सूक्त 28

28.1

६ प्रियमेध आङ्गिरसः । पवमानः सोमः । गायत्री ।

ए॒ष वा॒जी हि॒तो नृभि॑र्विश्व॒विन्मन॑स॒स्पति॑ः । अव्यो॒ वारं॒ वि धा॑वति ॥१॥

28.2

ए॒ष प॒वित्रे॑ अक्षर॒त्सोमो॑ दे॒वेभ्य॑ः सु॒तः । विश्वा॒ धामा॑न्यावि॒शन् ॥२॥

28.3

ए॒ष दे॒वः शु॑भाय॒तेऽधि॒ योना॒वम॑र्त्यः । वृ॒त्र॒हा दे॑व॒वीत॑मः ॥३॥

28.4

ए॒ष वृषा॒ कनि॑क्रदद्द॒शभि॑र्जा॒मिभि॑र्य॒तः । अ॒भि द्रोणा॑नि धावति ॥४॥

28.5

ए॒ष सूर्य॑मरोचय॒त्पव॑मानो॒ विच॑र्षणिः । विश्वा॒ धामा॑नि विश्व॒वित् ॥५॥

28.6

ए॒ष शु॒ष्म्यदा॑भ्य॒ः सोम॑ः पुना॒नो अ॑र्षति । दे॒वा॒वीर॑घशंस॒हा ॥६॥