সূক্ত 137

137.1

যদ্ধ প্রাচীরজগন্তোরো মণ্ডূরধাণিকীঃ ।
হতা ইন্দ্রস্য শত্রবঃ সর্বে বুদ্বুদয়াশবঃ ॥১॥

কপৃন্নরঃ কপৃথমুদ্দধাতন চোদয়ত খুদত বাজসাতয়ে ।
নিষ্টিগ্র্যঃ পুত্রমা চ্যাবয়োতয় ইন্দ্রং সবাধ ইহ সোমপীতয়ে ॥২॥

দধিক্রাব্ণো অকারিষং জিষ্ণোরশ্বস্য বাজিনঃ ।
সুরভি নো মুখা করত্প্র ণ আয়ূংষি তারিষৎ ॥৩॥

সুতাসো মধুমত্তমাঃ সোমা ইন্দ্রায় মন্দিনঃ ।
পবিত্রবন্তো অক্ষরন্দেবান্গচ্ছন্তু বো মদাঃ ॥৪॥

ইন্দুরিন্দ্রায় পবত ইতি দেবাসো অব্রুবন্।
বাচস্পতির্মখস্যতে বিশ্বস্যেশান ওজসা ॥৫॥

সহস্রধারঃ পবতে সমুদ্রো বাচমীঙ্খয়ঃ ।
সোমঃ পতী রয়ীণাং সখেন্দ্রস্য দিবেদিবে ॥৬॥

অব দ্রপ্সো অংশুমতীমতিষ্ঠদিয়ানঃ কৃষ্ণো দশভিঃ সহস্রৈঃ ।
আবত্তমিন্দ্রঃ শচ্যা ধমন্তমপস্নেহিতীর্নৃমণা অধত্ত ॥৭॥

দ্রপ্সমপশ্যং বিষুণে চরন্তমুপহ্বরে নদ্যো অংশুমত্যাঃ ।
নভো ন কৃষ্ণমবতস্থিবাংসমিষ্যামি বো বৃষণো যুধ্যতাজৌ ॥৮॥

অধ দ্রপ্সো অংশুমত্যা উপস্থেঽধারয়ত্তন্বং তিত্বিষাণঃ ।
বিশো অদেবীরভ্যা৩চরন্তীর্বৃহস্পতিনা যুজেন্দ্রঃ সসাহে ॥৯॥

ত্বং হ ত্যত্সপ্তভ্যো জায়মানোঽশত্রুভ্যো অভবঃ শত্রুরিন্দ্র ।
গূল্হে দ্যাবাপৃথিবী অন্ববিন্দো বিভুমদ্ভ্যো ভুবনেভ্যো রণং ধাঃ ॥১০॥

ত্বং হ ত্যদপ্রতিমানমোজো বজ্রেণ বজ্রিন্ধৃষিতো জঘন্থ ।
ত্বং শুষ্ণস্যাবাতিরো বধত্রৈস্ত্বং গা ইন্দ্র শচ্যেদবিন্দঃ ॥১১॥

তমিন্দ্রং বাজয়ামসি মহে বৃত্রায় হন্তবে । স বৃষা বৃষভো ভুবৎ ॥১২॥

ইন্দ্রঃ স দামনে কৃত ওজিষ্ঠঃ স মদে হিতঃ । দ্যুম্নী শ্লোকী স সোম্যঃ ॥১৩॥

গিরা বজ্রো ন সংভৃতঃ সবলো অনপচ্যুতঃ । ববক্ষ ঋষ্বো অস্তৃতঃ ॥১৪॥