সূক্ত 2

2.1

বিবাহ-প্রকরণম্। ১-৭৫ সূর্যা সাবিত্রী। আত্মা, ১০ যক্ষমনাশী, ১১ দম্পত্যো পরিপন্থিনাশনী, ৩৬ দেবাঃ। অনুষ্টুপ্, ৫-৬, ১২, ৩১, ৩৭, ৩৯-৪০ জগতী (৩৭,৩৯ ভুরিক্ ত্রিষ্টুপ্), ৯ ত্র্যবসানা ষট্-পদা বিরাডত্যষ্টিঃ, ১৩-১৪, ১৭-১৯, ৩৪, ৩৬, ৩৮, ৪১-৪২, ৪৯, ৬১, ৭০,৭৪-৭৫ ত্রিষ্টুপ্, ১৫, ৫১ ভুরিক্, ২০পুরস্তাদ্বৃহতী, ১৩, ২৪-২৫, ৩২-৩৩ পুরোবৃহতী (২৬ ত্রিপদাবিরাণ্নাম গায়ত্রী), ৩৩ বিরাডাস্তারপঙ্ক্তিঃ, ৩৫ পুরোবৃহতী ত্রিষ্টুপ্, ৪৩ ত্রিষ্টুব্গর্ভা পঙ্ক্তিঃ ৪৪ প্রস্তারপঙ্ক্তিঃ, ৪৭ পথ্যাবৃহতী, ৪৮ সতঃ পঙ্ক্তিঃ, ৫০ উপরিষ্টাদ্বৃহতী

তুভ্যমগ্রে পর্যবহন্ত্সূর্যাং বহতুনা সহ।
স নঃ পতিভ্যো জায়াং দা অগ্নে প্রজয়া সহ ॥১॥

2.2

পুনঃ পত্নীমগ্নিরদাদায়ুষা সহ বর্চসা ।
দীর্ঘায়ুরস্যা যঃ পতির্জীবাতি শরদঃ শতম্ ॥২॥

2.3

সোমস্য জায়া প্রথমং গন্ধর্বস্তেঽপরঃ পতিঃ ।
তৃতীয়ো অগ্নিষ্টে পতিস্তুরীয়স্তে মনুষ্যজাঃ ॥৩॥

2.4

সোমো দদদ্ গন্ধর্বায় গন্ধর্বো দদদগ্নয়ে ।
রয়িং চ পুত্রাংস্চাদাদগ্নির্মহ্যমথো ইমাম্ ॥৪॥

2.5

আ বামগন্ত্সুমতির্বাজিনীবসূ ন্যশ্বিনা হৃত্সু কামা অরংসত ।
অভূতং গোপা মিথুনা শুভস্পতী প্রিয়া অর্যম্ণো দুর্যাং অশীমহি ॥৫॥

2.6

সা মন্দসানা মনসা শিবেন রয়িং ধেহি সর্ববীরং বচস্যঽম্।
সুগং তীর্থং সুপ্রপাণং শুভস্পতী স্থাণুং পথিষ্ঠামপ দুর্মতিং হতম্ ॥৬॥

2.7

যা ওষধয়ো যা নদ্যো৩ যানি ক্ষেত্রাণি যা বনা ।
তাস্ত্বা বধু প্রজাবতীং পত্যে রক্ষন্তু রক্ষসঃ ॥৭॥

2.8

এমং পন্থামরুক্ষাম সুগং স্বস্তিবাহনম্।
যস্মিন্ বীরো ন রিষ্যত্যন্যেষাং বিন্দতে বসু ॥৮॥

2.9

ইদং সু মে নরঃ শৃণুত যয়াশিষা দংপতী বামমশ্নুতঃ ।
যে গন্ধর্বা অপ্সরসশ্চ দেবীরেষু বানস্পত্যেষু যেঽধি তস্থুঃ ।
স্যোনাস্তে অস্যৈ বধ্বৈ ভবন্তু মা হিংসিষুর্বহতুমুহ্যমানম্ ॥৯॥

2.10

যে বধ্বশ্চন্দ্রং বহতুং যক্ষ্মা যন্তি জনাঁ অনু ।
পুনস্তান্ যজ্ঞিয়া দেবা নয়ন্তু যত আগতাঃ ॥১০॥

2.11

মা বিদন্ পরিপন্থিনো য আসীদন্তি দংপতী ।
সুগেন দুর্গমতীতামপ দ্রান্ত্বরাতয়ঃ ॥১১॥

2.12

সং কাশয়ামি বহতুং ব্রহ্মণা গৃহৈরঘোরেণ চক্ষুষা মিত্রিয়েণ ।
পর্যাণদ্ধং বিশ্বরূপং যদস্তি স্যোনং পতিভ্যঃ সবিতা তৎ কৃণোতু ॥১২॥

2.13

শিবা নারীয়মস্তমাগন্নিমং ধাতা লোকমস্যৈ দিদেশ ।
তামর্যমা ভগো অশ্বিনোভা প্রজাপতিঃ প্রজয়া বর্ধয়ন্তু ॥১৩॥

2.14

আত্মন্বত্যুর্বরা নারীয়মাগন্ তস্যাং নরো বপত বীজমস্যাম্।
সা বঃ প্রজাং জনয়দ্ বক্ষণাভ্যো বিভ্রতী দুগ্ধমৃষভস্য রেতঃ ॥১৪॥

2.15

প্রতি তিষ্ঠ বিরাডসি বিষ্ণুরিবেহ সরস্বতি ।
সিনীবালি প্র জায়তাং ভগস্য সুমতাবসৎ ॥১৫॥

2.16

উদ্ ব ঊর্মিঃ শম্যা হন্ত্বাপো যোক্ত্রাণি মুঞ্চত ।
মাদুষ্কৃতৌ ব্যেনসাবঘ্ন্যাবশুনমারতাম্ ॥১৬॥

2.17

অঘোরচক্ষুরপতিঘ্নী স্যোনা শগ্মা সুশেবা সুয়মা গৃহেভ্যঃ ।
বীরসূর্দেবকামা সং ত্বয়ৈধিষীমহি সুমনস্যমানা ॥১৭॥

2.18

অদেবৃঘ্ন্যপতিঘ্নীহৈধি শিবা পশুভ্যঃ সুয়মা সুবর্চাঃ ।
প্রজাবতী বীরসূর্দেবকামা স্যোনেমমগ্নিং গার্হপত্যং সপর্য ॥১৮॥

2.19

উৎ তিষ্ঠেতঃ কিমিচ্ছন্তীদমাগা অহং ত্বেডে অভিভূঃ স্বাদ্ গৃহাৎ।
শূন্যৈষী নিরৃতে যাজগন্থোত্তিষ্ঠারাতে প্র পত মেহ রংস্থাঃ ॥১৯॥

2.20

যদা গার্হপত্যমসপর্যৈৎ পূর্বমগ্নিং বধূরিয়ম্।
অধা সরস্বত্যৈ নারি পিতৃভ্যশ্চ নমস্কুরু ॥২০॥

2.21

শর্ম বর্মৈতদা হরাস্যৈ নার্যা উপস্তিরে ।
সিনীবালি প্র জায়তাং ভগস্য সুমতাবসৎ ॥২১॥

2.22

যং বল্বজং ন্যস্যথ চর্ম চোপস্তৃণীথন ।
তদা রোহতু সুপ্রজা যা কন্যা বিন্দতে পতিম্ ॥২২॥

2.23

উপ স্তৃণীহি বল্বজমধি চর্মণি রোহিতে ।
তত্রোপবিশ্য সুপ্রজা ইমমগ্নিং সপর্যতু ॥২৩॥

2.24

আ রোহ চর্মোপ সীদাগ্নিমেষ দেবো হন্তি রক্ষাংসি সর্বা ।
ইহ প্রজাং জনয় পত্যে অস্মৈ সুজ্যৈষ্ঠ্যো ভবৎ পুত্রস্ত এষঃ ॥২৪॥

2.25

বি তিষ্ঠন্তাং মাতুরস্যা উপস্থান্নানারূপাঃ পশবো জায়মানাঃ ।
সুমঙ্গল্যুপ সীদেমমগ্নিং সংপত্নী প্রতি ভূষেহ দেবান্ ॥২৫॥

2.26

সুমঙ্গলী প্রতরণী গৃহাণাং সুশেবা পত্যে শ্বশুরায় শংভূঃ ।
স্যোনা শ্বশ্র্বৈ প্র গৃহান্ বিশেমান্ ॥২৬॥

2.27

স্যোনা ভব শ্বশুরেভ্যঃ স্যোনা পত্যে গৃহেভ্যঃ ।
স্যোনাস্যৈ সর্বস্যৈ বিশে স্যোনা পুষ্টায়ৈষাং ভব ॥২৭॥

2.28

সুমঙ্গলীরিয়ং বধূরিমাং সমেত পশ্যত ।
সৌভাগ্যমস্যৈ দত্ত্বা দৌর্ভাগ্যৈর্বিপরেতন ॥২৮॥

2.29

যা দুর্হার্দো যুবতয়ো যাশ্চেহ জরতীরপি ।
বর্চো ন্বস্যৈ সং দত্তাথাস্তং বিপরেতন ॥২৯॥

2.30

রুক্মপ্রস্তরণং বহ্যং বিশ্বা রূপাণি বিভ্রতম্।
আরোহৎ সূর্যা সাবিত্রী বৃহতে সৌভগায় কম্ ॥৩০॥

2.31

আ রোহ তল্পং সুমনস্যমানেহ প্রজাং জনয় পত্যে অস্মৈ।
ইন্দ্রাণীব সুবুধা বুধ্যমানা জ্যোতিরগ্রা উষসঃ প্রতি জাগরাসি ॥৩১॥

2.32

দেবা অগ্রে ন্যপদ্যন্ত পত্নীঃ সমস্পৃশন্ত তন্বঽস্তনূভিঃ ।
সূর্যেব নারি বিশ্বরূপা মহিত্বা প্রজাবতী পত্যা সং ভবেহ ॥৩২॥

2.33

উৎ তিষ্ঠেতো বিশ্বাবসো নমসেডামহে ত্বা ।
জামিমিচ্ছ পিতৃষদং ন্যক্তাং স তে ভাগো জনুষা তস্য বিদ্ধি ॥৩৩॥

2.34

অপ্সরসঃ সধমাদং মদন্তি হবির্ধানমন্তরা সূর্যং চ ।
তাস্তে জনিত্রমভি তাঃ পরেহি নমস্তে গন্ধর্বর্তুনা কৃণোমি ॥৩৪॥

2.35

নমো গন্ধর্বস্য নমসে নমো ভামায় চক্ষুষে চ কৃণ্মঃ ।
বিশ্বাবসো ব্রহ্মণা তে নমোঽভি জায়া অপ্সরসঃ পরেহি ॥৩৫॥

2.36

রায়া বয়ং সুমনসঃ স্যামোদিতো গন্ধর্বমাবীবৃতাম ।
অগন্ত্স দেবঃ পরমং সধস্থমগন্ম যত্র প্রতিরন্ত আয়ুঃ ॥৩৬॥

2.37

সং পিতরাবৃত্বিয়ে সৃজেথাং মাতা পিতা চ রেতসো ভবাথঃ ।
মর্য ইব যোষামধিরোহয়ৈনাং প্রজাং কৃণ্বাথামিহ পুষ্যতং রয়িম্ ॥৩৭॥

2.38

তাং পূষংছিবতমামেরয়স্ব যস্যাং বীজং মনুষ্যা৩বপন্তি ।
যা ন ঊরূ উশতী বিশ্রয়াতি যস্যামুশন্তঃ প্রহরেম শেপঃ ॥৩৮॥

2.39

আ রোহোরুমুপ ধত্স্ব হস্তং পরি ষ্বজস্ব জায়াং সুমনস্যমানঃ ।
প্রজাং কৃণ্বাথামিহ মোদমানৌ দীর্ঘং বামায়ুঃ সবিতা কৃণোতু ॥৩৯॥

2.40

আ বাং প্রজাং জনয়তু প্রজাপতিরহোরাত্রাভ্যাং সমনক্ত্বর্যমা।
অদুর্মঙ্গলী পতিলোকমা বিশেমং শং নো ভব দ্বিপদে শং চতুষ্পদে ॥৪০॥

2.41

দেবৈর্দত্তং মনুনা সাকমেতদ্ বাধূয়ং বাসো বধ্বঽশ্চ বস্ত্রম্।
যো ব্রহ্মণে চিকিতুষে দদাতি স ইদ্ রক্ষাংসি তল্পানি হন্তি ॥৪১॥

2.42

যং মে দত্তো ব্রহ্মভাগং বধূয়োর্বাধূয়ং বাসো বধ্বঽশ্চ বস্ত্রম্।
যুবং ব্রহ্মণেঽনুমন্যমানৌ বৃহস্পতে সাকমিন্দ্রশ্চ দত্তম্ ॥৪২॥

2.43

স্যোনাদ্যোনেরধি বধ্যমানৌ হসামুদৌ মহসা মোদমানৌ ।
সুগূ সুপুত্রৌ সুগৃহৌ তরাথো জীবাবুষসো বিভাতীঃ ॥৪৩॥

2.44

নবং বসানঃ সুরভিঃ সুবাসা উদাগাং জীব উষসো বিভাতীঃ ।
আণ্ডাৎ পতত্রীবামুক্ষি বিশ্বস্মাদেনসস্পরি ॥৪৪॥

2.45

শুম্ভনী দ্যাবাপৃথিবী অন্তিসুম্নে মহিব্রতে ।
আপঃ সপ্ত সুস্রুবুর্দেবীস্তা নো মুঞ্চন্ত্বংহসঃ ॥৪৫॥

2.46

সূর্যায়ৈ দেবেভ্যো মিত্রায় বরুণায় চ ।
যে ভূতস্য প্রচেতসস্তেভ্য ইদমকরং নমঃ ॥৪৬॥

2.47

য ঋতে চিদভিশ্রিষঃ পুরা জত্রুভ্য আতৃদঃ ।
সংধাতা সংধিং মঘবা পুরূবসুর্নিষ্কর্তা বিহ্রুতং পুনঃ ॥৪৭॥

2.48

অপাস্মৎ তম উচ্ছতু নীলং পিশঙ্গমুত লোহিতং যৎ।
নির্দহনী যা পৃষাতক্য১স্মিন্ তাং স্থাণাবধ্যা সজামি ॥৪৮॥

2.49

যাবতীঃ কৃত্যা উপবাসনে যাবন্তো রাজ্ঞো বরুণস্য পাশাঃ ।
ব্যৃদ্ধয়ো যা অসমৃদ্ধয়ো যা অস্মিন্ তা স্থাণাবধি সাদয়ামি ॥৪৯॥

2.50

যা মে প্রিয়তমা তনূঃ সা মে বিভায় বাসসঃ ।
তস্যাগ্রে ত্বং বনস্পতে নীবিং কৃণুষ্ব মা বয়ং রিষাম ॥৫০॥

2.51

যে অন্তা যাবতীঃ সিচো য ওতবো যে চ তন্তবঃ ।
বাসো যৎ পত্নীভিরুতং তন্নঃ স্যোনমুপ স্পৃশাৎ ॥৫১॥

2.52

উশতীঃ কন্যলা ইমাঃ পিতৃলোকাৎ পতিং যতীঃ ।
অব দীক্ষামসৃক্ষত স্বাহা ॥৫২॥

2.53

বৃহস্পতিনাবসৃষ্টাং বিশ্বে দেবা অধারয়ন্।
বর্চো গোষু প্রবিষ্টং যৎ তেনেমাং সং সৃজামসি ॥৫৩॥

2.54

বৃহস্পতিনাবসৃষ্টাং বিশ্বে দেবা অধারয়ন্।
তেজো গোষু প্রবিষ্টং যৎ তেনেমাং সং সৃজামসি ॥৫৪॥

2.55

বৃহস্পতিনাবসৃষ্টাং বিশ্বে দেবা অধারয়ন্।
ভজো গোষু প্রবিষ্টো যস্তেনেমাং সং সৃজামসি ॥৫৫॥

2.56

বৃহস্পতিনাবসৃষ্টাং বিশ্বে দেবা অধারয়ন্।
যশো গোষু প্রবিষ্টং যৎ তেনেমাং সং সৃজামসি ॥৫৬॥

2.57

বৃহস্পতিনাবসৃষ্টাং বিশ্বে দেবা অধারয়ন্।
পয়ো গোষু প্রবিষ্টং যৎ তেনেমাং সং সৃজামসি ॥৫৭॥

2.58

বৃহস্পতিনাবসৃষ্টাং বিশ্বে দেবা অধারয়ন্।
রসো গোষু প্রবিষ্টো যস্তেনেমাং সং সৃজামসি ॥৫৮॥

2.59

যদীমে কেশিনো জনা গৃহে তে সমনর্তিষূ রোদেন কৃণ্বন্তো৩ঘম্।
অগ্নিষ্ট্বা তস্মাদেনসঃ সবিতা চ প্র মুঞ্চতাম্ ॥৫৯॥

2.60

যদীয়ং দুহিতা তব বিকেশ্যরুদদ্ গৃহে রোদেন কৃণ্বত্য১ঘম্।
অগ্নিষ্ট্বা তস্মাদেনসঃ সবিতা চ প্র মুঞ্চতাম্ ॥৬০॥

2.61

যজ্জাময়ো যদ্ যুবতয়ো গৃহে তে সমনর্তিষূ রোদেন কৃণ্বতীরঘম্।
অগ্নিষ্ট্বা তস্মাদেনসঃ সবিতা চ প্র মুঞ্চতাম্ ॥৬১॥

2.62

যৎ তে প্রজায়াং পশুষু যদ্ বা গৃহেষু নিষ্ঠিতমঘকৃদ্ভিরঘং কৃতম্।
অগ্নিষ্ট্বা তস্মাদেনসঃ সবিতা চ প্র মুঞ্চতাম্ ॥৬২॥

2.63

ইয়ং নার্যুপ ব্রূতে পূল্যান্যাবপন্তিকা।
দীর্ঘায়ুরস্তু মে পতির্জীবাতি শরদঃ শতম্ ॥৬৩॥

2.64

ইহেমাবিন্দ্র সং নুদ চক্রবাকেব দংপতী ।
প্রজয়ৈনৌ স্বস্তকৌ বিশ্বমায়ুর্ব্যঽশ্নুতাম্ ॥৬৪॥

2.65

যদাসন্দ্যামুপধানে যদ্ বোপবাসনে কৃতম্।
বিবাহে কৃত্যাং যাং চক্রুরাস্নানে তাং নি দধ্মসি ॥৬৫॥

2.66

যদ্ দুষ্কৃতং যচ্ছমলং বিবাহে বহতৌ চ যৎ।
তৎ সংভলস্য কম্বলে মৃজ্মহে দুরিতং বয়ম্ ॥৬৬॥

2.67

সংভলে মলং সাদয়িত্বা কম্বলে দুরিতং বয়ম্।
অভূম যজ্ঞিয়াঃ শুদ্ধাঃ প্র ণ আয়ূংষি তারিষৎ ॥৬৭॥

2.68

কৃত্রিমঃ কণ্টকঃ শতদন্ য এষঃ ।
অপাস্যাঃ কেশ্যং মলমপ শীর্ষণ্যং লিখাৎ ॥৬৮॥

2.69

অঙ্গাদঙ্গাদ্ বয়মস্যা অপ যক্ষ্মং নি দধ্মসি ।
তন্মা প্রাপৎ পৃথিবীং মোত দেবান্ দিবং মা প্রাপদুর্ব১ন্তরিক্ষম্।
অপো মা প্রাপন্মলমেতদগ্নে যমং মা প্রাপৎ পিতৄংশ্চ সর্বান্ ॥৬৯॥

2.70

সং ত্বা নহ্যামি পয়সা পৃথিব্যাঃ সং ত্বা নহ্যামি পয়সৌষধীনাম্।
সং ত্বা নহ্যামি প্রজয়া ধনেন সা সংনদ্ধা সনুহি বাজমেমম্ ॥৭০॥

2.71

অমোঽহমস্মি সা ত্বং সামাহমস্ম্যৃক্ ত্বং দ্যৌরহং পৃথিবী ত্বম্।
তাবিহ সং ভবাব প্রজামা জনয়াবহৈ ॥৭১॥

2.72

জনিয়ন্তি নাবগ্রবঃ পুত্রিয়ন্তি সুদানবঃ ।
অরিষ্টাসূ সচেবহি বৃহতে বাজসাতয়ে ॥৭২॥

2.73

যে পিতরো বধূদর্শা ইমং বহতুমাগমন্।
তে অস্যৈ বধ্বৈ সংপত্ন্যৈ প্রজাবচ্ছর্ম যচ্ছন্তু ॥৭৩॥

2.74

যেদং পূর্বাগন্ রশনায়মানা প্রজামস্যৈ দ্রবিণং চেহ দত্ত্বা।
তাং বহন্ত্বগতস্যানু পন্থাং বিরাডিয়ং সুপ্রজা অত্যজৈষীৎ ॥৭৪॥

2.75

প্র বুধ্যস্ব সুবুধা বুধ্যমানা দীর্ঘায়ুত্বায় শতশারদায় ।
গৃহান্ গচ্ছ গৃহপত্নী যথাসো দীর্ঘং ত আয়ুঃ সবিতা কৃণোতু ॥৭৫॥