Sukta 13

13.1

Ekavirah, 1-11 apratirathah, indrah, trishtup, 3-6, 11 bhurik

इन्द्र॑स्य बा॒हू स्थवि॑रौ॒ वृषा॑णौ चि॒त्रा इ॒मा वृ॑ष॒भौ पा॑रयि॒ष्णू।
तौ यो॑क्षे प्रथ॒मो योग॒ आग॑ते॒ याभ्यां॑ जि॒तमसु॑राणां॒ स्व॑१र्यत् ॥१॥

Indrasya bahu sthavirau vrishanau chitra ima vrishabhau parayishnu
Tau yokshe prathamo yoga agate yabhyam jitamasuranam sva1ryat

13.2

आ॒शुः शिशा॑नो वृष॒भो न भी॒मो घ॑नाघ॒नः क्षोभ॑णश्चर्षणी॒नाम्।
सं॒क्रन्द॑नोऽनिमि॒ष ए॑कवी॒रः श॒तं सेना॑ अजयत् सा॒कमिन्द्रः॑ ॥२॥

Ashuh shishano vrishabho na bhimo ghanaghanah kshobhanashcharshaninam
Sankrandanonimisha ekavirah shatam sena ajayat sakamindrah

13.3

सं॒क्रन्द॑नेनानिमि॒षेण॑ जि॒ष्णुना॑ऽयो॒ध्येन॑ दुश्च्यव॒नेन॑ धृ॒ष्णुना॑ ।
तदिन्द्रे॑ण जयत॒ तत् स॑हध्वं॒ युधो॑ नर॒ इषु॑हस्तेन॒ वृष्णा॑ ॥३॥

Sankrandanenanimishena jishnunayodhyena dushchyavanena dhrishnuna
Tadindrena jayata tat sahadhvam yudho nara ishuhastena vrishna

13.4

स इषु॑हस्तैः॒ स नि॑ष॒ङ्गिभि॑र्व॒शी संस्र॑ष्टा॒ स युध॒ इन्द्रो॑ ग॒णेन॑ ।
सं॒सृ॒ष्ट॒जित् सो॑म॒पा बा॑हुश॒र्ध्यु॑१ग्रध॑न्वा॒ प्रति॑हिताभि॒रस्ता॑ ॥४॥

Sa ishuhastaih sa nishangibhirvashi sansrashta sa yudha indro ganena
Sansrishtajit somapa bahushardhyu1gradhanva pratihitabhirasta

13.5

ब॒ल॒वि॒ज्ञा॒यः स्थवि॑रः॒ प्रवी॑रः॒ सह॑स्वान् वा॒जी सह॑मान उ॒ग्रः ।
अ॒भिवी॑रो अ॒भिष॑त्वा सहो॒जिज्जैत्र॑मिन्द्र॒ रथ॒मा ति॑ष्ठ गो॒विद॑म् ॥५॥

Balavigyayah sthavirah pravirah sahasvan vaji sahamana ugrah
Abhiviro abhishatva sahojijjaitramindra rathama tishtha govidam

13.6

इ॒मं वी॒रमनु॑ हर्षध्वमु॒ग्रमिन्द्रं॑ सखायो॒ अनु॒ सं र॑भध्वम्।
ग्रा॒म॒जितं॑ गो॒जितं॒ वज्र॑बाहुं॒ जय॑न्त॒मज्म॑ प्रमृ॒णन्त॒मोज॑सा ॥६॥

Imam viramanu harshadhvamugramindram sakhayo anu sam rabhadhvam
Gramajitam gojitam vajrabahum jayantamajma pramrinantamojasa

13.7

अ॒भि गो॒त्राणि॒ सह॑सा॒ गाह॑मानोऽदा॒य उ॒ग्रः श॒तम॑न्यु॒रिन्द्रः॑ ।
दु॒श्च्य॒व॒नः पृ॑तना॒षाड॑यो॒ध्यो३ऽस्माकं॒ सेना॑ अवतु॒ प्र यु॒त्सु ॥७॥

Abhi gotrani sahasa gahamanodaya ugrah shatamanyurindrah
Dushchyavanah pritanashadayodhyo3smakam sena avatu pra yutsu

13.8

बृह॑स्पते॒ परि॑ दीया॒ रथे॑न रक्षो॒हामित्राँ॑ अप॒बाध॑मानः ।
प्र॒भ॒ञ्जंछत्रू॑न् प्रमृ॒णन्न॒मित्रा॑न॒स्माक॑मेध्यवि॒ता त॒नूना॑म् ॥८॥

Brihaspate pari diya rathena rakshohamitram apabadhamanah
Prabhanjanchhatrun pramrinannamitranasmakamedhyavita tanunam

13.9

इन्द्र॑ एषां ने॒ता बृह॒स्पति॒र्दक्षि॑णा य॒ज्ञः पु॒र ए॑तु॒ सोमः॑ ।
दे॒व॒से॒नाना॑मभिभञ्जती॒नां जय॑न्तीनां म॒रुतो॑ यन्तु॒ मध्ये॑ ॥९॥

Indra esham neta brihaspatirdakshina yagyah pura etu somah
Devasenanamabhibhanjatinam jayantinam maruto yantu madhye

13.10

इन्द्र॑स्य॒ वृष्णो॒ वरु॑णस्य॒ राज्ञ॑ आदि॒त्यानां॑ म॒रुतां॒ शर्ध॑ उ॒ग्रम्।
म॒हाम॑नसां भुवनच्य॒वानां॒ घोषो॑ दे॒वानां॒ जय॑ता॒मुद॑स्थात् ॥१०॥

Indrasya vrishno varunasya ragya adityanam marutam shardha ugram
Mahamanasam bhuvanachyavanam ghosho devanam jayatamudasthat

13.11

अ॒स्माक॒मिन्द्रः॒ समृ॑तेषु ध्व॒जेष्व॒स्माक॒ या इष॑व॒स्ता ज॑यन्तु ।
अ॒स्माकं॑ वी॒रा उत्त॑रे भवन्त्व॒स्मान् दे॑वासोऽवता॒ हवे॑षु ॥११॥

Asmakamindrah samriteshu dhvajeshvasmaka ya ishavasta jayantu
Asmakam vira uttare bhavantvasman devasovata haveshu