সূক্ত 13

13.1

একবীরঃ। ১-১১ অপ্রতিরথঃ। ইন্দ্রঃ। ত্রিষ্টুপ্, ৩-৬, ১১ ভুরিক্।

ইন্দ্রস্য বাহূ স্থবিরৌ বৃষাণৌ চিত্রা ইমা বৃষভৌ পারয়িষ্ণূ।
তৌ যোক্ষে প্রথমো যোগ আগতে যাভ্যাং জিতমসুরাণাং স্ব১র্যৎ ॥১॥

13.2

আশুঃ শিশানো বৃষভো ন ভীমো ঘনাঘনঃ ক্ষোভণশ্চর্ষণীনাম্।
সংক্রন্দনোঽনিমিষ একবীরঃ শতং সেনা অজয়ৎ সাকমিন্দ্রঃ ॥২॥

13.3

সংক্রন্দনেনানিমিষেণ জিষ্ণুনাঽয়োধ্যেন দুশ্চ্যবনেন ধৃষ্ণুনা ।
তদিন্দ্রেণ জয়ত তৎ সহধ্বং যুধো নর ইষুহস্তেন বৃষ্ণা ॥৩॥

13.4

স ইষুহস্তৈঃ স নিষঙ্গিভির্বশী সংস্রষ্টা স যুধ ইন্দ্রো গণেন ।
সংসৃষ্টজিৎ সোমপা বাহুশর্ধ্যু১গ্রধন্বা প্রতিহিতাভিরস্তা ॥৪॥

13.5

বলবিজ্ঞায়ঃ স্থবিরঃ প্রবীরঃ সহস্বান্ বাজী সহমান উগ্রঃ ।
অভিবীরো অভিষত্বা সহোজিজ্জৈত্রমিন্দ্র রথমা তিষ্ঠ গোবিদম্ ॥৫॥

13.6

ইমং বীরমনু হর্ষধ্বমুগ্রমিন্দ্রং সখায়ো অনু সং রভধ্বম্।
গ্রামজিতং গোজিতং বজ্রবাহুং জয়ন্তমজ্ম প্রমৃণন্তমোজসা ॥৬॥

13.7

অভি গোত্রাণি সহসা গাহমানোঽদায় উগ্রঃ শতমন্যুরিন্দ্রঃ ।
দুশ্চ্যবনঃ পৃতনাষাডয়োধ্যো৩ঽস্মাকং সেনা অবতু প্র যুত্সু ॥৭॥

13.8

বৃহস্পতে পরি দীয়া রথেন রক্ষোহামিত্রাঁ অপবাধমানঃ ।
প্রভঞ্জংছত্রূন্ প্রমৃণন্নমিত্রানস্মাকমেধ্যবিতা তনূনাম্ ॥৮॥

13.9

ইন্দ্র এষাং নেতা বৃহস্পতির্দক্ষিণা যজ্ঞঃ পুর এতু সোমঃ ।
দেবসেনানামভিভঞ্জতীনাং জয়ন্তীনাং মরুতো যন্তু মধ্যে ॥৯॥

13.10

ইন্দ্রস্য বৃষ্ণো বরুণস্য রাজ্ঞ আদিত্যানাং মরুতাং শর্ধ উগ্রম্।
মহামনসাং ভুবনচ্যবানাং ঘোষো দেবানাং জয়তামুদস্থাৎ ॥১০॥

13.11

অস্মাকমিন্দ্রঃ সমৃতেষু ধ্বজেষ্বস্মাক যা ইষবস্তা জয়ন্তু ।
অস্মাকং বীরা উত্তরে ভবন্ত্বস্মান্ দেবাসোঽবতা হবেষু ॥১১॥