सूक्त 158

158.1

५ चक्षुः सौर्यः। सूर्यः। गायत्री, २ स्वराट्।

सूर्यो॑ नो दि॒वस्पा॑तु॒ वातो॑ अ॒न्तरि॑क्षात् । अ॒ग्निर्न॒ः पार्थि॑वेभ्यः ॥१॥

158.2

जोषा॑ सवित॒र्यस्य॑ ते॒ हर॑ः श॒तं स॒वाँ अर्ह॑ति । पा॒हि नो॑ दि॒द्युत॒ः पत॑न्त्याः ॥२॥

158.3

चक्षु॑र्नो दे॒वः स॑वि॒ता चक्षु॑र्न उ॒त पर्व॑तः । चक्षु॑र्धा॒ता द॑धातु नः ॥३॥

158.4

चक्षु॑र्नो धेहि॒ चक्षु॑षे॒ चक्षु॑र्वि॒ख्यै त॒नूभ्य॑ः । सं चे॒दं वि च॑ पश्येम ॥४॥

158.5

सु॒सं॒दृशं॑ त्वा व॒यं प्रति॑ पश्येम सूर्य । वि प॑श्येम नृ॒चक्ष॑सः ॥५॥