সূক্ত 39

39.1

কুষ্ঠনাশনম্। ১-১০ ভৃগ্বঙ্গিরাঃ। কুষ্ঠঃ। অনুষ্টুপ্, ২, ৩ ত্র্যবসানা পথ্যাপঙ্ক্তিঃ, ৪ ষট্-পদা জগতী, ৫ সপ্তপদা শক্বরী, ৬-৮ অষ্টিঃ (৫-৮ চতুরবসানা)।

ঐতু দেবস্ত্রায়মাণঃ কুষ্ঠো হিমবতস্পরি ।
তক্মানং সর্বং নাশয় সর্বাশ্চ যাতুধান্যঃ ॥১॥

39.2

ত্রীণি তে কুষ্ঠ নামানি নদ্যমারো নদ্যারিষঃ ।
নদ্যায়ং পুরুষো রিষৎ।
যস্মৈ পরিব্রবীমি ত্বা সায়ংপ্রাতরথো দিবা ॥২॥

39.3

জীবলা নাম তে মাতা জীবন্তো নাম তে পিতা।
নদ্যায়ং পুরুষো রিষৎ।
যস্মৈ পরিব্রবীমি ত্বা সায়ংপ্রাতরথো দিবা ॥৩॥

39.4

উত্তমো অস্যোষধীনামনড্বান্ জগতামিব ব্যাঘ্রঃ শ্বপদামিব ।
নদ্যায়ং পুরুষো রিষৎ।
যস্মৈ পরিব্রবীমি ত্বা সায়ংপ্রাতরথো দিবা ॥৪॥

39.5

ত্রিঃ শাম্বুভ্যো অঙ্গিরেভ্যস্ত্রিরাদিত্যেভ্যস্পরি ।
ত্রির্জাতো বিশ্বদেবেভ্যঃ ।
স কুষ্ঠো বিশ্বভেষজঃ সাকং সোমেন তিষ্ঠতি ।
তক্মানং সর্বং নাশয় সর্বাশ্চ যাতুধান্যঃ ॥৫॥

39.6

অশ্বত্থো দেবসদনস্তৃতীয়স্যামিতো দিবি।
তত্রামৃতস্য চক্ষণং ততঃ কুষ্ঠো অজায়ত ।
স কুষ্ঠো বিশ্বভেষজঃ সাকং সোমেন তিষ্ঠতি ।
তক্মানং সর্বং নাশয় সর্বাশ্চ যাতুধান্যঃ ॥৬॥

39.7

হিরণ্যয়ী নৌরচরদ্ধিরণ্যবন্ধনা দিবি।
তত্রামৃতস্য চক্ষণং ততঃ কুষ্ঠো অজায়ত ।
স কুষ্ঠো বিশ্বভেষজঃ সাকং সোমেন তিষ্ঠতি ।
তক্মানং সর্বং নাশয় সর্বাশ্চ যাতুধান্যঃ ॥৭॥

39.8

যত্র নাবপ্রভ্রংশনং যত্র হিমবতঃ শিরঃ ।
তত্রামৃতস্য চক্ষণং ততঃ কুষ্ঠো অজায়ত ।
স কুষ্ঠো বিশ্বভেষজঃ সাকং সোমেন তিষ্ঠতি ।
তক্মানং সর্বং নাশয় সর্বাশ্চ যাতুধান্যঃ ॥৮॥

39.9

যং ত্বা বেদ পূর্ব ইক্ষ্বাকো যং বা ত্বা কুষ্ঠ কাম্যঃ ।
যং বা বসো যমাত্স্যস্তেনাসি বিশ্বভেষজঃ ॥৯॥

39.10

শীর্ষলোকং তৃতীয়কং সদন্দির্যশ্চ হায়নঃ ।
তক্মানং বিশ্বধাবীর্যাধরাঞ্চং পরা সুব ॥১০॥