সূক্ত 1

1.1

বিবাহ- প্রকরণম্। ১-৬৪ সূর্যা সাবিত্রী। আত্মা; ১-৫ সোমঃ, ৬ স্ববিবাহঃ, ২৩ সোমার্কৌ, ২৪ চন্দ্রমাঃ, ২৫ নৃণাং বিবাহমন্ত্রাশিষঃ; ২৫,২৭ বধূবাসঃসংস্পর্শমোচনম। অনুষ্টুপ্, ১৪ বিরাট্ প্রস্তারপঙ্ক্তিঃ; ১৫ আস্তারপঙ্ক্তিঃ; ১৯-২০, ২৩-২৪, ৩১-৩৩,৩৭, ৩৯-৪০, ৪৫, ৪৭, ৪৯-৫০, ৫৩, ৫৬-৫৭, ৫৮-৫৯,৬১ ত্রিষ্টুপ্ (২৩,৩১,৪৫ বৃহতীগর্ভা), ২১, ৪৬, ৫৪,৬৪ জগতী (৫৪, ৬৪ ভুরিক্ ত্রিষ্টুপ্) ; ২৯, ৫৫ পুরস্তাদ্বৃহতী; ৩৪ প্রস্তারপঙ্ক্তিঃ; ৩৮ পুরোবৃহতী ত্রিপদা পরোষ্ণিক্; (৪৮ পথ্যাপঙ্ক্তিঃ) ৬০ পরাঽনুষ্টুপ্।

সত্যেনোত্তভিতা ভূমিঃ সূর্যেণোত্তভিতা দ্যৌঃ ।
ঋতেনাদিত্যাস্তিষ্ঠন্তি দিবি সোমো অধি শ্রিতঃ ॥১॥

1.2

সোমেনাদিত্যা বলিনঃ সোমেন পৃথিবী মহী।
অথো নক্ষত্রাণামেষামুপস্থে সোম আহিতঃ ॥২॥

1.3

সোমং মন্যতে পপিবান্ যৎ সংপিংষন্ত্যোষধিম্।
সোমং যং ব্রহ্মাণো বিদুর্ন তস্যাশ্নাতি পার্থিবঃ ॥৩॥

1.4

যৎ ত্বা সোম প্রপিবন্তি তত আ প্যায়সে পুনঃ ।
বায়ুঃ সোমস্য রক্ষিতা সমানাং মাস আকৃতিঃ ॥৪॥

1.5

আচ্ছদ্বিধানৈর্গুপিতো বার্হতৈঃ সোম রক্ষিতঃ ।
গ্রাব্ণামিচ্ছৃণ্বন্ তিষ্ঠসি ন তে অশ্নাতি পার্থিবঃ ॥৫॥

1.6

চিত্তিরা উপবর্হণং চক্ষুরা অভ্যঞ্জনম্।
দ্যৌর্ভূমিঃ কোশ আসীদ্ যদয়াৎ সূর্যা পতিম্ ॥৬॥

1.7

রৈভ্যাসীদনুদেয়ী নারাশংসী ন্যোচনী ।
সূর্যায়া ভদ্রমিদ্ বাসো গাথয়ৈতি পরিষ্কৃতা ॥৭॥

1.8

স্তোমা আসন্ প্রতিধয়ঃ কুরীরং ছন্দ ওপশঃ ।
সূর্যায়া অশ্বিনা বরাগ্নিরাসীৎ পুরোগবঃ ॥৮॥

1.9

সোমো বধূয়ুরভবদশ্বিনাস্তামুভা বরা।
সূর্যাং যৎ পত্যে শংসন্তীং মনসা সবিতাদদাৎ ॥৯॥

1.10

মনো অস্যা অন আসীদ্ দ্যৌরাসীদুত চ্ছদিঃ ।
শুক্রাবনড্বাহাবাস্তাং যদয়াৎ সূর্যা পতিম্ ॥১০॥

1.11

ঋক্সামাভ্যামভিহিতৌ গাবৌ তে সামনাবৈতাম্।
শ্রোত্রে তে চক্রে আস্তাং দিবি পন্থাশ্চরাচরঃ ॥১১॥

1.12

শুচী তে চক্রে যাত্যা ব্যানো অক্ষ আহতঃ ।
অনো মনস্ময়ং সূর্যারোহৎ প্রয়তী পতিম্ ॥১২॥

1.13

সূর্যায়া বহতুঃ প্রাগাৎ সবিতা যমবাসৃজৎ।
মঘাসু হন্যন্তে গাবঃ ফল্গুনীষু ব্যুঽহ্যতে ॥১৩॥

1.14

যদশ্বিনা পৃচ্ছমানাবয়াতং ত্রিচক্রেণ বহতুং সূর্যায়াঃ ।
ক্বৈকং চক্রং বামাসীৎ ক্বঽদেষ্ট্রায় তস্থথুঃ ॥১৪॥

1.15

যদয়াতং শুভস্পতী বরেয়ং সূর্যামুপ ।
বিশ্বে দেবা অনু তদ্ বামজানন্ পুত্রঃ পিতরমবৃণীত পূষা ॥১৫॥

1.16

দ্বে তে চক্রে সূর্যে ব্রহ্মাণ ঋতুথা বিদুঃ ।
অথৈকং চক্রং যদ্ গুহা তদদ্ধাতয় ইদ্ বিদুঃ ॥১৬॥

1.17

অর্যমণং যজামহে সুবন্ধুং পতিবেদনম্।
উর্বারুকমিব বন্ধনাৎ প্রেতো মুঞ্চামি নামুতঃ ॥১৭॥

1.18

প্রেতো মুঞ্চামি নামুতঃ সুবদ্ধামমুতস্করম্।
যথেয়মিন্দ্র মীঢ্বঃ সুপুত্রা সুভগাসতি ॥১৮॥

1.19

প্র ত্বা মুঞ্চামি বরুণস্য পাশাদ্ যেন ত্বাবধ্নাৎ সবিতা সুশেবাঃ ।
ঋতস্য যোনৌ সুকৃতস্য লোকে স্যোনং তে অস্তু সহসংভলায়ৈ ॥১৯॥

1.20

ভগস্ত্বেতো নয়তু হস্তগৃহ্যাশ্বিনা ত্বা প্র বহতাং রথেন ।
গৃহান্ গচ্ছ গৃহপত্নী যথাসো বশিনী ত্বং বিদথমা বদাসি ॥২০॥

1.21

ইহ প্রিয়ং প্রজায়ৈ তে সমৃধ্যতামস্মিন্ গৃহে গার্হপত্যায় জাগৃহি ।
এনা পত্যা তন্বং১ সং স্পৃশস্বাথ জির্বির্বিদথমা বদাসি ॥২১॥

1.22

ইহৈব স্তং মা বি যৌষ্টং বিশ্বমায়ুর্ব্যঽশ্নুতম্।
ক্রীডন্তৌ পুত্রৈর্নপ্তৃভির্মোদমানৌ স্বস্তকৌ ॥২২॥

1.23

পূর্বাপরং চরতো মায়য়ৈতৌ শিশূ ক্রীডন্তৌ পরি যাতোঽর্ণবম্।
বিশ্বান্যো ভুবনা বিচষ্ট ঋতূংরন্যো বিদধজ্জায়সে নবঃ ॥২৩॥

1.24

নবোনবো ভবসি জায়মানোঽহ্নাং কেতুরুষসামেষ্যগ্রম্।
ভাগং দেবেভ্যো বি দধাস্যায়ন্ প্র চন্দ্রমস্তিরসে দীর্ঘমায়ুঃ ॥২৪॥

1.25

পরা দেহি শামুল্যং ব্রহ্মভ্যো বি ভজা বসু ।
কৃত্যৈষা পদ্বতী ভূত্বা জায়া বিশতে পতিম্ ॥২৫॥

1.26

নীললোহিতং ভবতি কৃত্যাসক্তির্ব্যঽজ্যতে ।
এধন্তে অস্যা জ্ঞাতয়ঃ পতির্বন্ধেষু বধ্যতে ॥২৬॥

1.27

অশ্লীলা তনূর্ভবতি রুশতী পাপয়ামুয়া।
পতির্যদ্ বধ্বো৩বাসসঃ স্বমঙ্গমভ্যূর্ণুতে ॥২৭॥

1.28

আশসনং বিশসনমথো অধিবিকর্তনম্।
সূর্যায়াঃ পশ্য রূপাণি তানি ব্রহ্মোত শুম্ভতি ॥২৮॥

1.29

তৃষ্টমেতৎ কটুকমপাষ্ঠবদ্ বিষবন্নৈতদত্তবে ।
সূর্যাং যো ব্রহ্মা বেদ স ইদ্ বাধূয়মর্হতি ॥২৯॥

1.30

স ইৎ তৎ স্যোনং হরতি ব্রহ্মা বাসঃ সুমঙ্গলম্।
প্রায়শ্চিত্তিং যো অধ্যেতি যেন জায়া ন রিষ্যতি ॥৩০॥

1.31

যুবং ভগং সং ভরতং সমৃদ্ধমৃতং বদন্তাবৃতোদ্যেষু ।
ব্রহ্মণস্পতে পতিমস্যৈ রোচয় চারু সংভলো বদতু বাচমেতাম্ ॥৩১॥

1.32

ইহেদসাথ ন পরো গমাথেমং গাবঃ প্রজয়া বর্ধয়াথ ।
শুভং যতীরুস্রিয়াঃ সোমবর্চসো বিশ্বে দেবাঃ ক্রন্নিহ বো মনাংসি ॥৩২॥

1.33

ইমং গাবঃ প্রজয়া সং বিশাথায়ং দেবানাং ন মিনাতি ভাগম্।
অস্মৈ বঃ পূষা মরুতশ্চ সর্বে অস্মৈ বো ধাতা সবিতা সুবাতি ॥৩৩॥

1.34

অনৃক্ষরা ঋজবঃ সন্তু পন্থনো যেভিঃ সখায়ো যন্তি নো বরেয়ম্।
সং ভগেন সমর্যম্ণা সং ধাতা সৃজতু বর্চসা ॥৩৪॥

1.35

যচ্চ বর্চো অক্ষেষু সুরায়াং চ যদাহিতম্।
যদ্ গোষ্বশ্বিনা বর্চস্তেনেমাং বর্চসাবতম্ ॥৩৫॥

1.36

যে ন মহানঘ্ন্যা জঘনমশ্বিনা যেন বা সুরা ।
যেনাক্ষা অভ্যষিচ্যন্ত তেনেমাং বর্চসাবতম্ ॥৩৬॥

1.37

যো অনিধ্মো দীদয়দপ্স্ব১ন্তর্যং বিপ্রাস ঈডতে অধ্বরেষু ।
অপাং নপান্মধুমতীরপো দা যাভিরিন্দ্রো বাবৃধে বীর্যাঽবান্ ॥৩৭॥

1.38

ইদমহং রুশন্তং গ্রাভং তনূদূষিমপোহামি ।
যো ভদ্রো রোচনস্তমুদচামি ॥৩৮॥

1.39

আস্যৈ ব্রাহ্মণাঃ স্নপনীর্হরন্ত্ববীরঘ্নীরুদজন্ত্বাপঃ ।
অর্যম্ণো অগ্নিং পর্যেতু পূষন্ প্রতীক্ষন্তে শ্বশুরো দেবরশ্চ ॥৩৯॥

1.40

শং তে হিরণ্যং শমু সন্ত্বাপঃ শং মেথির্ভবতু শং যুগস্য তর্দ্ম ।
শং ত আপঃ শতপবিত্রা ভবন্তু শমু পত্যা তন্বং১ সং স্পৃশস্ব ॥৪০॥

1.41

খে রথস্য খেঽনসঃ খে যুগস্য শতক্রতো ।
অপালামিন্দ্র ত্রিষ্পূত্বাকৃণোঃ সূর্যত্বচম্ ॥৪১॥

1.42

আশাসানা সৌমনসং প্রজাং সৌভাগ্যং রয়িম্।
পত্যুরনুব্রতা ভূত্বা সং নহ্যস্বামৃতায় কম্ ॥৪২॥

1.43

যথা সিন্ধুর্নদীনাং সাম্রাজ্যং সুষুবে বৃষা ।
এবা ত্বং সম্রাজ্ঞ্যেধি পত্যুরস্তং পরেত্য ॥৪৩॥

1.44

সম্রাজ্ঞ্যেধি শ্বশুরেষু সম্রাজ্ঞ্যুত দেবৃষু ।
ননান্দুঃ সম্রাজ্ঞ্যেধি সম্রাজ্ঞ্যুত শ্বশ্র্বাঃ ॥৪৪॥

1.45

যা অকৃন্তন্নবয়ন্ যাশ্চ তত্নিরে যা দেবীরন্তাং অভিতোঽদদন্ত ।
তাস্ত্বা জরসে সং ব্যয়ন্ত্বায়ুষ্মতীদং পরি ধত্স্ব বাসঃ ॥৪৫॥

1.46

জীবং রুদন্তি বি নয়ন্ত্যধ্বরং দীর্ঘামনু প্রসিতিং দীধ্যুর্নরঃ ।
বামং পিতৃভ্যো য ইদং সমীরিরে ময়ঃ পতিভ্যো জনয়ে পরিষ্বজে ॥৪৬॥

1.47

স্যোনং ধ্রুবং প্রজায়ৈ ধারয়ামি তেঽশ্মানং দেব্যাঃ পৃথিব্যা উপস্থে ।
তমা তিষ্ঠানুমাদ্যা সুবর্চা দীর্ঘং ত আয়ুঃ সবিতা কৃণোতু ॥৪৭॥

1.48

যে নাগ্নিরস্যা ভূম্যা হস্তং জগ্রাহ দক্ষিণম্।
তেন গৃহ্ণামি তে হস্তং মা ব্যথিষ্ঠা ময়া সহ প্রজয়া চ ধনেন চ ॥৪৮॥

1.49

দেবস্তে সবিতা হস্তং গৃহ্ণাতু সোমো রাজা সুপ্রজসং কৃণোতু ।
অগ্নিঃ সুভগাং জতবেদাঃ পত্যে পত্নীং জরদষ্টিং কৃণোতু ॥৪৯॥

1.50

গৃহ্ণামি তে সৌভগত্বায় হস্তং ময়া পত্যা জরদষ্টির্যথাসঃ ।
ভগো অর্যমা সবিতা পুরংধির্মহ্যং ত্বাদুর্গার্হপত্যায় দেবাঃ ॥৫০॥

1.51

ভগস্তে হস্তমগ্রহীৎ সবিতা হস্তমগ্রহীৎ।
পত্নী ত্বমসি ধর্মণাহং গৃহপতিস্তব ॥৫১॥

1.52

মমেয়মস্তু পোষ্যা মহ্যং ত্বাদাদ্ বৃহস্পতিঃ ।
ময়া পত্যা প্রজাবতি সং জীব শরদঃ শতম্ ॥৫২॥

1.53

ত্বষ্টা বাসো ব্যদধাচ্ছুভে কং বৃহস্পতেঃ প্রশিষা কবীনাম্।
তেনেমাং নারীং সবিতা ভগশ্চ সূর্যামিব পরি ধত্তাং প্রজয়া ॥৫৩॥

1.54

ইন্দ্রাগ্নী দ্যাবাপৃথিবী মাতরিশ্বা মিত্রাবরুণা ভগো অশ্বিনোভা।
বৃহস্পতির্মরুতো ব্রহ্ম সোম ইমাং নারীং প্রজয়া বর্ধয়ন্তু ॥৫৪॥

1.55

বৃহস্পতিঃ প্রথমঃ সূর্যায়াঃ শীর্ষে কেশাং অকল্পয়ৎ।
তেনেমামশ্বিনা নারীং পত্যে সং শোভয়ামসি ॥৫৫॥

1.56

ইদং তদ্ রূপং যদবস্ত যোষা জায়াং জিজ্ঞাসে মনসা চরন্তীম্।
তামন্বর্তিষ্যে সখিভির্নবগ্বৈঃ ক ইমান্ বিদ্বান্ বি চচর্ত পাশান্ ॥৫৬॥

1.57

অহং বি ষ্যামি ময়ি রূপমস্যা বেদদিৎ পশ্যন্ মনসঃ কুলায়ম্।
ন স্তেয়মদ্মি মনসোদমুচ্যে স্বয়ং শ্রথ্নানো বরুণস্য পাশান্ ॥৫৭॥

1.58

প্র ত্বা মুঞ্চামি বরুণস্য পাশাদ্ যেন ত্বাবধ্নাৎ সবিতা সুশেবাঃ ।
উরুং লোকং সুগমত্র পন্থাং কৃণোমি তুভ্যং সহপত্ন্যৈ বধু ॥৫৮॥

1.59

উদ্যচ্ছধ্বমপ রক্ষো হনাথেমং নারীং সুকৃতে দধাত ।
ধাতা বিপশ্চিৎ পতিমস্যৈ বিবেদ ভগো রাজা পুর এতু প্রজানন্ ॥৫৯॥

1.60

ভগস্ততক্ষ চতুরঃ পাদান্ ভগস্ততক্ষ চত্বার্যুষ্পলানি ।
ত্বষ্টা পিপেশ মধ্যতোঽনু বর্ধ্রান্ত্সা নো অস্তু সুমঙ্গলী ॥৬০॥

1.61

সুকিংশুকং বহতুং বিশ্বরূপং হিরণ্যবর্ণং সুবৃতং সুচক্রম্।
আ রোহ সূর্যে অমৃতস্য লোকং স্যোনং পতিভ্যো বহতুং কৃণু ত্বম্ ॥৬১॥

1.62

অভ্রাতৃঘ্নীং বরুণাপশুঘ্নীং বৃহস্পতে ।
ইন্দ্রাপতিঘ্নীং পুত্রিণীমাস্মভ্যং সবিতর্বহ ॥৬২॥

1.63

মা হিংসিষ্টং কুমার্যং১ স্থূণে দেবকৃতে পথি।
শালায়া দেব্যা দ্বারং স্যোনং কৃণ্মো বধূপথম্ ॥৬৩॥

1.64

ব্রহ্মাপরং যুজ্যতাং ব্রহ্ম পূর্বং ব্রহ্মান্ততো মধ্যতো ব্রহ্ম সর্বতঃ ।
অনাব্যাধাং দেবপুরাং প্রপদ্য শিবা স্যোনা পতিলোকে বি রাজ ॥৬৪॥