সূক্ত 10

10.1

বশা গৌঃ। ১-৩৪ কশ্যপঃ। বশা। অনুষ্টুপ্, ১ ককুম্মতী, ৫ পঞ্চপদা. স্কন্ধোগ্রীবী বৃহতী, ৬, ৮, ১০ বিরাট্, ২৩ বৃহতী, ২৪ উপরিষ্টাদ্ বৃহতী, ২৬ আস্তারপঙ্ক্তিঃ, ২৭ শংকুমতী, ২৯ ত্রিপদা বিরাড্ গায়ত্রী, ৩১ উষ্ণিগ্গর্ভা, ৩২ বিরাট্ পথ্যাবৃহতী।

নমস্তে জায়মানায়ৈ জাতায়া উত তে নমঃ ।
বালেভ্যঃ শফেভ্যো রূপায়াঘ্ন্যে তে নমঃ ॥১॥

10.2

যো বিদ্যাৎ সপ্ত প্রবতঃ সপ্ত বিদ্যাৎ পরাবতঃ ।
শিরো যজ্ঞস্য যো বিদ্যাৎ স বশাং প্রতি গৃহ্ণীয়াৎ ॥২॥

10.3

বেদাহং সপ্ত প্রবতঃ সপ্ত বেদ পরাবতঃ ।
শিরো যজ্ঞস্যাহং বেদ সোমং চাস্যাং বিচক্ষণম্ ॥৩॥

10.4

যয়া দ্যৌর্যয়া পৃথিবী যয়াপো গুপিতা ইমাঃ।
বশাং সহস্রধারাং ব্রহ্মণাচ্ছাবদামসি ॥৪॥

10.5

শতং কংসাঃ শতং দোগ্ধারঃ শতং গোপ্তারো অধি পৃষ্ঠে অস্যাঃ ।
যে দেবাস্তস্যাং প্রাণন্তি তে বশাং বিদুরেকধা ॥৫॥

10.6

যজ্ঞপদীরাক্ষীরা স্বধাপ্রাণা মহীলুকা ।
বশা পর্জন্যপত্নী দেবাঁ অপ্যেতি ব্রহ্মণা ॥৬॥

10.7

অনু ত্বাগ্নিঃ প্রাবিশদনু সোমো বশে ত্বা ।
ঊধস্তে ভদ্রে পর্জন্যো বিদ্যুতস্তে স্তনা বশে ॥৭॥

10.8

অপস্ত্বং ধুক্ষে প্রথমা উর্বরা অপরা বশে ।
তৃতীয়ং রাষ্ট্রং ধুক্ষেঽন্নং ক্ষীরং বশে ত্বম্ ॥৮॥

10.9

যদাদিত্যৈর্হূয়মানোপাতিষ্ঠ ঋতবরি ।
ইন্দ্রঃ সহস্রং পাত্রান্ত্সোমং ত্বাপায়য়দ্ বশে ॥৯॥

10.10

যদনূচীন্দ্রমৈরাৎ ত্ব ঋষভোঽহ্বয়ৎ।
তস্মাৎ তে বৃত্রহা পয়ঃ ক্ষীরং ক্রুদ্ধোঽহরদ্ বশে ॥১০॥

10.11

যৎ তে ক্রুদ্ধো ধনপতিরা ক্ষীরমহরদ্ বশে ।
ইদং তদদ্য নাকস্ত্রিষু পাত্রেষু রক্ষতি ॥১১॥

10.12

ত্রিষু পাত্রেষু তং সোমমা দেব্যঽহরদ্ বশা।
অথর্বা যত্র দীক্ষিতো বর্হিষ্যাস্ত হিরণ্যয়ে ॥১২॥

10.13

সং হি সোমেনাগত সমু সর্বেণ পদ্বতা ।
বশা সমুদ্রমধ্যষ্ঠাদ্ গন্ধর্বৈঃ কলিভিঃ সহ ॥১৩॥

10.14

সং হি বাতেনাগত সমু সর্বৈঃ পতত্রিভিঃ ।
বশা সমুদ্রে প্রানৃত্যদৃচঃ সামানি বিভ্রতী ॥১৪॥

10.15

সং হি সূর্যেণাগত সমু সর্বেণ চক্ষুষা ।
বশা সমুদ্রমত্যখ্যদ্ ভদ্রা জ্যোতীংষি বিভ্রতী ॥১৫॥

10.16

অভীবৃতা হিরণ্যেন যদতিষ্ঠ ঋতাবরি ।
অশ্বঃ সমুদ্রো ভূত্বাধ্যস্কন্দদ্ বশে ত্বা ॥১৬॥

10.17

তদ্ ভদ্রাঃ সমগচ্ছন্ত বশা দেষ্ট্র্যথো স্বধা।
অথর্বা যত্র দীক্ষিতো বর্হিষ্যাস্ত হিরণ্যয়ে ॥১৭॥

10.18

বশা মাতা রাজন্যঽস্য বশা মাতা স্বধে তব ।
বশায়া যজ্ঞ আয়ুধং ততশ্চিত্তমজায়ত ॥১৮॥

10.19

ঊর্ধ্বো বিন্দুরুদচরদ্ ব্রহ্মণঃ ককুদাদধি ।
ততস্ত্বং জজ্ঞিষে বশে ততো হোতাজায়ত ॥১৯॥

10.20

আস্নস্তে গাথা অভবন্নুষ্ণিহাভ্যো বলং বশে ।
পাজস্যাঽজ্জজ্ঞে যজ্ঞ স্তনেভ্যো রশ্ময়স্তব ॥২০॥

10.21

ঈর্মাভ্যাময়নং জাতং সক্থিভ্যাং চ বশে তব ।
আন্ত্রেভ্যো জজ্ঞিরে অত্রা উদরাদধি বীরুধঃ ॥২১॥

10.22

যদুদরং বরুণস্যানুপ্রাবিশথা বশে ।
ততস্ত্বা ব্রহ্মোদহ্বয়ৎ স হি নেত্রমবেৎ তব ॥২২॥

10.23

সর্বে গর্ভাদবেপন্ত জায়মানাদসূস্বঃ ।
সসূব হি তামাহুবশেতি ব্রহ্মভিঃ ক্লৃপ্তঃ স হ্যঽস্যা বন্ধুঃ ॥২৩॥

10.24

যুধ একঃ সং সৃজতি যো অস্যা এক ইদ্ বশী।
তরাংসি যজ্ঞা অভবন্ তরসাং চক্ষুরভবদ্ বশা ॥২৪॥

10.25

বশা যজ্ঞং প্রত্যগৃহ্ণাদ্ বশা সূর্যমধারয়ৎ।
বশায়ামন্তরবিশদোদনো ব্রহ্মণা সহ ॥২৫॥

10.26

বশামেবামৃতমাহুর্বশাং মৃত্যুমুপাসতে ।
বশেদং সর্বমভবদ্ দেবা মনুষ্যা৩ অসুরাঃ পিতর ঋষয়ঃ ॥২৬॥

10.27

য এবং বিদ্যাৎ স বশাং প্রতি গৃহ্ণীয়াৎ।
তথা হি যজ্ঞঃ সর্বপাদ্ দুহে দাত্রেঽনপস্ফুরন্ ॥২৭॥

10.28

তিস্রো জিহ্বা বরুণস্যান্তর্দীদ্যত্যাসনি ।
তাসাং যা মধ্যে রাজতি সা বশা দুষ্প্রতিগ্রহা ॥২৮॥

10.29

চতুর্ধা রেতো অভবদ্ বশায়াঃ ।
আপস্তুরীয়মমৃতং তুরীয়ং যজ্ঞস্তুরীয়ং পশবস্তুরীয়ম্ ॥২৯॥

10.30

বশা দ্যৌর্বশা পৃথিবী বশা বিষ্ণুঃ প্রজাপতিঃ ।
বশায়া দুগ্ধমপিবন্ত্সাধ্যা বসবশ্চ যে ॥৩০॥

10.31

বশায়া দুগ্ধং পীত্বা সাধ্যা বসবশ্চ যে ।
তে বৈ ব্রধ্নস্য বিষ্টপি পয়ো অস্যা উপাসতে ॥৩১॥

10.32

সোমমেনামেকে দুহ্রে ঘৃতমেক উপাসতে ।
য এবং বিদুষে বশাং দদুস্তে গতাস্ত্রিদিবং দিবঃ ॥৩২॥

10.33

ব্রাহ্মণেভ্যো বশাং দত্ত্বা সর্বাংল্লোকান্ত্সমশ্নুতে ।
ঋতং হ্যঽস্যামার্পিতমপি ব্রহ্মাথো তপঃ ॥৩৩॥

10.34

বশাং দেবা উপ জীবন্তি বশাং মনুষ্যাঽউত।
বশেদং সর্বমভবদ্ যাবৎ সূর্যো বিপশ্যতি ॥৩৪॥