Sukta 137

137.1

यद्ध॒ प्राची॒रज॑ग॒न्तोरो॑ मण्डूरधाणिकीः ।
ह॒ता इन्द्र॑स्य॒ शत्र॑वः॒ सर्वे॑ बुद्बु॒दया॑शवः ॥१॥

Yaddha prachirajagantoro manduradhanikih
Hata indrasya shatravah sarve budbudayashavah

कपृ॑न्नरः कपृ॒थमुद्द॑धातन चो॒दय॑त खु॒दत॒ वाज॑सातये ।
नि॒ष्टि॒ग्र्यः पु॒त्रमा च्या॑वयो॒तय॒ इन्द्रं॑ स॒बाध॑ इ॒ह सोम॑पीतये ॥२॥

Kaprinnarah kaprithamuddadhatana chodayata khudata vajasataye
Nishtigryah putrama chyavayotaya indram sabadha iha somapitaye

द॒धि॒क्राव्णो॑ अकारिषं जि॒ष्णोरश्व॑स्य वा॒जिनः॑ ।
सु॒र॒भि नो॒ मुखा॑ कर॒त्प्र ण॒ आयूं॑षि तारिषत् ॥३॥

Dadhikravno akarisham jishnorashvasya vajinah
Surabhi no mukha karatpra na ayunshi tarishat

सु॒तासो॒ मधु॑मत्तमाः॒ सोमा॒ इन्द्रा॑य म॒न्दिनः॑ ।
प॒वित्र॑वन्तो अक्षरन्दे॒वान्ग॑च्छ॑न्तु वो॒ मदाः॑ ॥४॥

Sutaso madhumattamah soma indraya mandinah
Pavitravanto aksharandevangachchhantu vo madah

इन्दु॒रिन्द्रा॑य पवत॒ इति॑ दे॒वासो॑ अब्रुवन्।
वा॒चस्पति॑र्मखस्यते॒ विश्व॒स्येशा॑न॒ ओज॑सा ॥५॥

Indurindraya pavata iti devaso abruvan
Vachaspatirmakhasyate vishvasyeshana ojasa

स॒हस्र॑धारः पवते समु॒द्रो वा॑चमीङ्ख॒यः ।
सोमः॒ पती॑ रयी॒णां सखेन्द्र॑स्य दि॒वेदि॑वे ॥६॥

Sahasradharah pavate samudro vachaminkhayah
Somah pati rayinam sakhendrasya divedive

अव॑ द्र॒प्सो अं॑शु॒मती॑मतिष्ठदिया॒नः कृ॒ष्णो द॒शभिः॑ स॒हस्रैः॑ ।
आव॒त्तमिन्द्रः॒ शच्या॒ धम॑न्त॒मप॒स्नेहि॑तीर्नृ॒मणा॑ अधत्त ॥७॥

Ava drapso anshumatimatishthadiyanah krishno dashabhih sahasraih
Avattamindrah shachya dhamantamapasnehitirnrimana adhatta

द्र॒प्सम॑पश्यं॒ विषु॑णे॒ चर॑न्तमुपह्व॒रे न॒द्यो अंशु॒मत्याः॑ ।
नभो॒ न कृ॒ष्णम॑वतस्थि॒वांस॒मिष्या॑मि वो वृषणो॒ युध्य॑ता॒जौ ॥८॥

Drapsamapashyam vishune charantamupahvare nadyo anshumatyah
Nabho na krishnamavatasthivansamishyami vo vrishano yudhyatajau

अध॑ द्र॒प्सो अं॑शु॒मत्या॑ उ॒पस्थेऽधा॑रयत्त॒न्वं॑ तित्विषा॒णः ।
विशो॒ अदे॑वीर॒भ्या॒३चर॑न्ती॒र्बृह॒स्पति॑ना यु॒जे॑न्द्रः॑ ससाहे ॥९॥

Adha drapso anshumatya upasthedharayattanvam titvishanah
Visho adevirabhya3charantirbrihaspatina yujendrah sasahe

त्वं ह॒ त्यत्स॒प्तभ्यो॒ जाय॑मानोऽश॒त्रुभ्यो॑ अभवः॒ शत्रु॑रिन्द्र ।
गू॒ल्हे द्यावा॑पृथि॒वी अन्व॑विन्दो विभु॒मद्भ्यो॒ भुव॑नेभ्यो॒ रणं॑ धाः ॥१०॥

Tvam ha tyatsaptabhyo jayamanoshatrubhyo abhavah shatrurindra
Gulhe dyavaprithivi anvavindo vibhumadbhyo bhuvanebhyo ranam dhah

त्वं ह॒ त्यद॑प्रतिमा॒नमोजो॒ वज्रे॑ण वज्रिन्धृषि॒तो ज॑घन्थ ।
त्वं शुष्ण॒स्यावा॑तिरो॒ वध॑त्रै॒स्त्वं गा इ॑न्द्र॒ शच्येद॑विन्दः ॥११॥

Tvam ha tyadapratimanamojo vajrena vajrindhrishito jaghantha
Tvam shushnasyavatiro vadhatraistvam ga indra shachyedavindah

तमिन्द्रं॑ वाजयामसि म॒हे वृ॒त्राय॒ हन्त॑वे । स वृषा॑ वृष॒भो भु॑वत् ॥१२॥

Tamindram vajayamasi mahe vritraya hantave, sa vrisha vrishabho bhuvat

इन्द्रः॒ स दाम॑ने कृ॒त ओजि॑ष्ठः॒ स मदे॑ हि॒तः । द्यु॒म्नी श्लो॒की स सो॒म्यः ॥१३॥

Indrah sa damane krita ojishthah sa made hitah, dyumni shloki sa somyah

गि॒रा वज्रो॒ न संभृ॑तः॒ सब॑लो॒ अन॑पच्युतः । व॒व॒क्ष ऋ॒ष्वो अस्तृ॑तः ॥१४॥

Gira vajro na sambhritah sabalo anapachyutah, vavaksha rishvo astritah