Adhyaya 8

8.1

उ॒प॒या॒मगृ॑हीतोऽस्यादि॒त्येभ्य॑स्त्वा । विष्ण॑ उरुगायै॒ष ते॒ सोम॒स्तᳪ र॑क्षस्व॒ मा त्वा॑ दभन् ॥१॥

Upayamagrihitosyadityebhyastva, vishna urugayaisha te somastam rakshasva ma tva dabhan

8.2

क॒दा च॒न स्त॒रीर॑सि॒ नेन्द्र॑ सश्चसि दा॒शुषे॑ ।
उपो॒पेन्नु म॑घव॒न् भूय॒ इन्नु ते॒ दानं॑ दे॒वस्य॑ पृच्यत आदि॒त्येभ्य॑स्त्वा ॥२॥

Kada chana starirasi nendra sashchasi dashushe
Upopennu maghavan bhuya innu te danam devasya prichyata adityebhyastva

8.3

क॒दा च॒न प्र यु॑च्छस्यु॒भे नि पा॑सि॒ जन्म॑नी ।
तुरी॑यादित्य॒ सव॑नं त इन्द्रि॒यमात॑स्थाव॒मृतं॑ दि॒व्या॒दि॒त्येभ्य॑स्त्वा ॥३॥

Kada chana pra yuchchhasyubhe ni pasi janmani
Turiyaditya savanam ta indriyamatasthavamritam divyadityebhyastva

8.4

य॒ज्ञो दे॒वानां॒ प्रत्ये॑ति सु॒म्नमादि॑त्यासो॒ भव॑ता मृड॒यन्त॑ः ।
आ वो॒ऽर्वाची॑ सुम॒तिर्व॑वृत्याद॒होश्चि॒द्या व॑रिवो॒वित्त॒रास॑दादि॒त्येभ्य॑स्त्वा ॥४॥

Yagyo devanam pratyeti sumnamadityaso bhavata mridayantah
A vorvachi sumatirvavrityadahoshchidya varivovittarasadadityebhyastva

8.5

विव॑स्वन्नादित्यै॒ष ते॑ सोमपी॒थस्तस्मि॑न् मत्स्व ।
श्रद॑स्मै नरो॒ वच॑से दधातन॒ यदा॑शी॒र्दा दम्प॑ती वा॒मम॑श्नु॒तः ।
पुमा॑न् पु॒त्रो जा॑यते वि॒न्दते॒ वस्वधा॑ वि॒श्वाहा॑र॒प ए॑धते गृ॒हे ॥५॥

Vivasvannadityaisha te somapithastasmin matsva
Shradasmai naro vachase dadhatana yadashirda dampati vamamashnutah
Puman putro jayate vindate vasvadha vishvaharapa edhate grihe

8.6

वा॒मम॒द्य स॑वितर्वा॒ममु॒ श्वो दि॒वे दि॑वे वा॒मम॒स्मभ्य॑ᳪ सावीः ।
वा॒मस्य॒ हि क्षय॑स्य देव॒ भूरे॑र॒या धि॒या वा॑म॒भाज॑ः स्याम ॥६॥

Vamamadya savitarvamamu shvo dive dive vamamasmabhyam savih
Vamasya hi kshayasya deva bhureraya dhiya vamabhajah syama

8.7

उ॒प॒या॒मगृ॑हीतोऽसि सावि॒त्रो॒ऽसि चनो॒धाश्च॑नो॒धा अ॑सि॒ चनो॒ मयि॑ धेहि ।
जिन्व॑ य॒ज्ञं जिन्व॑ य॒ज्ञप॑तिं॒ भगा॑य दे॒वाय॑ त्वा सवि॒त्रे ॥७॥

Upayamagrihitosi savitrosi chanodhashchanodha asi chano mayi dhehi
Jinva yagyam jinva yagyapatim bhagaya devaya tva savitre

8.8

उ॒प॒या॒मगृ॑हीतोऽसि सु॒शर्मा॑ऽसि सुप्रतिष्ठा॒नो बृ॒हदु॑क्षाय॒ नम॑ः ।
विश्वे॑भ्यस्त्वा दे॒वेभ्य॑ ए॒ष ते॒ योनि॒र्विश्वे॑भ्यस्त्वा दे॒वेभ्य॑ः ॥८॥

Upayamagrihitosi susharmasi supratishthano brihadukshaya namah
Vishvebhyastva devebhya esha te yonirvishvebhyastva devebhyah

उ॒प॒या॒मगृ॑हीतोऽसि॒ बृह॒स्पति॑सुतस्य देव सोम त॒ इन्दो॑रिन्द्रि॒याव॑त॒ः पत्नी॑वतो॒ ग्रहाँ॑२ ऋध्यासम् ।
अ॒हं प॒रस्ता॑द॒हम॒वस्ता॒द्यद॒न्तरि॑क्षं॒ तदु॑ मे पि॒ताऽभू॑त् ।
अ॒हᳪ सूर्य॑मुभ॒यतो॑ ददर्शा॒हं दे॒वानां॑ पर॒मं गुहा॒ यत् ॥९॥

Upayamagrihitosi brihaspatisutasya deva soma ta indorindriyavatah patnivato grahan2 ridhyasam
Aham parastadahamavastadyadantariksham tadu me pitabhut
Aham suryamubhayato dadarshaham devanam paramam guha yat

8.10

अग्ना३इ॒ पत्नी॑वन्त्स॒जूर्दे॒वेन॒ त्वष्ट्रा॒ सोमं॑ पिब॒ स्वाहा॑ ।
प्र॒जाप॑ति॒र्वृषा॑ऽसि रेतो॒धा रेतो॒ मयि॑ धेहि प्र॒जाप॑तेस्ते॒ वृष्णो॑ रेतो॒धसो॑ रेतो॒धाम॑शीय ॥१०॥

Agna3i patnivantsajurdevena tvashtra somam piba svaha
Prajapatirvrishasi retodha reto mayi dhehi prajapateste vrishno retodhaso retodhamashiya

8.11

उ॒प॒या॒मगृ॑हीतोऽसि॒ हरि॑रसि हारियोज॒नो हरि॑भ्यां त्वा । हर्यो॑र्धा॒ना स्थ॑ स॒हसो॑मा॒ इन्द्रा॑य ॥११॥

Upayamagrihitosi harirasi hariyojano haribhyam tva, haryordhana stha sahasoma indraya

8.12

यस्ते॑ अश्व॒सनि॑र्भ॒क्षो यो गो॒सनि॒स्तस्य॑ त इ॒ष्टय॑जुष स्तु॒तसो॑मस्य श॒स्तोक्थ॒स्योप॑हूत॒स्योप॑हूतो भक्षयामि ॥१२॥

Yaste ashvasanirbhaksho yo gosanistasya ta ishtayajusha stutasomasya shastokthasyopahutasyopahuto bhakshayami

8.13

दे॒वकृ॑त॒स्यैन॑सोऽव॒यज॑नमसि मनु॒ष्य॒कृत॒स्यैन॑सोऽव॒यज॑नमसि पि॒तृकृ॑त॒स्यैन॑सोऽव॒यज॑नमस्या॒त्मकृ॑तस्यैनसोऽव॒यज॑नम॒स्येन॑स एनसोऽव॒यज॑नमसि ।
यच्चा॒हमेनो॑ वि॒द्वाँश्च॒कार॒ यच्चावि॑द्वाँ॒स्तस्य॒ सर्वस्यैन॑सोऽव॒यज॑नमसि ॥१३॥

Devakritasyainasovayajanamasi manushyakritasyainasovayajanamasi pitrikritasyainasovayajanamasyatmakritasyainasovayajanamasyenasa enasovayajanamasi
Yachchahameno vidvanshchakara yachchavidvanstasya sarvasyainasovayajanamasi

8.14

सं वर्च॑सा॒ पय॑सा॒ सं त॒नूभि॒रग॑न्महि॒ मन॑सा॒ सᳪ शि॒वेन॑ ।
त्वष्टा॑ सु॒दत्रो॒ वि द॑धातु॒ रायोऽनु॑मार्ष्टु त॒न्वो यद्विलि॑ष्टम् ॥१४॥

Sam varchasa payasa sam tanubhiraganmahi manasa sam shivena
Tvashta sudatro vi dadhatu rayonumarshtu tanvo yadvilishtam

8.15

समि॑न्द्र णो॒ मन॑सा नेषि॒ गोभि॒ः सᳪ सू॒रिभि॑र्मघव॒न्त्सᳪ स्व॒स्त्या ।
सं ब्रह्म॑णा दे॒वकृ॑तं॒ यदस्ति॒ सं दे॒वाना॑ᳪ सुम॒तौ य॒ज्ञिया॑ना॒ᳪ स्वाहा॑ ॥१५॥

Samindra no manasa neshi gobhih sam suribhirmaghavantsam svastya
Sam brahmana devakritam yadasti sam devanam sumatau yagyiyanam svaha

8.16

सं वर्च॑सा॒ पय॑सा॒ सं त॒नूभि॒रग॑न्महि॒ मन॑सा॒ सᳪ शि॒वेन॑ ।
त्वष्टा॑ सु॒दत्रो॒ वि द॑धातु॒ रायोऽनु॑मार्ष्टु त॒न्वो यद्विलि॑ष्टम् ॥१६॥

Sam varchasa payasa sam tanubhiraganmahi manasa sam shivena
Tvashta sudatro vi dadhatu rayonumarshtu tanvo yadvilishtam

8.17

धा॒ता रा॒तिः स॑वि॒तेदं जु॑षन्तां प्र॒जाप॑तिर्निधि॒पा दे॒वो अ॒ग्निः ।
त्वष्टा॒ विष्णु॑ः प्र॒जया॑ सᳪररा॒णा यज॑मानाय॒ द्रवि॑णं दधात॒ स्वाहा॑ ॥१७॥

Dhata ratih savitedam jushantam prajapatirnidhipa devo agnih
Tvashta vishnuh prajaya sanrarana yajamanaya dravinam dadhata svaha

8.18

सु॒गा वो॑ देवा॒ः सद॑ना अकर्म॒ य आ॑ज॒ग्मेदᳪ सव॑नं जुषा॒णाः ।
भर॑माणा॒ वह॑माना ह॒वीᳪष्य॒स्मे ध॑त्त वसवो॒ वसू॑नि॒ स्वाहा॑ ॥१८॥

Suga vo devah sadana akarma ya ajagmedam savanam jushanah
Bharamana vahamana havinshyasme dhatta vasavo vasuni svaha

8.19

याँ२ आऽव॑ह उश॒तो दे॑व दे॒वाँस्तान् प्रेर॑य॒ स्वे अ॑ग्ने स॒धस्थे॑ ।
ज॒क्षि॒वाᳪस॑ः पपि॒वाjस॑श्च॒ विश्वेऽसुं॑ घ॒र्मᳪ स्व॒राति॑ष्ठ॒तानु॒ स्वाहा॑ ॥१९॥

Yan2 avaha ushato deva devanstan preraya sve agne sadhasthe
Jakshivansah papivajsashcha vishvesum gharmam svaratishthatanu svaha

8.20

व॒यᳪ हि त्वा॑ प्रय॒ति य॒ज्ञे अ॒स्मिन्न॑ग्ने॒ होता॑र॒मवृ॑णीमही॒ह ।
ऋध॑गया॒ ऋध॑गु॒ताश॑मिष्ठाः प्रजा॒नन् य॒ज्ञमुप॑ याहि वि॒द्वान्त्स्वाहा॑ ॥२०॥

Vayam hi tva prayati yagye asminnagne hotaramavrinimahiha
Ridhagaya ridhagutashamishthah prajanan yagyamupa yahi vidvantsvaha

8.21

देवा॑ गातुविदो गा॒तुं वि॒त्त्वा गा॒तुमि॑त । मन॑सस्पत इ॒मं दे॑व य॒ज्ञᳪ स्वाहा॒ वाते॑ धाः ॥२१॥

Deva gatuvido gatum vittva gatumita, manasaspata imam deva yagyam svaha vate dhah

8.22

यज्ञ॑ य॒ज्ञं ग॑च्छ य॒ज्ञपतिं॑ गच्छ॒ स्वां योनिं॑ गच्छ॒ स्वाहा॑ ।
ए॒ष ते॑ य॒ज्ञो य॑ज्ञपते स॒हसू॑क्तवाक॒ः सर्व॑वीर॒स्तं जु॑षस्व॒ स्वाहा॑ ॥२२॥

Yagya yagyam gachchha yagyapatim gachchha svam yonim gachchha svaha
Esha te yagyo yagyapate sahasuktavakah sarvavirastam jushasva svaha

8.23

माहि॑र्भू॒र्मा पृदा॑कुः । उ॒रुᳪ हि राजा॒ वरु॑णश्च॒कार॒ सूर्या॑य॒ पन्था॒मन्वे॑त॒वा उ॑ ।
अ॒पदे॒ पादा॒ प्रति॑धातवेऽकरु॒ताप॑व॒क्ता हृ॑दया॒विध॑श्चित् ।
नमो॒ वरु॑णाया॒भिष्ठि॑तो॒ वरु॑णस्य॒ पाश॑ः ॥२३॥

Mahirbhurma pridakuh, urum hi raja varunashchakara suryaya panthamanvetava u
Apade pada pratidhatavekarutapavakta hridayavidhashchit
Namo varunayabhishthito varunasya pashah

8.24

अ॒ग्नेरनी॑कम॒प आ वि॑वेशा॒पां नपा॑त् प्रति॒रक्ष॑न्नसु॒र्य॒म् ।
दमे॑दमे स॒मिधं॑ यक्ष्यग्ने॒ प्रति॑ ते जि॒ह्वा घृ॒तमुच्च॑रण्य॒त् स्वाहा॑ ॥२४॥

Agneranikamapa a viveshapam napat pratirakshannasuryam
Damedame samidham yakshyagne prati te jihva ghritamuchcharanyat svaha

8.25

स॒मु॒द्रे ते॒ हृद॑यम॒प्स्वन्तः सं त्वा॑ विश॒न्त्वोष॑धीरु॒ताप॑ः ।
य॒ज्ञस्य॑ त्वा यज्ञपते सू॒क्तोक्तौ॑ नमोवा॒के वि॑धेम॒ यत्स्वाहा॑ ॥२५॥

Samudre te hridayamapsvantah sam tva vishantvoshadhirutapah
Yagyasya tva yagyapate suktoktau namovake vidhema yatsvaha

8.26

देवी॑राप ए॒ष वो॒ गर्भ॒स्तᳪ सुप्री॑त॒ᳪ सुभृ॑तं बिभृत ।
देव॑ सोमै॒ष ते॑ लो॒कस्तस्मि॒ञ्छं च॒ वक्ष्व॒ परि॑ च॒ वक्ष्व॑ ॥२६॥

Devirapa esha vo garbhastam supritam subhritam bibhrita
Deva somaisha te lokastasminchham cha vakshva pari cha vakshva

8.27

अव॑भृथ निचुम्पुण निचे॒रुर॑सि निचुम्पु॒णः ।
अव॑ देवैर्दे॒वकृ॑त॒मेनो॑ऽयासिष॒मव॒ मर्त्यै॒र्मर्त्य॑कृतं पुरु॒राव्णो॑ देव रि॒षस्पा॑हि ।
दे॒वाना॑ᳪ स॒मिद॑सि ॥२७॥

Avabhritha nichumpuna nicherurasi nichumpunah
Ava devairdevakritamenoyasishamava martyairmartyakritam pururavno deva rishaspahi
Devanam samidasi

8.28

एज॑तु॒ दश॑मास्यो॒ गर्भो॑ ज॒रायु॑णा स॒ह । यथा॒ऽयं वा॒युरेज॑ति॒ यथा॑ समु॒द्र एज॑ति ।
ए॒वा॒यं दश॑मास्यो॒ अस्र॑ज्ज॒रायु॑णा स॒ह ॥२८॥

Ejatu dashamasyo garbho jarayuna saha, yathayam vayurejati yatha samudra ejati
Evayam dashamasyo asrajjarayuna saha

8.29

यस्यै॑ ते य॒ज्ञियो॒ गर्भो॒ यस्यै॒ योनि॑र्हिरण्यी ।
अङ्गा॒न्यह्रु॑ता॒ यस्य॒ तं मा॒त्रा सम॑जीगम॒ᳪ स्वाहा॑ ॥२९॥

Yasyai te yagyiyo garbho yasyai yonirhiranyi
Anganyahruta yasya tam matra samajigamam svaha

8.30

पुरुद॒स्मो विषु॑रूप॒ इन्दु॑र॒न्तर्म॑हि॒मान॑मानञ्ज॒ धीर॑ः ।
एक॑पदीं द्वि॒पदीं॑ त्रि॒पदीं॒ चतु॒ष्पदीम॒ष्टाप॑दीं॒ भुव॒नानु॑ प्रथन्ता॒ᳪ स्वाहा॑ ॥३०॥

Purudasmo vishurupa indurantarmahimanamananja dhirah
Ekapadim dvipadim tripadim chatushpadimashtapadim bhuvananu prathantam svaha

8.31

मरु॑तो॒ यस्य॒ हि क्षये॑ पा॒था दि॒वो वि॑महसः । स सु॑गो॒पात॑मो॒ जन॑ः ॥३१॥

Maruto yasya hi kshaye patha divo vimahasah, sa sugopatamo janah

8.32

म॒ही द्यौः पृ॑थि॒वी च॑ न इ॒मं य॒ज्ञं मि॑मिक्षताम् । पि॒पृ॒तां नो॒ भरी॑मभिः ॥३२॥

Mahi dyauh prithivi cha na imam yagyam mimikshatam, pipritam no bharimabhih

8.33

आ ति॑ष्ठ वृत्रह॒न्रथं॑ यु॒क्ता ते॒ ब्रह्म॑णा॒ हरी॑ । अ॒र्वा॒चीन॒ᳪ सु ते॒ मनो॒ ग्रावा॑ कृणोतु व॒ग्नुना॑ ।
उ॒प॒या॒मगृ॑हीतो॒ऽसीन्द्रा॑य त्वा षोड॒शिन॑ ए॒ष ते॒ योनि॒रिन्द्रा॑य त्वा षोड॒शिने॑ ॥३३॥

A tishtha vritrahanratham yukta te brahmana hari, arvachinam su te mano grava krinotu vagnuna
Upayamagrihitosindraya tva shodashina esha te yonirindraya tva shodashine

8.34

यु॒क्ष्वा हि के॒शिना॒ हरी॒ वृष॑णा कक्ष्य॒प्रा । अथा॑ न इन्द्र सोमपा गि॒रामुप॑श्रुतिं चर ।
उ॒प॒या॒मगृ॑हीतो॒ऽसीन्द्रा॑य त्वा षोड॒शिन॑ ए॒ष ते॒ योनि॒रिन्द्रा॑य त्वा षोड॒शिने॑ ॥३४॥

Yukshva hi keshina hari vrishana kakshyapra, atha na indra somapa giramupashrutim chara
Upayamagrihitosindraya tva shodashina esha te yonirindraya tva shodashine

8.35

इन्द्र॒मिद्धरी॑ वह॒तोऽप्र॑तिधृष्टशवसम् । ऋषी॑णां च स्तु॒तीरुप॑ य॒ज्ञं च॒ मानु॑षाणाम् ।
उ॒प॒या॒मगृ॑हीतो॒ सीन्द्रा॑य त्वा षोड॒शिने॑ ए॒ष ते॒ योनि॒रिन्द्रा॑य त्वा षोड॒शिने॑ ॥३५॥

Indramiddhari vahatopratidhrishtashavasam, rishinam cha stutirupa yagyam cha manushanam
Upayamagrihito sindraya tva shodashine esha te yonirindraya tva shodashine

8.36

यस्मा॒न्न जा॒तः परो॑ अ॒न्यो अस्ति॒ य आ॑वि॒वेश॒ भुव॑नानि॒ विश्वा॑ ।
प्र॒जाप॑तिः प्र॒जया॑ सᳪररा॒णस्त्रीणि॒ ज्योती॑ᳪषि सचते॒ स षो॑डशी ॥३६॥

Yasmanna jatah paro anyo asti ya avivesha bhuvanani vishva
Prajapatih prajaya sanraranastrini jyotinshi sachate sa shodashi

8.37

इन्द्र॑श्च स॒म्राड्वरु॑णश्च॒ राजा तौ ते भ॒क्षं च॑क्रतु॒रग्र॑ ए॒तम् ।
तयो॑र॒हमनु॑ भ॒क्षं भ॑क्षयामि॒ वाग्दे॒वी जु॑षा॒णा सोम॑स्य तृप्यतु स॒ह प्रा॒णेन॒ स्वाहा॑ ॥३७॥

Indrashcha samradvarunashcha raja tau te bhaksham chakraturagra etam
Tayorahamanu bhaksham bhakshayami vagdevi jushana somasya tripyatu saha pranena svaha

8.38

अग्ने॒ पव॑स्व॒ स्वपा॑ अ॒स्मे वर्च॑ः सु॒वीर्य॑म् । दध॑द्र॒यिं मयि॒ पोष॑म् ।
उ॒प॒या॒मगृ॑हीतोऽस्य॒ग्नये॑ त्वा॒ वर्च॑स ए॒ष ते॒ योनि॑र॒ग्नये॑ त्वा॒ वर्च॑से ।
अग्ने॑ वर्चस्वि॒न्वर्च॑स्वाँ॒स्त्वं दे॒वेष्वसि॒ वर्च॑स्वान॒हं म॑नु॒ष्ये॑षु भूयासम् ॥३८॥

Agne pavasva svapa asme varchah suviryam, dadhadrayim mayi posham
Upayamagrihitosyagnaye tva varchasa esha te yoniragnaye tva varchase
Agne varchasvinvarchasvanstvam deveshvasi varchasvanaham manushyeshu bhuyasam

8.39

उ॒त्तिष्ठ॒न्नोज॑सा स॒ह पी॒त्वी शिप्रे॑ अवेपयः । सोम॑मिन्द्र च॒मू सु॒तम् ।
उ॒प॒या॒मगृ॑हीतो॒ऽसीन्द्रा॑य॒ त्वौज॑स ए॒ष ते॒ योनि॒रिन्द्रा॑य त्वौजसे ।
इन्द्रौ॑जिष्ठौजि॑ष्ठ॒स्त्वं दे॒वेष्वस्योजि॑ष्ठो॒ऽहं म॑नु॒ष्ये॒षु भूयासम् ॥३९॥

Uttishthannojasa saha pitvi shipre avepayah, somamindra chamu sutam
Upayamagrihitosindraya tvaujasa esha te yonirindraya tvaujase
Indraujishthaujishthastvam deveshvasyojishthoham manushyeshu bhuyasam

8.40

अदृ॑श्रमस्य के॒तवो॒ वि र॒श्मयो॒ जनाँ॒२ अनु॑ । भ्राज॑न्तो अ॒ग्नयो॑ यथा ।
उ॒प॒या॒मगृ॑हीतोऽसि॒ सूर्या॑य त्वा भ्रा॒जायै॒ष ते॒ योनि॒ः सूर्या॑य त्वा भ्रा॒जाय॑ ।
सूर्य॑ भ्राजिष्ठ॒ भ्राजि॑ष्ठ॒स्त्वं दे॒वेष्वसि॒ भ्राजि॑ष्ठो॒ऽहं म॑नु॒ष्ये॒षु भूयासम् ॥४०॥

Adrishramasya ketavo vi rashmayo janan2 anu, bhrajanto agnayo yatha
Upayamagrihitosi suryaya tva bhrajayaisha te yonih suryaya tva bhrajaya
Surya bhrajishtha bhrajishthastvam deveshvasi bhrajishthoham manushyeshu bhuyasam

8.41

उदु॒ त्यं जा॒तवे॑दसं दे॒वं व॑हन्ति के॒तव॑ः । दृ॒शे विश्वा॑य॒ सूर्य॑म् ।
उ॒प॒या॒मगृ॑हीतोऽसि॒ सूर्या॑य त्वा भ्रा॒जायै॒ष ते॒ योनि॒ः सूर्या॑य त्वा भ्रा॒जाय॑ ॥४१॥

Udu tyam jatavedasam devam vahanti ketavah, drishe vishvaya suryam
Upayamagrihitosi suryaya tva bhrajayaisha te yonih suryaya tva bhrajaya

8.42

आ जि॑घ्र क॒लशं॑ म॒ह्या त्वा॑ विश॒न्त्विन्द॑वः।
पुन॑रू॒र्जा नि व॑र्तस्व॒ सा न॑ः स॒हस्रं॑ धुक्ष्वो॒रुधा॑रा॒ पय॑स्वती॒ पुन॒र्मा वि॑शताद्र॒यिः ॥४२॥

A jighra kalasham mahya tva vishantvindavah
Punarurja ni vartasva sa nah sahasram dhukshvorudhara payasvati punarma vishatadrayih

8.43

इडे॒ रन्ते॒ हव्ये॒ काम्ये॒ चन्द्रे॒ ज्योतेऽदि॑ते॒ सर॑स्वति॒ महि॒ विश्रु॑ति ।
ए॒ता ते॑ अघ्न्ये॒ नामा॑नि दे॒वेभ्यो॑ मा सु॒कृतं॑ ब्रूतात् ॥४३॥

Ide rante havye kamye chandre jyotedite sarasvati mahi vishruti
Eta te aghnye namani devebhyo ma sukritam brutat

8.44

वि न॑ इन्द्र॒ मृधो॑ जहि नी॒चा य॑च्छ पृतन्य॒तः ।
यो अ॒स्माँ२ अ॑भि॒दास॒त्यध॑रं गमया॒ तम॑ः ।
उ॒प॒या॒मगृ॑हीतो॒ऽसीन्द्रा॑य त्वा वि॒मृधे॑ ए॒ष ते॒ योनि॒रिन्द्रा॑य त्वा वि॒मृधे॑ ॥४४॥

Vi na indra mridho jahi nicha yachchha pritanyatah
Yo asman2 abhidasatyadharam gamaya tamah
Upayamagrihitosindraya tva vimridhe esha te yonirindraya tva vimridhe

8.45

वा॒चस्पतिं॑ वि॒श्वक॑र्माणमू॒तये॑ मनो॒जुवं॒ वाजे॑ अ॒द्या हु॑वेम ।
स नो॒ विश्वा॑नि॒ हव॑नानि जोषद्वि॒श्वश॑म्भू॒रव॑से सा॒धुक॑र्मा ।
उ॒प॒या॒मगृ॑हीतो॒ऽसीन्द्रा॑य त्वा वि॒श्वक॑र्मणे
ए॒ष ते॒ योनि॒रिन्द्रा॑य त्वा वि॒श्वक॑र्मणे ॥४५॥

Vachaspatim vishvakarmanamutaye manojuvam vaje adya huvema
Sa no vishvani havanani joshadvishvashambhuravase sadhukarma
Upayamagrihitosindraya tva vishvakarmane
Esha te yonirindraya tva vishvakarmane

8.46

विश्व॑कर्मन् ह॒विषा॒ वर्ध॑नेन त्रा॒तार॒मिन्द्र॑मकृणोरव॒ध्यम् ।
तस्मै॒ विश॒ः सम॑नमन्त पू॒र्वीर॒यमु॒ग्रो वि॒हव्यो॒ यथास॑त् ।
उ॒प॒या॒मगृ॑हीतो॒ऽसीन्द्रा॑य त्वा वि॒श्वक॑र्मण
ए॒ष ते॒ योनि॒रिन्द्रा॑य त्वा वि॒श्वक॑र्मणे ॥४६॥

Vishvakarman havisha vardhanena trataramindramakrinoravadhyam
Tasmai vishah samanamanta purvirayamugro vihavyo yathasat
Upayamagrihitosindraya tva vishvakarmana
Esha te yonirindraya tva vishvakarmane

8.47

उ॒प॒या॒मगृ॑हीतोऽस्य॒ग्नये॑ त्वा गाय॒त्रच्छ॑न्दसं गृह्णामीन्द्रा॑य त्वा त्रि॒ष्टुप्छ॑न्दसं गृह्णामि॒
विश्वे॑भ्यस्त्वा दे॒वेभ्यो॒ जग॑च्छन्दसं गृह्णाम्यनु॒ष्टुप्ते॑ऽभिग॒रः ॥४७॥

Upayamagrihitosyagnaye tva gayatrachchhandasam grihnamindraya tva trishtupchhandasam grihnami
Vishvebhyastva devebhyo jagachchhandasam grihnamyanushtuptebhigarah

8.48

व्रेशी॑नां त्वा॒ पत्म॒न्ना धू॑नोमि कुकू॒नना॑नां त्वा॒ पत्म॒न्ना धू॑नोमि भ॒न्दना॑नां त्वा॒ पत्म॒न्ना धू॑नोमि म॒दिन्त॑मानां त्वा॒ पत्म॒न्ना धू॑नोमि म॒धुन्त॑मानां त्वा॒ पत्म॒न्ना धू॑नोमि शु॒क्रं त्वा॑ शु॒क्र आ धू॑नो॒म्यह्नो॑ रू॒पे सूर्य॑स्य र॒श्मिषु॑ ॥४८॥

Vreshinam tva patmanna dhunomi kukunananam tva patmanna dhunomi bhandananam tva patmanna dhunomi madintamanam tva patmanna dhunomi madhuntamanam tva patmanna dhunomi shukram tva shukra a dhunomyahno rupe suryasya rashmishu

8.49

ककु॒भᳪ रू॒पं वृ॑ष॒भस्य॑ रोचते बृ॒हच्छु॒क्रः शु॒क्रस्य॑ पुरो॒गाः सोम॒ः सोम॑स्य पुरो॒गाः ।
यत्ते॑ सोमा॒दा॑भ्यं॒ नाम॒ जागृ॑वि॒ तस्मै॑ त्वा गृह्णामि॒ तस्मै॑ ते सोम॒ सोमा॑य॒ स्वाहा॑ ॥४९॥

Kakubham rupam vrishabhasya rochate brihachchhukrah shukrasya purogah somah somasya purogah
Yatte somadabhyam nama jagrivi tasmai tva grihnami tasmai te soma somaya svaha

8.50

उ॒शिक् त्वं दे॑व सोमा॒ग्नेः प्रि॒यं पाथोऽपी॑हि
व॒शी त्वं दे॑व सो॒मेन्द्र॑स्य प्रि॒यं पाथोऽपी॑ह्य॒स्मत्स॑खा॒ त्वं दे॑व सोम॒ विश्वे॑षां दे॒वानां॑ प्रि॒यं पाथोऽपी॑हि ॥५०॥

Ushik tvam deva somagneh priyam pathopihi
Vashi tvam deva somendrasya priyam pathopihyasmatsakha tvam deva soma vishvesham devanam priyam pathopihi

8.51

इ॒ह रति॑रि॒ह र॑मध्वमि॒ह धृति॑रि॒ह स्वधृ॑ति॒ः स्वाहा॑ ।
उ॒प॒सृ॒जन् ध॒रुणं॑ मा॒त्रे ध॒रुणो॑ मा॒तरं॒ धय॑न् । रा॒यस्पोष॑म॒स्मासु॑ दीधर॒त्स्वाहा॑ ॥५१॥

Iha ratiriha ramadhvamiha dhritiriha svadhritih svaha
Upasrijan dharunam matre dharuno mataram dhayan, rayasposhamasmasu didharatsvaha

8.52

स॒त्रस्य॒ ऋद्धि॑र॒स्यग॑न्म॒ ज्योति॑र॒मृता॑ अभूम॒ ।
दिवं॑ पृथि॒व्या अध्याऽरु॑हा॒मावि॑दाम दे॒वान्त्स्व॒र्ज्योति॑ः ॥५२॥

Satrasya riddhirasyaganma jyotiramrita abhuma
Divam prithivya adhyaruhamavidama devantsvarjyotih

8.53

यु॒वं तमि॑न्द्रापर्वता पुरो॒युधा॒ यो न॑ः पृत॒न्यादप॒ तं त॒मिद्ध॑तं॒ वज्रे॑ण॒ तं त॒मिद्ध॑तम् ।
दू॒रे च॒त्ताय॑ छन्त्स॒द्गह॑नं॒ यदिन॑क्षत् ।
अ॒स्माक॒ᳪ शत्रू॒न्परि॑ शूर वि॒श्वतो॑ द॒र्मा द॑र्षीष्ट वि॒श्वत॑ः ।
भूर्भुव॒ः स्व॒ः सुप्र॒जाः प्र॒जाभि॑ः स्याम सु॒वीरा॑ वीरैः सु॒पोषा॒ः पोषै॑ः ॥५३॥

Yuvam tamindraparvata puroyudha yo nah pritanyadapa tam tamiddhatam vajrena tam tamiddhatam
Dure chattaya chhantsadgahanam yadinakshat
Asmakam shatrunpari shura vishvato darma darshishta vishvatah
Bhurbhuvah svah suprajah prajabhih syama suvira viraih suposhah poshaih

Contains text from DharmicData, made available under the Open Database License (ODbL). Simple meanings are written by AI and can contain mistakes.