Adhyaya 5

5.1

अ॒ग्नेस्त॒नूर॑सि॒ विष्ण॑वे त्वा॒ सोम॑स्य त॒नूर॑सि॒ विष्ण॑वे॒ त्वा ऽति॑थेराति॒थ्यम॑सि॒ विष्ण॑वे त्वा श्ये॒नाय॑ त्वा सोम॒भृते॒ विष्ण॑वे त्वा॒ऽग्नये॑ त्वा रायस्पोष॒दे विष्ण॑वे त्वा ॥१॥

Agnestanurasi vishnave tva somasya tanurasi vishnave tva titheratithyamasi vishnave tva shyenaya tva somabhrite vishnave tvagnaye tva rayasposhade vishnave tva

5.2

अ॒ग्नेर्ज॒नित्र॑मसि वृष॑णौ स्थ उ॒र्वश्य॑स्या॒युर॑सि पुरू॒रवा॑ असि । गा॒य॒त्रेण॑ त्वा॒ छन्द॑सा मन्थामि॒ त्रै॑ष्टुभेन त्वा॒ छन्द॑सा मन्थामि॒ जाग॑तेन त्वा॒ छन्द॑सा मन्थामि ॥२॥

Agnerjanitramasi vrishanau stha urvashyasyayurasi pururava asi, gayatrena tva chhandasa manthami traishtubhena tva chhandasa manthami jagatena tva chhandasa manthami

5.3

भव॑तं न॒ः सम॑नसौ॒ सचे॑तसावरे॒पसौ॑ । मा य॒ज्ञᳪ हि॑ᳪसिष्टं॒ मा य॒ज्ञप॑तिं जातवेदसौ शिवौ भ॑वतम॒द्य न॑ः ॥३॥

Bhavatam nah samanasau sachetasavarepasau, ma yagyam hinsishtam ma yagyapatim jatavedasau shivau bhavatamadya nah

5.4

अ॒ग्नाव॒ग्निश्च॑रति॒ प्रवि॑ष्ट॒ ऋषी॑णां पु॒त्रो अ॑भिशस्ति॒पावा॑ । स न॑ः स्यो॒नः सु॒यजा॑ यजे॒ह दे॒वेभ्यो॑ ह॒व्यᳪ सद॒मप्र॑युच्छ॒न्त्स्वाहा॑ ॥४॥

Agnavagnishcharati pravishta rishinam putro abhishastipava, sa nah syonah suyaja yajeha devebhyo havyam sadamaprayuchchhantsvaha

5.5

आप॑तये त्वा॒ परि॑पतये गृह्णामि॒ तनू॒नप्त्रे॑ शाक्व॒राय॒ शक्व॑न॒ ओजि॑ष्ठाय । अना॑धृष्टमस्यनाधृ॒ष्यं दे॒वाना॒मोजोऽन॑भिशस्त्यभिशस्ति॒पा अ॑नभिशस्ते॒न्यमञ्ज॑सा स॒त्यमुप॑गेषᳪ स्वि॒ते मा॑ धाः ॥५॥

Apataye tva paripataye grihnami tanunaptre shakvaraya shakvana ojishthaya, anadhrishtamasyanadhrishyam devanamojonabhishastyabhishastipa anabhishastenyamanjasa satyamupagesham svite ma dhah

5.6

अग्ने॑ व्रतपा॒स्त्वे व्र॑त॒पा या तव॑ त॒नूरि॒यᳪ सा मयि॒ यो मम॑ त॒नूरे॒षा सा त्वयि॑ । स॒ह नौ॑ व्रतपते व्र॒तान्यनु॑ मे दी॒क्षां दी॒क्षाप॑ति॒र्मन्य॑ता॒मनु॒ तप॒स्तप॑स्पतिः ॥६॥

Agne vratapastve vratapa ya tava tanuriyam sa mayi yo mama tanuresha sa tvayi, saha nau vratapate vratanyanu me diksham dikshapatirmanyatamanu tapastapaspatih

अ॒jशुर॑ᳪशुष्टे देव सो॒माप्या॑यता॒मिन्द्रा॑यैकधन॒विदे॑ । आ तुभ्य॒मिन्द्र॒ः प्याय॑ता॒मा त्वमिन्द्रा॑य प्यायस्व । आ प्या॑यया॒स्मान्त्सखी॑न्त्स॒न्या मे॒धया॑ स्व॒स्ति ते॑ देव सोम सु॒त्याम॑शीय । एष्टा॒ राय॒ः प्रेषे भगा॑य ऋ॒तमृ॑तवा॒दिभ्यो॒ नमो॒ द्यावा॑पृथि॒वीभ्या॑म् ॥७॥

Ajshuranshushte deva somapyayatamindrayaikadhanavide, a tubhyamindrah pyayatama tvamindraya pyayasva, a pyayayasmantsakhintsanya medhaya svasti te deva soma sutyamashiya, eshta rayah preshe bhagaya ritamritavadibhyo namo dyavaprithivibhyam

5.8

या ते॑ अग्नेऽयःश॒या त॒नूर्वर्षि॑ष्ठा गह्वरे॒ष्ठा । उ॒ग्रं वचो॒ अपा॑वधीत्त्वे॒षं वचो॒ अपा॑वधी॒त्स्वाहा॑ ।
या ते॑ अग्ने रजःश॒या त॒नूर्वर्षि॑ष्ठा गह्वरे॒ष्ठा । उ॒ग्रं वचो॒ अपा॑वधीत्त्वे॒षं वचो॒ अपा॑वधी॒त्स्वाहा॑ ।
या ते॑ अग्ने हरिश॒या त॒नूर्वर्षि॑ष्ठा गह्वरे॒ष्ठा । उ॒ग्रं वचो॒ अपा॑वधीत्त्वे॒षं वचो॒ अपा॑वधी॒त्स्वाहा॑ ॥८॥

Ya te agneyahshaya tanurvarshishtha gahvareshtha, ugram vacho apavadhittvesham vacho apavadhitsvaha
Ya te agne rajahshaya tanurvarshishtha gahvareshtha, ugram vacho apavadhittvesham vacho apavadhitsvaha
Ya te agne harishaya tanurvarshishtha gahvareshtha, ugram vacho apavadhittvesham vacho apavadhitsvaha

5.9

त॒प्ताय॑नी मेऽसि वि॒त्ताय॑नी मेऽस्यव॑तान्मा नाथि॒तादव॑तान्मा व्यथि॒तात् । वि॒देद॒ग्निर्नभो॒ नामा ऽग्ने॑ अङ्गिर॒ आयु॑ना॒ नाम्नेहि॒
योऽस्यां पृ॑थि॒व्यामसि॒ यत्तेऽना॑धृष्टं॒ नाम॑ य॒ज्ञियं॒ तेन॒ त्वा द॑धे वि॒देद॒ग्निर्न॒भो॒ नामा ऽग्ने॑ अङ्गिर॒ आयु॑ना॒ नाम्नेहि॒
यो द्वि॒तीय॑स्यां पृथि॒व्यामसि॒ यत्तेऽना॑धृष्टं॒ नाम॑ य॒ज्ञियं॒ तेन॒ त्वा द॑धे वि॒देद॒ग्निर्न॒भो नामा ऽग्ने॑ अङ्गिर॒ आयु॑ना॒ नाम्नेहि॑ यस्तृ॒तीय॑स्यां पृथि॒व्यामसि॒ यत्तेऽना॑धृष्टं॒ नाम॑ य॒ज्ञियं॒ तेन॒ त्वा द॑धे । अनु॑ त्वा दे॒ववी॑तये ॥९॥

Taptayani mesi vittayani mesyavatanma nathitadavatanma vyathitat, videdagnirnabho nama gne angira ayuna namnehi
Yosyam prithivyamasi yattenadhrishtam nama yagyiyam tena tva dadhe videdagnirnabho nama gne angira ayuna namnehi
Yo dvitiyasyam prithivyamasi yattenadhrishtam nama yagyiyam tena tva dadhe videdagnirnabho nama gne angira ayuna namnehi yastritiyasyam prithivyamasi yattenadhrishtam nama yagyiyam tena tva dadhe, anu tva devavitaye

5.10

सि॒jह्य॒सि सपत्नसा॒ही दे॒वेभ्य॑ः कल्पस्व सि॒jह्य॒सि सपत्नसा॒ही दे॒वेभ्य॑ःशुन्धस्व सि॒jह्य॒सि सपत्नसा॒ही दे॒वेभ्य॑ः शुम्भस्व ॥१०॥

Sijhyasi sapatnasahi devebhyah kalpasva sijhyasi sapatnasahi devebhyahshundhasva sijhyasi sapatnasahi devebhyah shumbhasva

5.11

इ॒न्द्र॒घो॒षस्त्वा॒ वसु॑भिः पु॒रस्ता॑त्पातु प्रचे॑तास्त्वा रुद्रैः प॒श्चात्पा॑तु मनो॑जवास्त्वा पि॒तृभि॑र्दक्षिण॒तः पा॑तु
वि॒श्वक॑र्मा त्वाऽऽदि॒त्यैरु॑त्तर॒तः पा॑त्वि॒दम॒हं त॒प्तं वार्ब॑हि॒र्धा य॒ज्ञान्निः सृ॑जामि ॥११॥

Indraghoshastva vasubhih purastatpatu prachetastva rudraih pashchatpatu manojavastva pitribhirdakshinatah patu
Vishvakarma tvadityairuttaratah patvidamaham taptam varbahirdha yagyannih srijami

5.12

सि॒jह्य॒सि॒ स्वाहा॑ सि॒jह्य॒स्यादित्य॒वनि॒ः स्वाहा॑ सि॒jह्य॒सि ब्रह्म॒वनि॑ः क्षत्र॒वनि॒ः स्वाहा॑
सि॒jह्य॒सि सुप्रजा॒वनी॑ रायस्पोष॒वनि॒ः स्वाहा॑ सि॒jह्यस्याव॑ह दे॒वान् यज॑मानाय॒ स्वाहा॑
भू॒तेभ्य॑स्त्वा ॥१२॥

Sijhyasi svaha sijhyasyadityavanih svaha sijhyasi brahmavanih kshatravanih svaha
Sijhyasi suprajavani rayasposhavanih svaha sijhyasyavaha devan yajamanaya svaha
Bhutebhyastva

5.13

ध्रु॒वो॒ऽसि पृथि॒वीं दृ॑ᳪह ध्रुव॒क्षिद॑स्य॒न्तरि॑क्षं दृᳪहाच्युत॒क्षिद॑सि॒ दिवं॑ दृᳪहा॒ग्नेः पुरी॑षमसि ॥१३॥

Dhruvosi prithivim drinha dhruvakshidasyantariksham drinhachyutakshidasi divam drinhagneh purishamasi

5.14

यु॒ञ्जते॒ मन॑ उ॒त यु॑ञ्जते॒ धियो॒ विप्रा॒ विप्र॑स्य बृह॒तो वि॑प॒श्चित॑ः ।
वि होत्रा॑ दधे वयुना॒विदेक॒ इन्म॒ही दे॒वस्य॑ सवि॒तुः परि॑ष्टुति॒ः स्वाहा॑ ॥१४॥

Yunjate mana uta yunjate dhiyo vipra viprasya brihato vipashchitah
Vi hotra dadhe vayunavideka inmahi devasya savituh parishtutih svaha

5.15

इ॒दं विष्णु॒र्वि च॑क्रमे त्रे॒धा नि द॑धे प॒दम् । समू॑ढमस्य पाᳪसु॒रे स्वाहा॑ ॥१५॥

Idam vishnurvi chakrame tredha ni dadhe padam, samudhamasya pansure svaha

5.16

इरा॑वती धेनु॒मती॒ हि भू॒तᳪ सू॑यव॒सिनी॒ मन॑वे दश॒स्या । व्य॑स्कभ्ना॒ रोद॑सी विष्णवे॒ते दा॒धर्थ॑ पृथि॒वीम॒भितो॑ म॒यूखै॒ः स्वाहा॑ ॥१६॥

Iravati dhenumati hi bhutam suyavasini manave dashasya, vyaskabhna rodasi vishnavete dadhartha prithivimabhito mayukhaih svaha

5.17

दे॒व॒श्रुतौ॑ दे॒वेष्वा घो॑षतं॒ प्राची॒ प्रेत॑मध्व॒रं क॒ल्पय॑न्ती ऊ॒र्ध्वं य॒ज्ञं न॑यतं॒ मा जि॑ह्वरतम् ।
स्वं गो॒ष्ठमा व॑दतं देवी दुर्ये॒ आयु॒र्मा निर्वा॑दिष्टं प्र॒जां मा निर्वा॑दिष्ट॒मत्र॑ रमेथां॒ वर्ष्म॑न् पृथि॒व्याः ॥१७॥

Devashrutau deveshva ghoshatam prachi pretamadhvaram kalpayanti urdhvam yagyam nayatam ma jihvaratam
Svam goshthama vadatam devi durye ayurma nirvadishtam prajam ma nirvadishtamatra rametham varshman prithivyah

5.18

विष्णो॒र्नुकं॑ वी॒र्या॒णि॒ प्र वो॑चं॒ यः पार्थि॑वानि विम॒मे रजा॑ᳪसि ।
यो अस्क॑भाय॒दुत्त॑रᳪ स॒धस्थं॑ विचक्रमा॒णस्त्रे॒धोरु॑गा॒यो विष्ण॑वे त्वा ॥१८॥

Vishnornukam viryani pra vocham yah parthivani vimame rajansi
Yo askabhayaduttaram sadhastham vichakramanastredhorugayo vishnave tva

5.19

दि॒वो वा॑ विष्ण उ॒त वा॑ पृथि॒व्या म॒हो वा॑ विष्ण उ॒रोर॒न्तरि॑क्षात् ।
उ॒भा हि हस्ता॒ वसु॑ना पृ॒णस्वा प्र य॑च्छ॒ दक्षि॑णा॒दोत स॒व्याद्विष्ण॑वे त्वा ॥१९॥

Divo va vishna uta va prithivya maho va vishna urorantarikshat
Ubha hi hasta vasuna prinasva pra yachchha dakshinadota savyadvishnave tva

5.20

प्र तद्विष्णु॑ स्तवते वी॒र्ये॒ण मृ॒गो न भी॒मः कु॑च॒रो गि॑रि॒ष्ठाः ।
यस्यो॒रुषु॑ त्रि॒षु वि॒क्रम॑णेष्वधिक्षि॒यन्ति॒ भुव॑नानि॒ विश्वा॑ ॥२०॥

Pra tadvishnu stavate viryena mrigo na bhimah kucharo girishthah
Yasyorushu trishu vikramaneshvadhikshiyanti bhuvanani vishva

5.21

विष्णो॑ र॒राट॑मसि॒ विष्णो॒ः श्नप्त्रे॑ स्थो विष्णो॒ः स्यूर॑सि॒ विष्णो॑र्ध्रु॒वो॒ऽसि ।
वै॒ष्ण॒वम॑सि॒ विष्ण॑वे त्वा ॥२१॥

Vishno raratamasi vishnoh shnaptre stho vishnoh syurasi vishnordhruvosi
Vaishnavamasi vishnave tva

5.22

दे॒वस्य॑ त्वा सवि॒तुः प्र॑स॒वेऽश्विनो॑र्बा॒हुभ्यां॑ पू॒ष्णो हस्ता॑भ्याम् ।
आ द॑दे॒ नार्य॑सी॒दम॒हᳪ रक्ष॑सां ग्री॒वा अपि॑ कृन्तामि ।
बृ॒हन्न॑सि बृ॒हद्र॑वा बृह॒तीमिन्द्रा॑य॒ वाचं॑ वद ॥२२॥

Devasya tva savituh prasaveshvinorbahubhyam pushno hastabhyam
A dade naryasidamaham rakshasam griva api krintami
Brihannasi brihadrava brihatimindraya vacham vada

5.23

र॒क्षो॒हणं॑ वलग॒हनं॑ वैष्ण॒वी मि॒दम॒हं तं व॑ल॒गमुत्कि॑रामि॒ यं मे॒ निष्ट्यो॒ यम॒मात्यो॑ निच॒खाने॒दम॒हं तं व॑ल॒गमुत्कि॑रामि॒ यं मे॑ समा॒नो यमस॑मानो निच॒खाने॒दम॒हं तं व॑ल॒गमुत्कि॑रामि॒ यं मे॒ सब॑न्धु॒र्यमस॑बन्धुर्निच॒खाने॒दम॒हं तं व॑ल॒गमुत्कि॑रामि॒ यं मे॑ सजा॒तो यमस॑जातो निच॒खानोत्कृ॒त्यां कि॑रामि ॥२३॥

Rakshohanam valagahanam vaishnavi midamaham tam valagamutkirami yam me nishtyo yamamatyo nichakhanedamaham tam valagamutkirami yam me samano yamasamano nichakhanedamaham tam valagamutkirami yam me sabandhuryamasabandhurnichakhanedamaham tam valagamutkirami yam me sajato yamasajato nichakhanotkrityam kirami

5.24

स्व॒राड॑सि सपत्न॒हा स॑त्र॒राड॑स्यभिमाति॒हा ज॑न॒राड॑सि रक्षो॒हा स॑र्व॒राड॑स्यमित्र॒हा ॥२४॥

Svaradasi sapatnaha satraradasyabhimatiha janaradasi rakshoha sarvaradasyamitraha

5.25

र॒क्षो॒हणो॑ वो वलग॒हन॒ः प्रोक्षा॑मि वैष्ण॒वान् र॑क्षो॒हणो॑ वो वलग॒हनोऽव॑नयामि वैष्ण॒वान् र॑क्षो॒हणो॑ वो वलग॒हनोऽव॑स्तृणामि वैष्ण॒वान्
र॑क्षो॒हणौ॑ वां वलग॒हना॒ उप॑ दधामि वैष्ण॒वी र॑क्षो॒हणौ॑ वां वलग॒हनौ॒ पर्यू॑हामि वैष्ण॒वी वै॑ष्ण॒वम॑सि वै॑ष्ण॒वा स्थ॑ ॥२५॥

Rakshohano vo valagahanah prokshami vaishnavan rakshohano vo valagahanovanayami vaishnavan rakshohano vo valagahanovastrinami vaishnavan
Rakshohanau vam valagahana upa dadhami vaishnavi rakshohanau vam valagahanau paryuhami vaishnavi vaishnavamasi vaishnava stha

5.26

दे॒वस्य॑ त्वा सवि॒तुः प्र॑स॒वेऽश्विनो॑र्बा॒हुभ्यां॑ पू॒ष्णो हस्ता॑भ्याम् । आ द॑दे॒ नार्य॑सी॒दम॒हᳪ रक्ष॑सां ग्री॒वा अपि॑ कृन्तामि ।
यवो॑ऽसि य॒वया॒स्मद्द्वेषो॑ य॒वयारा॑तीर्दि॒वे त्वा॒ऽन्तरि॑क्षाय त्वा पृथि॒व्यै त्वा शुन्ध॑न्तांल्लो॒काः पि॑तृ॒षद॑नाः पितृ॒षद॑नमसि ॥२६॥

Devasya tva savituh prasaveshvinorbahubhyam pushno hastabhyam, a dade naryasidamaham rakshasam griva api krintami
Yavosi yavayasmaddvesho yavayaratirdive tvantarikshaya tva prithivyai tva shundhantanllokah pitrishadanah pitrishadanamasi

Contains text from DharmicData, made available under the Open Database License (ODbL). Simple meanings are written by AI and can contain mistakes.