Adhyaya 7

7.1

Atha saptamodhyayah

वा॒चस्पत॑ये पवस्व॒ वृष्णो॑ अ॒ᳪशुभ्यां॒ गभ॑स्तिपूतः ।
दे॒वो दे॒वेभ्यः॑ पवस्व॒ येषां॑ भा॒गोऽसि॒ मधु॑मतीर्न॒ इष॑स्कृधि ॥१॥

Vachaspataye pavasva vrishno anshubhyam gabhastiputah
Devo devebhyah pavasva yesham bhagosi madhumatirna ishaskridhi

7.2

यत्ते॑ सो॒मादा॑भ्यं॒ नाम॒ जागृ॑वि॒ तस्मै॑ ते सोम॒ सोमा॑य॒ स्वाहा॑ ।
स्वाहो॒र्व॒न्तरि॑क्ष॒मन्वे॑मि॒ स्वाङ्कृ॑तोऽसि॒ विश्वे॑भ्य इन्द्रि॒येभ्यो॑ दि॒व्येभ्यः॒ पार्थि॑वेभ्यः ॥२॥

Yatte somadabhyam nama jagrivi tasmai te soma somaya svaha
Svahorvantarikshamanvemi svankritosi vishvebhya indriyebhyo divyebhyah parthivebhyah

7.3

मन॑स्त्वाष्टु॒ स्वाहा॑ त्वा स्वभवः॒ सूर्या॑य । दे॒वेभ्य॑स्त्वा मरीचि॒पेभ्यो॒ देवा॑ᳪशो॒ यस्मै॒ त्वेळे॑ ॥
तत्स॒त्यमु॑परि॒प्लुता॑ भ॒ङ्गेन॑ ह॒तो॒सौ फट् । प्रा॒णाय॑ त्वा व्या॒नाय॑ त्वा ॥३॥

Manastvashtu svaha tva svabhavah suryaya, devebhyastva marichipebhyo devansho yasmai tvele
Tatsatyamuparipluta bhangena hatosau phat, pranaya tva vyanaya tva

7.4

(१) ३
उ॒प॒या॒मगृ॑हीतो॑ऽस्य॒न्तर्य॑च्छ मघवन् पा॒हि सोम॑म् । उ॒रु॒ष्य रायोवेषो॑ यजस्व ॥१॥

(1) 3
Upayamagrihitosyantaryachchha maghavan pahi somam, urushya rayovesho yajasva

अ॒न्तस्ते॒ द्यावा॑पृथि॒वी द॑धाम्य॒न्तर्द॑धाम्यु॒र्व॒न्तरि॑क्षम् ।
स॒जूर्दे॒वेभि॒रव॑रैः॒ परै॑श्चान्तर्या॒मे म॑घवन् मादयस्व ।
स्वाहो॒र्व॒न्तरि॑क्ष॒मन्वे॑मि॒ स्वाङ्कृ॑तोऽसि॒ विश्वे॑भ्य इन्द्रि॒येभ्यो॑ दि॒व्येभ्यः॒ पार्थि॑वेभ्यः ।
मन॑स्त्वाष्टु॒ स्वाहा॑ त्वा स्वभवः॒ सूर्या॑य । दे॒वेभ्य॑स्त्वा मरीचि॒पेभ्य॑ उदा॒नाय॑ त्वा ॥२॥

Antaste dyavaprithivi dadhamyantardadhamyurvantariksham
Sajurdevebhiravaraih paraishchantaryame maghavan madayasva
Svahorvantarikshamanvemi svankritosi vishvebhya indriyebhyo divyebhyah parthivebhyah
Manastvashtu svaha tva svabhavah suryaya, devebhyastva marichipebhya udanaya tva

7.6

(२) ५
आ वा॑यो भूष शुचिपा॒ उप॑ नः स॒हस्रं॑ ते नि॒युतो॑ विश्ववार ।
उपो॑ ते॒ अन्धो॒ मद्य॑मयामि॒ यस्य॑ देव दधि॒षे पू॑र्व॒पेयं॑ वा॒यवे॑ त्वा ॥१॥

(2) 5
A vayo bhusha shuchipa upa nah sahasram te niyuto vishvavara
Upo te andho madyamayami yasya deva dadhishe purvapeyam vayave tva

7.7

इन्द्र॑वायू इ॒मे सु॒ता उप॒ प्रयो॑भि॒राग॑तम् । इन्द॑वो वामु॒शन्ति॒ हि ।
उ॒प॒या॒मगृ॑हीतोऽसि वा॒यव॑ इन्द्रवा॒युभ्यां॑ त्वै॒ष ते॒ योनिः॑ स॒जोषो॑भ्यां त्वा ॥२॥

Indravayu ime suta upa prayobhiragatam, indavo vamushanti hi
Upayamagrihitosi vayava indravayubhyam tvaisha te yonih sajoshobhyam tva

7.8

(३) ७
अ॒यं वां॑ मित्रावरुणा सु॒तः सोम॑ ऋतावृधा । ममेदि॒ह श्रु॑त॒ᳪ हव॑म् ।
उ॒प॒या॒मगृ॑हीतोऽसि मि॒त्रावरु॑णाभ्यां त्वा ॥१॥

(3) 7
Ayam vam mitravaruna sutah soma ritavridha, mamediha shrutam havam
Upayamagrihitosi mitravarunabhyam tva

7.9

रा॒या व॒यᳪ स॑स॒वाᳪसो॑ मदेम ह॒व्येन॑ दे॒वा यव॑सेन॒ गावः॑ ।
तां धे॒नुं मि॑त्रावरुणा यु॒वं नो॑ वि॒श्वाहा॑ धत्त॒मन॑पस्फुरन्तीम् । ए॒ष ते॒ योनि॑रृता॒युभ्यां॑ त्वा ॥२॥

Raya vayam sasavanso madema havyena deva yavasena gavah
Tam dhenum mitravaruna yuvam no vishvaha dhattamanapasphurantim, esha te yonirritayubhyam tva

7.10

(४) ९ (३४९)
या वां॒ कशा॒ मधु॑म॒त्याश्वि॑ना सू॒नृता॑वती ।
तया॑ य॒ज्ञं मि॑मिक्षतम् ।
उ॒प॒या॒मगृ॑हीतोऽस्य॒श्विभ्यां॑ त्वै॒ष ते॒ योनि॒र्माध्वी॑भ्यां त्वा ॥१॥

(4) 9 (349)
Ya vam kasha madhumatyashvina sunritavati
Taya yagyam mimikshatam
Upayamagrihitosyashvibhyam tvaisha te yonirmadhvibhyam tva

7.11

(५) १०
तं प्र॒त्नथा॑ पू॒र्वथा॑ वि॒श्वथे॒मथा॑ ज्ये॒ष्ठता॑तिं बर्हि॒षद॑ᳪ स्व॒र्विद॑म् ।
प्र॒ती॒ची॒नं वृ॒जनं॑ दोहसे॒ धुनि॑मा॒शुं जय॑न्त॒मनु॒ यासु॒ वर्ध॑से । उ॒प॒या॒मगृ॑हीतोऽसि॒ शण्डा॑य त्वा ॥१॥

(5) 10
Tam pratnatha purvatha vishvathematha jyeshthatatim barhishadam svarvidam
Pratichinam vrijanam dohase dhunimashum jayantamanu yasu vardhase, upayamagrihitosi shandaya tva

7.12

ए॒ष ते॒ योनि॑र्वी॒रतां॑ पा॒ह्यप॑मृष्टः॒ शण्डो॑ दे॒वास्त्वा॑ शुक्र॒पाः प्रण॑य॒न्त्वना॑धृष्टासि ।
सु॒वीरो॑ वी॒रान् प्र॑ज॒नय॒न् परी॑ह्य॒भि रा॒यस्पोषे॑ण॒ यज॑मानम् ।
सं॒ ज॒ग्मा॒नो दि॒वा पृ॑थि॒व्या शु॒क्रः शु॒क्रशो॑चिषा॒ निर॑स्तः॒ शण्डः॑ शु॒क्रस्या॑धि॒ष्ठान॑मसि ॥२॥

Esha te yonirviratam pahyapamrishtah shando devastva shukrapah pranayantvanadhrishtasi
Suviro viran prajanayan parihyabhi rayasposhena yajamanam
Sam jagmano diva prithivya shukrah shukrashochisha nirastah shandah shukrasyadhishthanamasi

7.13

अच्छि॑न्नस्य ते देव सोम सु॒वीर्य॑स्य रा॒यस्पोष॑स्य ददि॒तारः॑ स्याम ।
सा प्र॑थ॒मा सᳪस्कृ॑तिर्वि॒श्ववा॑रा॒ स प्र॑थ॒मो वरु॑णो मि॒त्रो अ॒ग्निः ॥३॥

Achchhinnasya te deva soma suviryasya rayasposhasya daditarah syama
Sa prathama sanskritirvishvavara sa prathamo varuno mitro agnih

7.14

स प्र॑थ॒मो बृह॒स्पति॑श्चिकि॒त्वाᳪस्तस्मा॒ इन्द्रा॑य सु॒तमा जु॑होत॒ स्वाहा॑ ।
तृ॒म्पन्तु॒ होत्रा॒ मधो॒र्यत्स्वि॑ष्टँ॒ यत्सुभृ॑तं॒ यत्स्वाहा॑ ॥४॥

Sa prathamo brihaspatishchikitvanstasma indraya sutama juhota svaha
Trimpantu hotra madhoryatsvishtam yatsubhritam yatsvaha

7.15

(६) १४
अ॒यं वे॒नश्चो॑दय॒त्पृश्नि॑गर्भा॒ ज्योति॑र्जरायू॒ रज॑सो वि॒माने॑ ।
इ॒मम॒पाᳪ सं॑ग॒मे सूर्य॑स्य॒ शिशुं॒ न विप्रा॑ म॒तिभी॑ रिहन्ति ।
उ॒प॒या॒मगृ॑हीतोऽसि॒ मर्का॑य त्वा ॥१॥

(6) 14
Ayam venashchodayatprishnigarbha jyotirjarayu rajaso vimane
Imamapam sangame suryasya shishum na vipra matibhi rihanti
Upayamagrihitosi markaya tva

7.16

मनो॒ न येषु॒ हव॑नेषु ति॒ग्मं विपः॒ शच्या॑ वनु॒थो द्रव॑न्ता ।
आ यः शर्या॑भिस्तुविनृ॒म्णो अ॒स्या श्री॑णीता॒दिशं॒ गभ॑स्तौ ॥२॥

Mano na yeshu havaneshu tigmam vipah shachya vanutho dravanta
A yah sharyabhistuvinrimno asya shrinitadisham gabhastau

7.17

ए॒ष ते॒ योनिः॑ प्र॒जाः पा॒ह्यप॑मृष्टो॒ मर्को॑ दे॒वास्त्वा॑ मन्थि॒पाः प्रण॑य॒न्त्वना॑धृष्टासि ।
सु॒प्र॒जाः प्र॒जाः प्र॑ज॒नय॒न् परी॑ह्य॒भि रा॒यस्पोषे॑ण॒ यज॑मानम् ।
सं॒ज॒ग्मा॒नो दि॒वा पृ॑थि॒व्या म॒न्थी म॒थिशो॑चिषा॒ निर॑स्तो॒ मर्को॑ म॒न्थिनो॑ऽधि॒ष्ठान॑मसि ॥३॥

Esha te yonih prajah pahyapamrishto marko devastva manthipah pranayantvanadhrishtasi
Suprajah prajah prajanayan parihyabhi rayasposhena yajamanam
Sanjagmano diva prithivya manthi mathishochisha nirasto marko manthinodhishthanamasi

7.18

अच्छि॑न्नस्य ते देव सोम सु॒वीर्य॑स्य ददि॒तारः॑ स्याम।
सा प्र॑थ॒मा सᳪस्कृ॑तिर्वि॒श्ववा॑रा॒ स प्र॑थ॒मो वरु॑णो मि॒त्रो अ॒ग्निः ॥४॥

Achchhinnasya te deva soma suviryasya daditarah syama
Sa prathama sanskritirvishvavara sa prathamo varuno mitro agnih

7.19

स प्र॑थ॒मो बृह॒स्पति॑श्चिकिᳪस्तस्मा॒ इन्द्रा॑य सु॒तमा जु॑होत॒ स्वाहा॑।
तृ॒म्पन्तु॒ होत्रा॒ भधो॒र्यत्स्वि॑ष्टं॒ यत्सुभृ॑तं॒ यत्स्वाहा॑ ॥५॥

Sa prathamo brihaspatishchikinstasma indraya sutama juhota svaha
Trimpantu hotra bhadhoryatsvishtam yatsubhritam yatsvaha

7.20

(७) १९
ये दे॑वासो दि॒व्येका॑दश॒ स्थ पृ॑थि॒व्यामध्येका॑दश॒ स्थ ।
अ॒प्सु॒क्षितो॑ महि॒नैका॑दश॒ स्थ ते दे॑वासो य॒ज्ञमि॒मं जु॑षध्वम् ॥१॥

(7) 19
Ye devaso divyekadasha stha prithivyamadhyekadasha stha
Apsukshito mahinaikadasha stha te devaso yagyamimam jushadhvam

7.21

उ॒प॒या॒मगृ॑हीतोऽस्याग्रय॒णो॑ऽसि॒ स्वा॑ग्रयणः । पा॒हि य॒ज्ञं पा॒हि य॒ज्ञप॑तिम् ॥२॥

Upayamagrihitosyagrayanosi svagrayanah, pahi yagyam pahi yagyapatim

7.22

२१(३६१)
विष्णु॒स्त्वामि॑न्द्रि॒येण॑ पातु॒ विष्णुं॒ त्वं पा॑ह्य॒भि सव॑नानि पाहि ।
सोमः॑ पवते॒ सोमः॑ पवते॒ सोमः पवते ॥३॥

21(361)
Vishnustvamindriyena patu vishnum tvam pahyabhi savanani pahi
Somah pavate somah pavate somah pavate

7.23

अ॒स्मै ब्रह्म॑णे पवते॒ऽस्मै क्ष॒त्राय॑ पवते॒ऽस्मै सु॑न्व॒ते यज॑मानाय पवते ।
इ॒ष ऊ॒र्जे प॑वते॒ऽद्भ्य ओष॑धीभ्यः पवते॒ द्यावा॑पृथि॒वीभ्यां॑ पवते सुभू॒ताय॑ पवते ब्रह्मवर्च॒साय॑ पवते।
विश्वे॑भ्यस्त्वा दे॒वेभ्यः॑ ए॒ष ते॒ योनि॒र्विश्वे॑भ्यस्त्वा दे॒वेभ्यः॑ ॥४॥

Asmai brahmane pavatesmai kshatraya pavatesmai sunvate yajamanaya pavate
Isha urje pavatedbhya oshadhibhyah pavate dyavaprithivibhyam pavate subhutaya pavate brahmavarchasaya pavate
Vishvebhyastva devebhyah esha te yonirvishvebhyastva devebhyah

7.24

(८) २३
उ॒प॒या॒मगृ॑हीतो॒ऽसीन्द्रा॑य त्वा बृ॒हद्व॑ते॒ वय॑स्वत उक्था॒युवं॑ गृह्णामि ।
यत्त॑ इन्द्र बृ॒हद्व॑य॒स्तस्मै॑ त्वा॒ विष्ण॑वे त्वै॒षते॒ योनि॑रु॒क्थेभ्य॑स्त्वा ॥१॥

(8) 23
Upayamagrihitosindraya tva brihadvate vayasvata ukthayuvam grihnami
Yatta indra brihadvayastasmai tva vishnave tvaishate yonirukthebhyastva

7.25

दे॒वेभ्य॑स्त्वा देवा॒युवं॑ गृह्णामि य॒ज्ञस्यायु॑षे मि॒त्रावरु॑णाभ्यां त्वा देवा॒युवं॑ गृह्णामि य॒ज्ञस्यायु॑षे ।
इन्द्रा॑य त्वा देवा॒युवं॑ गृह्णामि य॒ज्ञस्यायु॑ष इन्द्रा॒ग्निभ्यां॑ त्वा देवा॒युवं॑ गृह्णामि य॒ज्ञस्यायु॑षे ।
इन्द्रा॑य त्वा देवायुवं॑ गृह्णामि य॒ज्ञस्यायु॑ष॒ इन्द्रा॒वरु॑णाभ्यां त्वा देवा॒युवं॑ गृह्णामि य॒ज्ञस्यायु॑षे ।
इन्द्रा॒बृह॒स्पति॑भ्यां त्वा देवा॒युवं॑ गृह्णामि य॒ज्ञस्यायु॑ष॒ इन्द्रा॒विष्णु॑भ्यां त्वा देवा॒युवं॑ गृह्णामि य॒ज्ञस्यायु॑षे ॥२॥

Devebhyastva devayuvam grihnami yagyasyayushe mitravarunabhyam tva devayuvam grihnami yagyasyayushe
Indraya tva devayuvam grihnami yagyasyayusha indragnibhyam tva devayuvam grihnami yagyasyayushe
Indraya tva devayuvam grihnami yagyasyayusha indravarunabhyam tva devayuvam grihnami yagyasyayushe
Indrabrihaspatibhyam tva devayuvam grihnami yagyasyayusha indravishnubhyam tva devayuvam grihnami yagyasyayushe

7.26

(९) २५
मू॒र्धानं॑ दि॒वो अ॑र॒तिं पृ॑थि॒व्या वै॑श्वान॒रमृ॒त आ जा॒तम॒ग्निम् ।
क॒विᳪ स॒म्राज॒मति॑थिं॒ जना॑नामा॒सन्ना पात्रं॑ जनयन्त दे॒वाः ॥१॥

(9) 25
Murdhanam divo aratim prithivya vaishvanaramrita a jatamagnim
Kavim samrajamatithim jananamasanna patram janayanta devah

7.27

उ॒प॒या॒मगृ॑हीतोऽसि ध्रु॒वो॑ऽसि ध्रु॒वक्षि॑तिर्ध्रु॒वाणां॑ ध्रु॒वत॒मोऽच्यु॑तानामच्युत॒क्षित्त॑मः ।
ए॒ष ते॒ योनि॑र्वैश्वान॒राय॑ त्वा ॥२॥

Upayamagrihitosi dhruvosi dhruvakshitirdhruvanam dhruvatamochyutanamachyutakshittamah
Esha te yonirvaishvanaraya tva

7.28

ध्रु॒वं ध्रु॒वेण॒ मन॑सा वा॒चा सोम॒मव॑नयामि । अथा॑ न॒ इन्द्र॒ इद्विशो॑ सप॒त्नाः सम॑नस॒स्कर॑त् ॥३॥

Dhruvam dhruvena manasa vacha somamavanayami, atha na indra idvisho sapatnah samanasaskarat

7.29

(१०) २८
यस्ते॑ द्र॒प्स स्कन्द॑ति॒ यस्ते॑ अ॒ᳪशुर्ग्राव॑च्युतो धि॒षण॑योरु॒पस्था॑त् ।
अ॒ध्व॒र्योर्वा॒ परि॑ वा॒ यः प॒वित्रा॒त्तं ते॑ जुहोमि॒ मन॑सा॒ वष॑ट्कृत॒ᳪ स्वाहा॑ दे॒वाना॑मु॒त्क्रम॑णमसि ॥१॥

(10) 28
Yaste drapsa skandati yaste anshurgravachyuto dhishanayorupasthat
Adhvaryorva pari va yah pavitrattam te juhomi manasa vashatkritam svaha devanamutkramanamasi

7.30

(११) २९
उ॒प॒या॒मगृ॑हीतोऽसि॒ मध॑वे त्वोपया॒मगृ॑हीतोऽसि॒ माध॑वाय त्वा ।
उ॒प॒या॒मगृ॑हीतोऽसि शु॒क्राय॑ त्वोपया॒मगृ॑हीतोऽसि॒ शुच॑ये त्वा ।
उ॒प॒या॒मगृ॑हीतोऽसि॒ नभ॑से त्वोपया॒मगृ॑हीतोऽसि॒ नभ॒स्या॑य त्वा ।
उ॒प॒या॒मगृ॑हीतोऽसी॒षे त्वो॑पया॒मगृ॑हीतो स्यू॒र्जे त्वा॑ ।
उ॒प॒या॒मगृ॑हीतोऽसि॒ सह॑से त्वोपया॒मगृ॑हीतोऽसि सह॒स्या॑य त्वा ।
उ॒प॒या॒मगृ॑हीतोऽसि॒ तप॑से त्वोपया॒मगृ॑हीतोऽसि तप॒स्या॑य त्वा ।
उ॒प॒या॒मगृ॑हीतोऽस्यᳪ हसस्प॒तये॑ त्वा ॥१॥

(11) 29
Upayamagrihitosi madhave tvopayamagrihitosi madhavaya tva
Upayamagrihitosi shukraya tvopayamagrihitosi shuchaye tva
Upayamagrihitosi nabhase tvopayamagrihitosi nabhasyaya tva
Upayamagrihitosishe tvopayamagrihito syurje tva
Upayamagrihitosi sahase tvopayamagrihitosi sahasyaya tva
Upayamagrihitosi tapase tvopayamagrihitosi tapasyaya tva
Upayamagrihitosyam hasaspataye tva

Contains text from DharmicData, made available under the Open Database License (ODbL). Simple meanings are written by AI and can contain mistakes.