सूक्त 13

13.1

९ काश्यपोऽसितो देवलो वा । पवमानः सोमः । गायत्री ।

सोम॑ः पुना॒नो अ॑र्षति स॒हस्र॑धारो॒ अत्य॑विः । वा॒योरिन्द्र॑स्य निष्कृ॒तम् ॥१॥

पव॑मानमवस्यवो॒ विप्र॑म॒भि प्र गा॑यत । सु॒ष्वा॒णं दे॒ववी॑तये ॥२॥

पव॑न्ते॒ वाज॑सातये॒ सोमा॑ः स॒हस्र॑पाजसः । गृ॒णा॒ना दे॒ववी॑तये ॥३॥

उ॒त नो॒ वाज॑सातये॒ पव॑स्व बृह॒तीरिष॑ः । द्यु॒मदि॑न्दो सु॒वीर्य॑म् ॥४॥

ते न॑ः सह॒स्रिणं॑ र॒यिं पव॑न्ता॒मा सु॒वीर्य॑म् । सु॒वा॒ना दे॒वास॒ इन्द॑वः ॥५॥

अत्या॑ हिया॒ना न हे॒तृभि॒रसृ॑ग्रं॒ वाज॑सातये । वि वार॒मव्य॑मा॒शव॑ः ॥६॥

वा॒श्रा अ॑र्ष॒न्तीन्द॑वो॒ऽभि व॒त्सं न धे॒नव॑ः । द॒ध॒न्वि॒रे गभ॑स्त्योः ॥७॥

जुष्ट॒ इन्द्रा॑य मत्स॒रः पव॑मान॒ कनि॑क्रदत् । विश्वा॒ अप॒ द्विषो॑ जहि ॥८॥

अ॒प॒घ्नन्तो॒ अरा॑व्ण॒ः पव॑मानाः स्व॒र्दृश॑ः । योना॑वृ॒तस्य॑ सीदत ॥९॥