हवामहे ॥९॥
Brahmanastva vayam yuja somapamindra sominah, sutavanto havamahe
47.10
यु॒ञ्जन्ति॑ ब्र॒ध्नम॑रु॒षं चर॑न्तं॒ परि॑ त॒स्थुषः॑ । रोच॑न्ते रोच॒ना दि॒वि ॥१०॥
Yunjanti bradhnamarusham charantam pari tasthushah, rochante rochana divi
47.11
यु॒ञ्जन्त्य॑स्य॒ काम्या॒ हरी॒ विप॑क्षसा॒ रथे॑ । शोणा॑ धृ॒ष्णू नृ॒वाह॑सा ॥११॥
Yunjantyasya kamya hari vipakshasa rathe, shona dhrishnu nrivahasa
47.12
के॒तुं कृ॒ण्वन्न॑के॒तवे॒ पेशो॑ मर्या अपे॒शसे॑ । समु॒षद्भि॑रजायथाः ॥१२॥
Ketum krinvannaketave pesho marya apeshase, samushadbhirajayathah
47.13
उदु॒ त्यं जा॒तवे॑दसं दे॒वं व॑हन्ति के॒तवः॑ । दृ॒शे विश्वा॑य॒ सूर्य॑म् ॥१३॥
Udu tyam jatavedasam devam vahanti ketavah, drishe vishvaya suryam
47.14
अप॒ त्ये ता॒यवो॑ यथा॒ नक्ष॑त्रा यन्त्य॒क्तुभिः॑ । सूरा॑य वि॒श्वच॑क्षसे ॥१४॥
Apa tye tayavo yatha nakshatra yantyaktubhih, suraya vishvachakshase
47.15
अदृ॑श्रन्नस्य के॒तवो॒ वि र॒श्मयो॒ जनां॒ अनु॑ । भ्राज॑न्तो अ॒ग्नयो॑ यथा ॥१५॥
Adrishrannasya ketavo vi rashmayo janam anu, bhrajanto agnayo yatha
47.16
त॒रणि॑र्वि॒श्वद॑र्शतो ज्योति॒ष्कृद॑सि सूर्य । विश्व॒मा भा॑सि रोचन ॥१६॥
Taranirvishvadarshato jyotishkridasi surya, vishvama bhasi rochana
47.17
प्र॒त्यङ् दे॒वानां॒ विशः॑ प्र॒त्यङ्ङुदे॑षि॒ मानु॑षीः । प्र॒त्यङ् विश्वं॒ स्वर्दृ॒शे ॥१७॥
Pratyang devanam vishah pratyanngudeshi manushih, pratyang vishvam svardrishe
47.18
येना॑ पावक॒ चक्ष॑सा भुर॒ण्यन्तं॒ जनां॒ अनु॑ । त्वं व॑रुण॒ पश्य॑सि ॥१८॥
Yena pavaka chakshasa bhuranyantam janam anu, tvam varuna pashyasi
47.19
वि द्यामे॑षि॒ रज॑स्पृ॒थ्वह॒र्मिमा॑नो अ॒क्तुभिः॑ । पश्यं॒ जन्मा॑नि सूर्य ॥१९॥
Vi dyameshi rajasprithvaharmimano aktubhih, pashyam janmani surya
47.20
स॒प्त त्वा॑ ह॒रितो॒ रथे॒ वह॑न्ति देव सूर्य । शो॒चिष्के॑शं विचक्ष॒णम् ॥२०॥
Sapta tva harito rathe vahanti deva surya, shochishkesham vichakshanam
47.21
अयु॑क्त स॒प्त शु॒न्ध्युवः॒ सूरो॒ रथ॑स्य न॒प्त्यः । ताभि॑र्याति॒ स्वयु॑क्तिभिः ॥२१॥
Ayukta sapta shundhyuvah suro rathasya naptyah, tabhiryati svayuktibhih