UtshovAdhyaya 14
14.1
ध्रु॒वक्षि॑तिर्ध्रु॒वयो॑निर्ध्रु॒वाऽसि॑ ध्रु॒वं योनि॒मा सी॑द साधु॒या । उख्य॑स्य के॒तुं प्र॑थ॒मं जु॑षा॒णाऽश्विना॑ऽध्व॒र्यू सा॑दयतामि॒ह त्वा॑ ॥१॥
Dhruvakshitirdhruvayonirdhruvasi dhruvam yonima sida sadhuya, ukhyasya ketum prathamam jushanashvinadhvaryu sadayatamiha tva
14.2
कुला॒यिनी॑ घृ॒तव॑ती॒ पुरु॑न्धिः स्यो॒ने सी॑द॒ सद॑ने पृथि॒व्याः ।
अ॒भि त्वा॑ रु॒द्रा वस॑वो गृणन्त्वि॒मा ब्रह्म॑ पीपिहि॒ सौभ॑गायाश्विना॑ऽध्व॒र्यू सा॑दयतामि॒ह त्वा॑ ॥२॥
Kulayini ghritavati purundhih syone sida sadane prithivyah
Abhi tva rudra vasavo grinantvima brahma pipihi saubhagayashvinadhvaryu sadayatamiha tva
14.3
स्वैर्दक्षै॒र्दक्ष॑पिते॒ह सी॑द दे॒वाना॑ᳪ सु॒म्ने बृ॑ह॒ते रणा॑य ।
पि॒तेवै॑धि सू॒नव॒ आ सु॒शेवा॑ स्वावे॒शा त॒न्वा सं वि॑शस्वा॒श्विना॑ऽध्व॒र्यू सा॑दयतामि॒ह त्वा॑ ॥३॥
Svairdakshairdakshapiteha sida devanam sumne brihate ranaya
Pitevaidhi sunava a susheva svavesha tanva sam vishasvashvinadhvaryu sadayatamiha tva
14.4
पृ॒थि॒व्याः पुरी॑षम॒स्यप्सो॒ नाम॒ तां त्वा॒ विश्वे॑ अ॒भि गृ॑णन्तु दे॒वाः ।
स्तोम॑पृष्ठा घृ॒तव॑ती॒ह सी॑द प्र॒जाव॑द॒स्मे द्रवि॒णाऽऽय॑जस्वा॒श्विना॑ऽध्व॒र्यू सा॑दयतामि॒ह त्वा॑ ॥४॥
Prithivyah purishamasyapso nama tam tva vishve abhi grinantu devah
Stomaprishtha ghritavatiha sida prajavadasme dravinayajasvashvinadhvaryu sadayatamiha tva
14.5
अदि॑त्यास्त्वा पृ॒ष्ठे सा॑दयाम्य॒न्तरि॑क्षस्य ध॒र्त्रीं वि॒ष्टम्भ॑नीं दि॒शामधि॑पत्नीं॒ भुव॑नानाम् |ऊ॒र्मिर्द्र॒प्सो अ॒पाम॑सि वि॒श्वक॑र्मा त॒ ऋषि॑र॒श्विना॑ऽध्व॒र्यू सा॑दयतामि॒ह त्वा॑ ॥५॥
Adityastva prishthe sadayamyantarikshasya dhartrim vishtambhanim dishamadhipatnim bhuvananam, urmirdrapso apamasi vishvakarma ta rishirashvinadhvaryu sadayatamiha tva
14.6
शु॒क्रश्च॒ शुचि॑श्च ग्रैष्मा॑वृ॒तू अ॒ग्नेर॑न्तः श्ले॒षो॒ऽसि॒ कल्पे॑तां॒ द्यावा॑पृथि॒वी कल्प॑न्ता॒माप॒ ओष॑धय॒ः कल्प॑न्ताम॒ग्नय॒ः पृथ॒ङ्नम॒ ज्यैष्ठ्या॑य॒ सव्र॑ताः|
ये अ॒ग्नय॒ः सम॑नसोऽन्त॒रा द्यावा॑पृथि॒वी इ॒मे | ग्रै॒ष्मा॑वृ॒तू अ॑भि॒कल्प॑माना॒ इन्द्र॑मिव दे॒वा अ॑भि॒संवि॑शन्तु॒ तया॑ दे॒वत॑याऽङ्गिर॒स्वद् ध्रुवे सी॑दतम् ॥६॥
Shukrashcha shuchishcha graishmavritu agnerantah shleshosi kalpetam dyavaprithivi kalpantamapa oshadhayah kalpantamagnayah prithannama jyaishthyaya savratah
Ye agnayah samanasontara dyavaprithivi ime, graishmavritu abhikalpamana indramiva deva abhisanvishantu taya devatayangirasvad dhruve sidatam
14.7
स॒जूरृ॒तुभि॑ः स॒जूर्वि॒धाभि॑ः स॒जूर्दे॒वैः स॒जूर्दे॒वैर्व॑योना॒धैर॒ग्नये॑ त्वा वैश्वान॒राया॒श्विना॑ऽध्व॒र्यू सा॑दयतामि॒ह त्वा॑
स॒जूरृ॒तुभि॑ः स॒जूर्वि॒धाभि॑ः स॒जूर्वसु॑भिः स॒जूर्दे॒वैर्व॑योनाधैर॒ग्नये॑ त्वा वैश्वान॒राया॒श्विना॑ऽध्व॒र्यू सा॑दयतामि॒ह त्वा॑
स॒जूरृ॒तुभि॑ः स॒जूर्वि॒धाभि॑ः स॒जू रु॒द्रैः स॒जूर्दे॒वैर्व॑योना॒धैर॒ग्नये॑ त्वा वैश्वान॒राया॒श्विना॑ऽध्व॒र्यू सा॑दयतामि॒ह त्वा॑
स॒जूरृ॒तुभि॑ः स॒जूर्वि॒धाभि॑ः स॒जूरा॑दि॒त्यैः स॒जूर्दे॒वैर्व॑योना॒धैर॒ग्नये॑ त्वा वैश्वान॒राया॒श्विना॑ऽध्व॒र्यू सा॑दयतामि॒ह त्वा॑
स॒जूरृ॒तुभि॑ः स॒जूर्वि॒धाभि॑ः स॒जूर्विश्वै॑र्दे॒वैः स॒जूर्दे॒वैर्व॑योनाधैर॒ग्नये॑ त्वा वैश्वान॒राया॒श्विना॑ऽध्व॒र्यू सा॑दयतामि॒ह त्वा॑ ॥७॥
Sajurritubhih sajurvidhabhih sajurdevaih sajurdevairvayonadhairagnaye tva vaishvanarayashvinadhvaryu sadayatamiha tva
Sajurritubhih sajurvidhabhih sajurvasubhih sajurdevairvayonadhairagnaye tva vaishvanarayashvinadhvaryu sadayatamiha tva
Sajurritubhih sajurvidhabhih saju rudraih sajurdevairvayonadhairagnaye tva vaishvanarayashvinadhvaryu sadayatamiha tva
Sajurritubhih sajurvidhabhih sajuradityaih sajurdevairvayonadhairagnaye tva vaishvanarayashvinadhvaryu sadayatamiha tva
Sajurritubhih sajurvidhabhih sajurvishvairdevaih sajurdevairvayonadhairagnaye tva vaishvanarayashvinadhvaryu sadayatamiha tva
14.8
प्रा॒णं मे॑ पाह्यपा॒नं मे॑ पाहि व्या॒नं मे॑ पाहि॒ चक्षु॑र्म उ॒र्व्या वि भा॑हि॒ श्रोत्रं॑ मे श्लोकय ।
अ॒पः पि॒न्वौष॑धीर्जिन्व द्वि॒पाद॑व चतु॑ष्पात् पाहि दि॒वो वृष्टि॒मेर॑य ॥८॥
Pranam me pahyapanam me pahi vyanam me pahi chakshurma urvya vi bhahi shrotram me shlokaya
Apah pinvaushadhirjinva dvipadava chatushpat pahi divo vrishtimeraya
14.9
मू॒र्धा वय॑ः प्र॒जाप॑ति॒श्छन्द॑ः क्ष॒त्रं वयो॒ मय॑न्दं॒ छन्दो॑ विष्ट॒म्भो वयोऽधि॑पति॒श्छन्दो॑
वि॒श्वक॑र्मा॒ वय॑ः परमे॒ष्ठी छन्दो॑ ब॒स्तो वयो॑ विव॒लं छन्दो॒ वृष्णि॒र्वयो॑ विशा॒लं छन्द॒ः
पुरु॑षो॒ वय॑स्त॒न्द्रं छन्दो॑ व्या॒घ्रो वयोऽना॑धृष्टं॒ छन्द॑ः सि॒ᳪहो वय॑श्छ॒दिश्छन्द॑ः पष्ठ॒वाड्वयो॑ बृह॒ती छन्द॑ उ॒क्षा वय॑ः क॒कुप् छन्द॑ ऋष॒भो वय॑ः स॒तोबृ॑हती॒ छन्द॑ः ॥९॥
Murdha vayah prajapatishchhandah kshatram vayo mayandam chhando vishtambho vayodhipatishchhando
Vishvakarma vayah parameshthi chhando basto vayo vivalam chhando vrishnirvayo vishalam chhandah
Purusho vayastandram chhando vyaghro vayonadhrishtam chhandah sinho vayashchhadishchhandah pashthavadvayo brihati chhanda uksha vayah kakup chhanda rishabho vayah satobrihati chhandah
14.10
अ॒न॒ड्वान्वय॑ः प॒ङ्क्तिश्छन्दो॑ धे॒नुर्वयो॒ जग॑ती॒ छन्द॒त्र्यवि॒र्वय॑स्त्रि॒ष्टुप् छन्दो॑ दित्य॒वाड्वयो॑ वि॒राट् छन्द॒ः पञ्चा॑वि॒र्वयो॑ गाय॒त्री छन्द॑ स्त्रिव॒त्सो वय॑ उ॒ष्णिक् छन्द॑ऽ स्तु॑र्य॒वाड्वयो॑ऽनु॒ष्टुप् छन्दो॑ लो॒कं ता इन्द्र॑म् ॥१॥
Anadvanvayah panktishchhando dhenurvayo jagati chhandatryavirvayastrishtup chhando dityavadvayo virat chhandah panchavirvayo gayatri chhanda strivatso vaya ushnik chhanda sturyavadvayonushtup chhando lokam ta indram
14.11
०।।
इन्द्रा॑ग्नी॒ अव्य॑थमाना॒मिष्ट॑कां दृᳪहतं यु॒वम् ।
पृ॒ष्ठेन॒ द्यावा॑पृथि॒वी अ॒न्तरि॑क्षं च॒ वि बा॑धसे ॥११॥
0
Indragni avyathamanamishtakam drinhatam yuvam
Prishthena dyavaprithivi antariksham cha vi badhase
14.12
वि॒श्वक॑र्मा त्वा सादयत्व॒न्तरि॑क्षस्य पृ॒ष्ठे व्यच॑स्वतीं॒ प्रथ॑स्वतीम॒न्तरि॑क्षं यच्छा॒न्तरि॑क्षं दृᳪहा॒न्तरि॑क्षं॒ मा हि॑ᳪसीः । विश्व॑स्मै प्रा॒णाया॑पा॒नाय॑ व्या॒नायो॑दा॒नाय॑ प्रति॒ष्ठायै॑ च॒रित्रा॑य ।
वा॒युष्ट्वा॒ऽभि पा॑तु म॒ह्या स्व॒स्त्या छ॒र्दिषा॒ शन्त॑मेन॒ तया॑ दे॒वत॑याऽङ्गिर॒स्वद् ध्रु॒वा सी॑द ॥१२॥
Vishvakarma tva sadayatvantarikshasya prishthe vyachasvatim prathasvatimantariksham yachchhantariksham drinhantariksham ma hinsih, vishvasmai pranayapanaya vyanayodanaya pratishthayai charitraya
Vayushtvabhi patu mahya svastya chhardisha shantamena taya devatayangirasvad dhruva sida
14.13
राज्ञ्य॑सि॒ प्राची॒ दिग्वि॒राड॑सि॒ दक्षि॑णा॒ दिक् स॒म्राड॑सि प्र॒तीची॒ दिक् स्व॒राड॒स्युदी॑ची॒ दिगधि॑पत्न्यसि बृह॒ती दिक् ॥१३॥
Ragyyasi prachi digviradasi dakshina dik samradasi pratichi dik svaradasyudichi digadhipatnyasi brihati dik
14.14
वि॒श्वक॑र्मा त्वा सादयत्व॒न्तरि॑क्षस्य पृ॒ष्ठे ज्योति॑ष्मतीम् ।
विश्व॑स्मै प्रा॒णाया॑पा॒नाय॑ व्या॒नाय॒ विश्वं॒ ज्योति॑र्यच्छ ।
वा॒युष्टेऽधि॑पति॒स्तया॑ दे॒वत॑याऽङ्गिर॒स्वद् ध्रु॒वा सी॑द ॥१४॥
Vishvakarma tva sadayatvantarikshasya prishthe jyotishmatim
Vishvasmai pranayapanaya vyanaya vishvam jyotiryachchha
Vayushtedhipatistaya devatayangirasvad dhruva sida
14.15
नभ॑श्च नभ॒स्य॒श्च॒ वार्षि॑कावृ॒तू अ॒ग्नेर॑न्तः श्ले॒षो॒ऽसि॒ कल्पे॑तां॒ द्यावा॑पृथि॒वी कल्प॑न्ता॒माप॒ ओष॑धय॒ः कल्प॑न्ताम॒ग्नय॒ः पृथ॒ङ्नम॒ ज्यैष्ठ्या॑य॒ सव्र॑ताः।
ये अ॒ग्नय॒ः सम॑नसोऽन्त॒रा द्यावा॑पृथि॒वी इ॒मे | वार्षि॑कावृ॒तू अ॑भि॒कल्प॑माना॒ इन्द्र॑मिव दे॒वा अ॑भि॒संवि॑शन्तु॒ तया॑ दे॒वत॑याऽङ्गिर॒स्वद् ध्रु॒वे सी॑दतम् ॥१५॥
Nabhashcha nabhasyashcha varshikavritu agnerantah shleshosi kalpetam dyavaprithivi kalpantamapa oshadhayah kalpantamagnayah prithannama jyaishthyaya savratah
Ye agnayah samanasontara dyavaprithivi ime, varshikavritu abhikalpamana indramiva deva abhisanvishantu taya devatayangirasvad dhruve sidatam
14.16
इ॒षश्चो॒र्जश्च॑ शार॒दावृ॒तू अ॒ग्नेर॑न्तः श्ले॒षो॒ऽसि॒ कल्पे॑तां॒ द्यावा॑पृथि॒वी कल्प॑न्ता॒माप॒ ओष॑धय॒ः कल्प॑न्ताम॒ग्नय॒ः पृथ॒ङ्नम॒ ज्यैष्ठ्याय॒ सव्र॑ताः ।
ये अ॒ग्नय॒ः सम॑नसोऽन्त॒रा द्यावा॑पृथि॒वी इ॒मे शा॒र॒दावृ॒तू अ॑भि॒कल्प॑माना॒ इन्द्र॑मिव दे॒वा अ॑भि॒संवि॑शन्तु॒ तया॑ दे॒वत॑याऽङ्गिर॒स्वद् ध्रु॒वे सी॑दतम् ॥१६॥
Ishashchorjashcha sharadavritu agnerantah shleshosi kalpetam dyavaprithivi kalpantamapa oshadhayah kalpantamagnayah prithannama jyaishthyaya savratah
Ye agnayah samanasontara dyavaprithivi ime sharadavritu abhikalpamana indramiva deva abhisanvishantu taya devatayangirasvad dhruve sidatam
14.17
आयु॑र्मे पाहि प्रा॒णं मे॑ पाह्यपा॒नं मे॑ पाहि व्या॒नं मे॑ पाहि॒ चक्षु॑र्मे पाहि॒
श्रोत्रं॑ मे पाहि॒ वाचं॑ मे पिन्व॒ मनो॑ मे जिन्वात्मानं॑ मे पाहि॒ ज्योति॑र्मे यच्छ ॥१७॥
Ayurme pahi pranam me pahyapanam me pahi vyanam me pahi chakshurme pahi
Shrotram me pahi vacham me pinva mano me jinvatmanam me pahi jyotirme yachchha
14.18
मा छन्द॑ः प्र॒मा छन्द॑ः प्र॑ति॒मा छन्दो॑ अस्रीवय॒श्छन्द॑ः प॒ङ्क्तिश्छन्द॑ उ॒ष्णिक् छन्दो॑
बृह॒ती छन्दो॑ ऽनु॒ष्टुप् छन्दो॑ वि॒राट् छन्दो॑ गा॑य॒त्री छन्द॑ स्त्रि॒ष्टुप् छन्दो॒ जग॑ती॒ छन्द॑ः ॥१८॥
Ma chhandah prama chhandah pratima chhando asrivayashchhandah panktishchhanda ushnik chhando
Brihati chhando nushtup chhando virat chhando gayatri chhanda strishtup chhando jagati chhandah
14.19
पृ॒थि॒वी छन्दो॒ ऽन्तरि॑क्षं॒ छन्दो॒ द्यौ॒श्छन्द॒ः समा॒श्छन्दो॒ नक्ष॑त्राणि॒ छन्दो॒ वाक् छन्दो॒ मन॒श्छन्द॑ः
कृ॒षिश्छन्दो॒ हिर॑ण्यं॒ छन्दो॒ गौश्छन्दो॒ ऽजाश्छन्दो ऽश्व॒श्छन्द॑ः ॥१९॥
Prithivi chhando ntariksham chhando dyaushchhandah samashchhando nakshatrani chhando vak chhando manashchhandah
Krishishchhando hiranyam chhando gaushchhando jashchhando shvashchhandah
14.20
अ॒ग्निर्दे॒वता॒ वातो॑ दे॒वता॒ सूर्यो॑ दे॒वता॑ च॒न्द्रमा॑ दे॒वता॒ वस॑वो दे॒वता॑ रु॒द्रा दे॒वता॑
ऽऽदि॒त्या दे॒वता॑ म॒रुतो॑ दे॒वता॒ विश्वे॑ दे॒वा देवता॒ बृह॒स्पति॑र्दे॒वतेन्द्रो॑ दे॒वता॒ वरु॑णो दे॒वता॑ ॥२०॥
Agnirdevata vato devata suryo devata chandrama devata vasavo devata rudra devata
Ditya devata maruto devata vishve deva devata brihaspatirdevatendro devata varuno devata
14.21
मू॒र्धाऽसि॒ राड् ध्रु॒वाऽसि॑ ध॒रुणा॑ ध॒र्त्र्य॒सि॒ धर॑णी ।
आयु॑षे त्वा॒ वर्च॑से त्वा कृ॒ष्यै त्वा॒ क्षेमा॑य त्वा ॥२१॥
Murdhasi rad dhruvasi dharuna dhartryasi dharani
Ayushe tva varchase tva krishyai tva kshemaya tva
14.22
यन्त्री॒ राड् य॒न्त्र्य॒सि॒ यम॑नी ध्रु॒वाऽसि॒ धरि॑त्री ।
इ॒षे त्वो॒र्जे त्वा॑ र॒य्यै त्वा॒ पोषा॑य त्वा लो॒कं ता इन्द्र॑म् ॥२२॥
Yantri rad yantryasi yamani dhruvasi dharitri
Ishe tvorje tva rayyai tva poshaya tva lokam ta indram
14.23
आ॒शुस्त्रि॒वृद्भा॒न्तः प॑ञ्चद॒शो व्यो॑मा सप्तद॒शो ध॒रुण॑ एकवि॒ᳪशः
प्रतू॑र्तिरष्टाद॒शस्तपो॑ नवद॒शो॒ ऽभीव॒र्त्तः स॑वि॒ᳪशो वर्चो॑ द्वावि॒ᳪशः
स॒म्भर॑णस्त्रयोवि॒ᳪशो योनि॑श्चतुर्वि॒ᳪशो गर्भा॑ः पञ्चवि॒ᳪश ओज॑स्त्रिण॒वः
क्रतु॑रेकत्रि॒ᳪशः प्र॑ति॒ष्ठा त्र॑यस्त्रि॒ᳪशो ब्र॒ध्नस्य॑ वि॒ष्टपं॑ चतुस्त्रि॒ᳪशो नाक॑ः षट्त्रि॒ᳪशो
वि॑व॒र्तो॒ऽष्टाचत्वारि॒ᳪशो ध॒र्त्रं च॑तुष्टो॒मः ॥२३॥
Ashustrivridbhantah panchadasho vyoma saptadasho dharuna ekavinshah
Praturtirashtadashastapo navadasho bhivarttah savinsho varcho dvavinshah
Sambharanastrayovinsho yonishchaturvinsho garbhah panchavinsha ojastrinavah
Kraturekatrinshah pratishtha trayastrinsho bradhnasya vishtapam chatustrinsho nakah shattrinsho
Vivartoshtachatvarinsho dhartram chatushtomah
14.24
अ॒ग्नेर्भा॒गो॒ऽसि दी॒क्षाया॒ आधि॑पत्यं॒ ब्रह्म॑ स्पृ॒तं त्रि॒वृत्स्तोम॒
इन्द्र॑स्य भा॒गो॒ऽसि॒ विष्णो॒राधि॑पत्यं क्ष॒त्रᳪ स्पृ॒तं प॑ञ्चद॒शः स्तोमो॑
नृ॒चक्ष॑सां भा॒गो॒ऽसि धा॒तुराधि॑पत्यं ज॒नित्र॑ᳪ स्पृ॒तᳪ स॑प्तद॒श स्तोमो
मि॒त्रस्य॑ भा॒गो॒ऽसि॒ वरु॑ण॒स्याधि॑पत्यं दि॒वो वृष्टि॒र्वात॑ स्पृ॒त ए॑कवि॒ᳪश स्तोम॑ः ॥२४॥
Agnerbhagosi dikshaya adhipatyam brahma spritam trivritstoma
Indrasya bhagosi vishnoradhipatyam kshatram spritam panchadashah stomo
Nrichakshasam bhagosi dhaturadhipatyam janitram spritam saptadasha stomo
Mitrasya bhagosi varunasyadhipatyam divo vrishtirvata sprita ekavinsha stomah
14.25
वसू॑नां भा॒गो॒ऽसि रु॒द्राणा॒माधि॑पत्यं॒ चतु॑ष्पात् स्पृ॒तं च॑तुर्वि॒ᳪश स्तोम॑
आदि॒त्यानां॑ भा॒गो॒ऽसि म॒रुता॒माधि॑पत्यं॒ गर्भा॑ स्पृ॒ताः प॑ञ्चवि॒ᳪश॒ स्तोमो
ऽदि॑त्यै भा॒गो॒ऽसि पू॒ष्ण आधि॑पत्य॒मोज॑ स्पृ॒तं त्रि॑ण॒व स्तोमो॑
दे॒वस्य॑ सवि॒तुर्भा॒गो॒ऽसि बृह॒स्पते॒राधि॑पत्यᳪ स॒मीची॒र्दिश॑ स्पृ॒ताश्च॑तुष्टो॒म स्तोम॑ः ॥२५॥
Vasunam bhagosi rudranamadhipatyam chatushpat spritam chaturvinsha stoma
Adityanam bhagosi marutamadhipatyam garbha spritah panchavinsha stomo
Dityai bhagosi pushna adhipatyamoja spritam trinava stomo
Devasya saviturbhagosi brihaspateradhipatyam samichirdisha spritashchatushtoma stomah
14.26
यवा॑नां भा॒गोऽस्यय॑वाना॒माधि॑पत्यं प्र॒जा स्पृ॒ताश्च॑तुश्चत्वारि॒ᳪश स्तोम॑
ऋ॑भू॒णां भा॒गो॒ऽसि विश्वे॑षां दे॒वाना॒माधि॑पत्यं भू॒तᳪ स्पृ॒तं त्र॑यस्त्रि॒ᳪश स्तोम॑ः ॥२६॥
Yavanam bhagosyayavanamadhipatyam praja spritashchatushchatvarinsha stoma
Ribhunam bhagosi vishvesham devanamadhipatyam bhutam spritam trayastrinsha stomah
14.27
सह॑श्च सह॒स्य॒श्च हैम॑न्तिकावृ॒तू अ॒ग्नेर॑न्तः श्ले॒षो॒ऽसि॒ कल्पे॑तां॒ द्यावा॑पृथि॒वी कल्प॑न्ता॒माप॒ ओष॑धय॒ः कल्प॑न्ताम॒ग्नय॒ः पृथ॒ङ्नम॒ ज्यैष्ठ्या॑य॒ सव्र॑ताः।
ये अ॒ग्नय॒ः सम॑नसोऽन्त॒रा द्यावा॑पृथि॒वी इ॒मे| है॑मन्तिकावृ॒तू अ॑भि॒कल्प॑माना॒ इन्द्र॑मिव दे॒वा अ॑भि॒संवि॑शन्तु॒ तया॑ दे॒वत॑याऽङ्गिर॒स्वद् ध्रु॒वे सी॑दतम् ॥२७॥
Sahashcha sahasyashcha haimantikavritu agnerantah shleshosi kalpetam dyavaprithivi kalpantamapa oshadhayah kalpantamagnayah prithannama jyaishthyaya savratah
Ye agnayah samanasontara dyavaprithivi ime, haimantikavritu abhikalpamana indramiva deva abhisanvishantu taya devatayangirasvad dhruve sidatam
14.28
एक॑यास्तुवत प्र॒जा अ॑धीयन्त प्र॒जाप॑ति॒रधि॑पतिरासीत् ति॒सृभि॑रस्तुवत॒ ब्रह्मा॑सृज्यत॒ ब्रह्म॑ण॒स्पति॒रधि॑पतिरासीत् प॒ञ्चभि॑रस्तुवत भू॒तान्य॑सृज्यन्त भू॒तानां॒ पति॒रधि॑पतिरासीत् स॒प्तभि॑रस्तुवत सप्त ऋ॒षयो॑ऽसृज्यन्त धा॒ताऽधि॑पतिरासीत् ॥२८॥
Ekayastuvata praja adhiyanta prajapatiradhipatirasit tisribhirastuvata brahmasrijyata brahmanaspatiradhipatirasit panchabhirastuvata bhutanyasrijyanta bhutanam patiradhipatirasit saptabhirastuvata sapta rishayosrijyanta dhatadhipatirasit
14.29
न॒वभि॑रस्तुवत पि॒तरो॑ऽसृज्य॒न्तादि॑ति॒रधि॑पत्न्यासीदेकाद॒शभि॑रस्तुवत ऋ॒तवो॑ऽसृज्यन्तार्त॒वा अधि॑पतय आसँस्त्रयोद॒शभि॑रस्तुवत॒ मासा॑ असृज्यन्त संवत्स॒रोऽधि॑पतिरासीत् पञ्चद॒शभि॑रस्तुवत क्ष॒त्रम॑सृज्य॒तेन्द्रो॑ऽधि॑पतिरासीत् सप्तद॒शभि॑रस्तुवत ग्रा॒म्याः प॒शवो॑ऽसृज्यन्त॒ बृह॒स्पति॒रधि॑पतिरासीत् ॥२९॥
Navabhirastuvata pitarosrijyantaditiradhipatnyasidekadashabhirastuvata ritavosrijyantartava adhipataya asanstrayodashabhirastuvata masa asrijyanta sanvatsarodhipatirasit panchadashabhirastuvata kshatramasrijyatendrodhipatirasit saptadashabhirastuvata gramyah pashavosrijyanta brihaspatiradhipatirasit
14.30
न॒वद॒शभि॑रस्तुवत शूद्रा॒र्याव॑सृज्येतामहोरा॒त्रे अधि॑पत्नी आस्ता॒मेक॑विᳪशत्यास्तुव॒तैक॑शपाः प॒शवो॑ऽसृज्यन्त॒ वरु॒णोऽधि॑पतिरासी॒त्
त्रयो॑विᳪशत्यास्तुवत क्षु॒द्राः प॒शवो॑ऽसृज्यन्त पू॒षाऽधि॑पतिरासी॒त् पञ्च॑विᳪशत्यास्तुवतार॒ण्याः प॒शवो॑ऽसृज्यन्त वा॒युरधि॑पतिरासीत्
स॒प्तवि॑ᳪशत्याऽस्तुवत॒ द्यावा॑पृथि॒वी व्यै॑तां॒ वस॑वो रु॒द्रा आ॑दि॒त्या अ॑नु॒व्या॒यँ॒स्त ए॒वाधि॑पतय आसन् ॥३०॥
Navadashabhirastuvata shudraryavasrijyetamahoratre adhipatni astamekavinshatyastuvataikashapah pashavosrijyanta varunodhipatirasit
Trayovinshatyastuvata kshudrah pashavosrijyanta pushadhipatirasit panchavinshatyastuvataranyah pashavosrijyanta vayuradhipatirasit
Saptavinshatyastuvata dyavaprithivi vyaitam vasavo rudra aditya anuvyayansta evadhipataya asan
14.31
नव॑विᳪशत्याऽस्तुवत॒ वन॒स्पत॑योऽसृज्यन्त॒ सोमोऽधि॑पतिरासी॒देक॑त्रिᳪशताऽस्तुवत प्र॒जा अ॑सृज्यन्त॒ यवा॒श्चाय॑वा॒श्चाधि॑पतय आसँ॒त्रय॑स्त्रिᳪशताऽस्तुवत भू॒तान्य॑शाम्यन् प्र॒जाप॑तिः परमे॒ष्ठ्यधि॑पतिरासील्लो॒कं ता इन्द्र॑म् ॥३१॥
Navavinshatyastuvata vanaspatayosrijyanta somodhipatirasidekatrinshatastuvata praja asrijyanta yavashchayavashchadhipataya asantrayastrinshatastuvata bhutanyashamyan prajapatih parameshthyadhipatirasillokam ta indram