Adhyaya 30

30.1

Atha trinshodhyayah

होता॑ यक्षत्स॒मिधेन्द्र॑मि॒ळस्प॒दे नाभा॑ पृथि॒व्या अधि॑ ।
दि॒वो वर्ष्म॒न्त्समि॑ध्यत॒ ओजि॑ष्ठश्चर्षणी॒सहां॒ वेत्वाज्य॑स्य॒ होत॒र्यज॑ ॥१॥

Hota yakshatsamidhendramilaspade nabha prithivya adhi
Divo varshmantsamidhyata ojishthashcharshanisaham vetvajyasya hotaryaja

30.2

होता॑ यक्ष॒त्तनू॒नपा॑तमू॒तिभि॒र्जेता॑र॒मप॑राजितम् ।
इन्द्रं॑ दे॒वᳪ स्व॒र्विदं॑ प॒थिभि॒र्मधु॑मत्तमै॒र्नरा॒शᳪसे॑न॒ तेज॑सा॒ वेत्वाज्य॑स्य॒ होत॒र्यज॑ ॥२॥

Hota yakshattanunapatamutibhirjetaramaparajitam
Indram devam svarvidam pathibhirmadhumattamairnarashansena tejasa vetvajyasya hotaryaja

30.3

होता॑ यक्ष॒दिळा॑भि॒रिन्द्र॑मीळि॒तमा॒जुह्वा॑न॒मम॑र्त्यम् ।
दे॒वो देवैः॒ सवी॑र्यो॒ वज्र॑हस्तः पुरंद॒रो वेत्वाज्य॑स्य॒ होत॒र्यज॑ ॥३॥

Hota yakshadilabhirindramilitamajuhvanamamartyam
Devo devaih saviryo vajrahastah purandaro vetvajyasya hotaryaja

30.4

होता॒ यक्ष॑द्ब॒र्हिषीन्द्रं॑ निषद्व॒रं वृ॑ष॒भं नर्या॑पसम् ।
वसु॑भी रुद्रैरा॑दि॒त्यैः सु॒युग्भि॑र्ब॒र्हिरास॑द॒द्वेत्वाज्य॑स्य॒ होत॒र्यज॑ ॥४॥

Hota yakshadbarhishindram nishadvaram vrishabham naryapasam
Vasubhi rudrairadityaih suyugbhirbarhirasadadvetvajyasya hotaryaja

30.5

होता॑ यक्ष॒दोजो॒ न वी॒र्य॒ᳪ सहो॒ द्वार॒ इन्द्र॑मवर्धयन् ।
सु॒प्रा॒य॒णा अ॒स्मिन्य॒ज्ञे वि श्र॑यन्तामृता॒वृधो॒ द्वार॒ इन्द्रा॑य मी॒ळहुषे॒ व्यन्त्वाज्य॑स्य॒ होत॒र्यज॑ ॥५॥

Hota yakshadojo na viryam saho dvara indramavardhayan
Suprayana asminyagye vi shrayantamritavridho dvara indraya milahushe vyantvajyasya hotaryaja

30.6

होता॑ यक्षदु॒षे इन्द्र॑स्य धे॒नू सु॒दुघे॑ मा॒तरा॑ म॒ही ।
स॒वा॒तरौ॒ न तेज॑सा व॒त्समिन्द्र॑मवर्धतां वी॒तामाज्य॑स्य॒ होत॒र्यज॑ ॥६॥

Hota yakshadushe indrasya dhenu sudughe matara mahi
Savatarau na tejasa vatsamindramavardhatam vitamajyasya hotaryaja

30.7

होता॑ यक्ष॒द्दैव्या॒ होता॑रा भि॒षजा॒ सखा॑या ह॒विषेन्द्रं॑ भिषज्यतः ।
क॒वी देवौ॒ प्रचे॑तसा॒ इन्द्रा॑य धत्त इन्द्रि॒यं वी॒तामाज्य॑स्य॒ होत॒र्यज॑ ॥७॥

Hota yakshaddaivya hotara bhishaja sakhaya havishendram bhishajyatah
Kavi devau prachetasa indraya dhatta indriyam vitamajyasya hotaryaja

30.8

होता॑ यक्षत्ति॒स्रो दे॒वीर्न भे॑ष॒जं त्रय॑स्त्रि॒धात॑वो॒ऽपस॒ इळा॒ सर॑स्वती॒ भार॑ती म॒हीः ।
इन्द्र॑पत्नीर्ह॒विष्म॑ती॒र्व्यन्त्वाज्य॑स्य॒ होत॒र्यज॑ ॥८॥

Hota yakshattisro devirna bheshajam trayastridhatavopasa ila sarasvati bharati mahih
Indrapatnirhavishmatirvyantvajyasya hotaryaja

30.9

होता॑ यक्ष॒त्त्वष्टा॑र॒मिन्द्रं॑ दे॒वं भि॒षज॑ᳪ सु॒यजं॑ घृत॒श्रिय॑म् ।
पु॒रु॒रूप॑ᳪ सु॒रेत॑सं म॒घोन॒मिन्द्रा॑य॒ त्वष्टा॒ दध॑दिन्द्रि॒याणि॒ वेत्वाज्य॑स्य॒ होत॒र्यज॑ ॥९॥

Hota yakshattvashtaramindram devam bhishajam suyajam ghritashriyam
Pururupam suretasam maghonamindraya tvashta dadhadindriyani vetvajyasya hotaryaja

30.10

९ (१६९०)
होता॑ यक्ष॒द्वन॒स्पति॑ᳪ शमि॒तार॑ᳪ श॒तक्र॑तुं धि॒यो जो॒ष्टार॑मिन्द्रि॒यम् ।
मध्वा॑ सम॒ञ्जन्प॒थिभिः॑ सु॒गेभिः॒ स्वदा॑ति य॒ज्ञं मधु॑ना घृ॒तेन॒ वेत्वाज्य॑स्य॒ होत॒र्यज॑ ॥१०॥

9 (1690)
Hota yakshadvanaspatim shamitaram shatakratum dhiyo joshtaramindriyam
Madhva samanjanpathibhih sugebhih svadati yagyam madhuna ghritena vetvajyasya hotaryaja

30.11

होता॑ यक्ष॒दिन्द्र॒ᳪ स्वाहाज्य॑स्य॒ स्वाहा॒ मेद॑सः॒ स्वाहा॑ स्तो॒काना॒ᳪ स्वाहा॒ स्वाहा॑कृतीना॒ᳪ स्वाहा॑ ह॒व्यसू॑क्तीनाम् ।
स्वाहा॑ दे॒वा आ॑ज्य॒पा जु॑षा॒णा इन्द्र॒ आज्य॑स्य॒ व्यन्तु॒ होत॒र्यज॑ ॥११॥

Hota yakshadindram svahajyasya svaha medasah svaha stokanam svaha svahakritinam svaha havyasuktinam
Svaha deva ajyapa jushana indra ajyasya vyantu hotaryaja

30.12

(१) ११
दे॒वं ब॒र्हिरिन्द्र॑ᳪ सुदे॒वं दे॒वैर्वी॒रव॑त्स्ती॒र्णं वेद्या॑मवर्धयत् ।
वस्तो॑र्वृ॒तं प्राक्तोर्भृ॒तᳪ रा॒या ब॒र्हिष्म॒तोऽत्य॑गाद्वसु॒वने॑ वसु॒धेय॑स्य वेतु॒ यज॑ ॥१॥

(1) 11
Devam barhirindram sudevam devairviravatstirnam vedyamavardhayat
Vastorvritam praktorbhritam raya barhishmatotyagadvasuvane vasudheyasya vetu yaja

30.13

दे॒वीर्द्वार॒ इन्द्र॑ᳪ संघा॒ते वी॒ड्वीर्याम॑न्नवर्धयन् । आ व॒त्सेन॒ तरु॑णेन कुमा॒रेण॑ च मीव॒तापार्वा॑णᳪ
रे॒णुक॑काटं नुदन्ताँ वसु॒वने॑ वसु॒धेय॑स्य व्यन्तु॒ यज॑ ॥२॥

Devirdvara indram sanghate vidviryamannavardhayan, a vatsena tarunena kumarena cha mivataparvanam
Renukakatam nudantam vasuvane vasudheyasya vyantu yaja

30.14

दे॒वी उ॒षासा॒नक्तेन्द्रं॑ य॒ज्ञे प्र॑य॒त्य॑ह्वेताम् ।
दैवी॒र्विशः॒ प्राया॑सिष्टा॒ᳪ सुप्री॑ते॒ सुधि॑ते वसु॒वने॑ वसु॒धेय॑स्य वीतां॒ यज॑ ॥३॥

Devi ushasanaktendram yagye prayatyahvetam
Daivirvishah prayasishtam suprite sudhite vasuvane vasudheyasya vitam yaja

30.15

दे॒वी जोष्ट्री॒ वसु॑धिती दे॒वमिन्द्र॑मवर्धताम् । अया॑व्य॒न्याघा द्वेषा॒ᳪस्यान्या व॑क्ष॒द्वसु॒ वार्या॑णि॒
यज॑मानाय शिक्षि॒ते व॑सु॒वने॑ वसु॒धेय॑स्य वीतां॒ यज॑ ॥४॥

Devi joshtri vasudhiti devamindramavardhatam, ayavyanyagha dveshansyanya vakshadvasu varyani
Yajamanaya shikshite vasuvane vasudheyasya vitam yaja

30.16

दे॒वी ऊ॒र्जाहु॑ती॒ दुघे॒ पय॒सेन्द्र॑मवर्धताम् ।
इष॒मूर्ज॑म॒न्या व॑क्ष॒त्सग्धि॒ᳪ सपी॑तिम॒न्या नवे॑न॒ पूर्वं॒ दय॑माने पुरा॒णेन॒ नव॒मधा॑ता॒मूर्ज॑मू॒र्जाहु॑ती
ऊ॒र्जय॑माने॒ वसु॒ वार्या॑णि॒ यज॑मानाय शिक्षि॒ते व॑सु॒वने॑ वसु॒धेय॑स्य वीतां॒ यज॑ ॥१६॥

Devi urjahuti dughe payasendramavardhatam
Ishamurjamanya vakshatsagdhim sapitimanya navena purvam dayamane puranena navamadhatamurjamurjahuti
Urjayamane vasu varyani yajamanaya shikshite vasuvane vasudheyasya vitam yaja

30.17

दे॒वा दे॑व्या॒ होता॑रा दे॒वमिन्द्र॑मवर्धताम् ।
ह॒ताघ॑शᳪसा॒ आभा॑र्ष्टां॒ वसु॒ वार्या॑णि॒ यज॑मानाय शिक्षि॒तौ व॑सु॒वने॑ वसु॒धेय॑स्य वीतां॒ यज॑ ॥६॥

Deva devya hotara devamindramavardhatam
Hataghashansa abharshtam vasu varyani yajamanaya shikshitau vasuvane vasudheyasya vitam yaja

30.18

दे॒वीस्ति॒स्रस्ति॒स्रो दे॒वीः पति॒मिन्द्र॑मवर्धयन् ।
अस्पृ॑क्ष॒द्भार॑ती॒ दिव॑ᳪ रुद्रैर्य॒ज्ञᳪ सर॑स्व॒तीळा॒ वसु॑मती
गृ॒हान्व॑सु॒वने॑ वसु॒धेय॑स्य व्यन्तु॒ यज॑ ॥७॥

Devistisrastisro devih patimindramavardhayan
Asprikshadbharati divam rudrairyagyam sarasvatila vasumati
Grihanvasuvane vasudheyasya vyantu yaja

30.19

दे॒व इन्द्रो॒ नरा॒शᳪस॑स्त्रिवरू॒थस्त्रि॑बन्धु॒रो दे॒वमिन्द्र॑मवर्धयत् ।
श॒तेन॑ शितिपृ॒ष्ठाना॒माहि॑तः स॒हस्रे॑ण॒ प्र व॑र्तते मि॒त्रावरु॒णेद॑स्य हो॒त्रमर्ह॑तो॒ बृह॒स्पति॑
स्तो॒त्रम॒श्विनाध्व॑र्यवं वसु॒वने॑ वसु॒धेय॑स्य वेतु॒ यज॑ ॥८॥

Deva indro narashansastrivaruthastribandhuro devamindramavardhayat
Shatena shitiprishthanamahitah sahasrena pra vartate mitravarunedasya hotramarhato brihaspati
Stotramashvinadhvaryavam vasuvane vasudheyasya vetu yaja

30.20

दे॒वो देवै॒र्वन॒स्पति॒र्हिर॑ण्यपर्णो॒ मधु॑शाखः सुपिप्प॒लो दे॒वमिन्द्र॑मवर्धयत् ।
दिव॒मग्रे॑णास्पृक्ष॒दान्तरि॑क्षं पृथि॒वीम॑दृᳪहीद्वसु॒वने॑ वसु॒धेय॑स्य वेतु॒ यज॑ ॥९॥

Devo devairvanaspatirhiranyaparno madhushakhah supippalo devamindramavardhayat
Divamagrenasprikshadantariksham prithivimadrinhidvasuvane vasudheyasya vetu yaja

30.21

दे॒वं ब॒र्हिर्वारि॑तीनां दे॒वमिन्द्र॑मवर्धयत् ।
स्वा॒स॒स्थमिन्द्रे॒णास॑न्नम॒न्या ब॒र्हीᳪष्य॒भ्य॑भूद्वसु॒वने॑ वसु॒धेय॑स्य वेतु॒ यज॑ ॥१०॥

Devam barhirvaritinam devamindramavardhayat
Svasasthamindrenasannamanya barhinshyabhyabhudvasuvane vasudheyasya vetu yaja

30.22

२१ (१७०२)
दे॒वो अ॒ग्निः स्वि॑ष्ट॒कृद्दे॒वमिन्द्र॑मवर्धयत् ।
स्वि॑ष्टं कु॒र्वन् त्स्वि॑ष्ट॒कृत्स्वि॑ष्टम॒द्य क॑रोतु नो वसु॒वने॑ वसु॒धेय॑स्य वेतु॒ यज॑ ॥११॥

21 (1702)
Devo agnih svishtakriddevamindramavardhayat
Svishtam kurvan tsvishtakritsvishtamadya karotu no vasuvane vasudheyasya vetu yaja

30.23

अ॒ग्निम॒द्य होता॑रमवृणीता॒यं यज॑मानः॒ पच॒न्पक्तीः॒ पच॑न्पुरो॒ळाशं॑ ब॒ध्नन्निन्द्रा॑य॒ च्छाग॑म् ।
सू॒प॒स्था अ॒द्य दे॒वो वन॒स्पति॑रभव॒दिन्द्रा॑य॒ च्छागे॑न ।
अघ॒त्तं मे॑द॒स्तः प्रति॑ पच॒ताग्र॑भी॒दवी॑वृधत्पुरो॒ळाशे॑न ।त्वाम॒द्य ऋ॑षे ॥१२॥

Agnimadya hotaramavrinitayam yajamanah pachanpaktih pachanpurolasham badhnannindraya chchhagam
Supastha adya devo vanaspatirabhavadindraya chchhagena
Aghattam medastah prati pachatagrabhidavivridhatpurolashena, tvamadya rishe

30.24

(२) २३
होता॑ यक्षत्समिधा॒नं म॒हद्यशः॒ सुस॑मिद्धं॒ वरे॑ण्यम॒ग्निमिन्द्रं॑ वयो॒धस॑म् ।
गा॒य॒त्रीं छन्द॑ इन्द्रि॒यं त्र्यविं॒ गां वयो॒ दध॒द्वेत्वाज्य॑स्य॒ होत॒र्यज॑ ॥१॥

(2) 23
Hota yakshatsamidhanam mahadyashah susamiddham varenyamagnimindram vayodhasam
Gayatrim chhanda indriyam tryavim gam vayo dadhadvetvajyasya hotaryaja

30.25

होता॑ यक्ष॒त्तनू॒नपा॑तमु॒द्भिदं॒ यं गर्भ॒मदि॑तिर्द॒धे शुचि॒मिन्द्रं॑ वयो॒धस॑म् ।
उ॒ष्णिहं॒ छन्द॑ इन्द्रि॒यं दि॑त्य॒वाहं॒ गां वयो॒ दध॒द्वेत्वाज्य॑स्य॒ होत॒र्यज॑ ॥२॥

Hota yakshattanunapatamudbhidam yam garbhamaditirdadhe shuchimindram vayodhasam
Ushniham chhanda indriyam dityavaham gam vayo dadhadvetvajyasya hotaryaja

30.26

होता॑ यक्षदी॒ळेन्य॑मीळि॒तं वृ॑त्र॒हन्त॑म॒मिळा॑भि॒रीड्य॒ᳪ सहः॒ सोम॒मिन्द्रं॑ वयो॒धस॑म् ।
अ॒नु॒ष्टुभं॒ छन्द॑ इन्द्रि॒यं पञ्चा॑विं॒ गां वयो॒ दध॒द्वेत्वाज्य॑स्य॒ होत॒र्यज॑ ॥३॥

Hota yakshadilenyamilitam vritrahantamamilabhiridyam sahah somamindram vayodhasam
Anushtubham chhanda indriyam panchavim gam vayo dadhadvetvajyasya hotaryaja

30.27

होता॑ यक्षत्सुब॒र्हिषं॑ पूष॒ण्वन्त॒मम॑र्त्य॒ᳪ सीद॑न्तं ब॒र्हिषि॑ प्रि॒ये॒ऽमृतेन्द्रं॑ वयो॒धस॑म् ।
बृ॒ह॒तीं छन्द॑ इन्द्रि॒यं त्रि॑व॒त्सं गां व॑यो॒ दध॒द्वेत्वाज्य॑स्य॒ होत॒र्यज॑ ॥४॥

Hota yakshatsubarhisham pushanvantamamartyam sidantam barhishi priyemritendram vayodhasam
Brihatim chhanda indriyam trivatsam gam vayo dadhadvetvajyasya hotaryaja

30.28

होता॑ यक्ष॒द्व्यच॑स्वतीः सुप्राय॒णा ऋ॑ता॒वृधो॒ द्वारो॑ दे॒वीर्हि॑र॒ण्ययी॑र्ब्र॒ह्माण॒मिन्द्रं॑ वयो॒धस॑म् ।
प॒ङ्क्तिं छन्द॑ इ॒हेन्द्रि॒यं तु॑र्य॒वाहं॒ गां वयो॒ दध॒द्व्यन्त्वाज्य॑स्य॒ होत॒र्यज॑ ॥५॥

Hota yakshadvyachasvatih suprayana ritavridho dvaro devirhiranyayirbrahmanamindram vayodhasam
Panktim chhanda ihendriyam turyavaham gam vayo dadhadvyantvajyasya hotaryaja

30.29

होता॑ यक्षत्सु॒पेश॑सा सुशि॒ल्पे बृ॑ह॒ती उ॒भे नक्तो॒षासा॒ न द॑र्श॒ते विश्व॒मिन्द्रं॑ वयो॒धस॑म् ।
त्रि॒ष्टुभं॒ छन्द॑ इ॒हेन्द्रि॒यं प॑ष्ठ॒वाहं॒ गां वयो॒ दध॑द्वी॒तामाज्य॑स्य॒ होत॒र्यज॑ ॥६॥

Hota yakshatsupeshasa sushilpe brihati ubhe naktoshasa na darshate vishvamindram vayodhasam
Trishtubham chhanda ihendriyam pashthavaham gam vayo dadhadvitamajyasya hotaryaja

30.30

होता॑ यक्ष॒त्प्रचे॑तसा दे॒वाना॑मुत्त॒मं यशो॒ होता॑रा॒ दैव्या॑ क॒वी स॒युजेन्द्रं॑ वयो॒धस॑म् ।
जग॑तीं॒ छन्द॑ इन्द्रि॒यम॑न॒ड्वाहं॒ गां वयो॒ दध॑द्वी॒तामाज्य॑स्य॒ होत॒र्यज॑ ॥७॥

Hota yakshatprachetasa devanamuttamam yasho hotara daivya kavi sayujendram vayodhasam
Jagatim chhanda indriyamanadvaham gam vayo dadhadvitamajyasya hotaryaja

30.31

होता॑ यक्ष॒त्पेश॑स्वतीस्ति॒स्रो दे॒वीर्हि॑र॒ण्ययी॒र्भार॑तीर्बृह॒तीर्म॒हीः पति॒मिन्द्रं॑ वयो॒धस॑म् ।
वि॒राजं॒ छन्द॑ इ॒हेन्द्रि॒यं धे॒नुं गां न वयो॒ दध॒द्व्यन्त्वाज्य॑स्य॒ होत॒र्यज॑ ॥८॥

Hota yakshatpeshasvatistisro devirhiranyayirbharatirbrihatirmahih patimindram vayodhasam
Virajam chhanda ihendriyam dhenum gam na vayo dadhadvyantvajyasya hotaryaja

30.32

होता॑ यक्षत्सु॒रेत॑सं॒ त्वष्टा॑रं पुष्टि॒वर्ध॑नᳪ रू॒पाणि॒ बिभ्र॑तं॒ पृथ॒क् पुष्टि॒मिन्द्रं॑ वयो॒धस॑म् ।
द्वि॒पदं॒ छन्द॑ इन्द्रि॒यमु॒क्षाणं॒ गां न वयो॒ दध॒द्वेत्वाज्य॑स्य॒ होत॒र्यज॑ ॥९॥

Hota yakshatsuretasam tvashtaram pushtivardhanam rupani bibhratam prithak pushtimindram vayodhasam
Dvipadam chhanda indriyamukshanam gam na vayo dadhadvetvajyasya hotaryaja

30.33

होता॑ यक्ष॒द्वन॒स्पति॑ᳪ शमि॒तार॑ᳪ श॒तक्र॑तु॒ᳪ
हिर॑ण्यपर्णमु॒क्थिन॑ᳪ रश॒नां बिभ्र॑तं व॒शिं भग॒मिन्द्रं॑ वयो॒धस॑म् ।
क॒कुभं॒ छन्द॑ इ॒हेन्द्रि॒यं व॒शां वे॒हतं॒ गां वयो॒ दध॒द्वेत्वाज्य॑स्य॒ होत॒र्यज॑ ॥१०॥

Hota yakshadvanaspatim shamitaram shatakratum
Hiranyaparnamukthinam rashanam bibhratam vashim bhagamindram vayodhasam
Kakubham chhanda ihendriyam vasham vehatam gam vayo dadhadvetvajyasya hotaryaja

30.34

होता॑ यक्ष॒त्स्वाहा॑कृतीर॒ग्निं गृ॒हप॑तिं॒ पृथ॒ग्वरु॑णं भेष॒जं क॒विं क्ष॒त्रमिन्द्रं॑ वयो॒धस॑म् ।
अति॑च्छन्दसं॒ छन्द॑ इन्द्रि॒यं बृ॒हदृ॑ष॒भं गां वयो॒ दध॒द्व्यन्त्वाज्य॑स्य॒ होत॒र्यज॑ ॥११॥

Hota yakshatsvahakritiragnim grihapatim prithagvarunam bheshajam kavim kshatramindram vayodhasam
Atichchhandasam chhanda indriyam brihadrishabham gam vayo dadhadvyantvajyasya hotaryaja

30.35

(३) ३४ (१७१५)
दे॒वं ब॒र्हिर्व॑यो॒धसं॑ दे॒वमिन्द्र॑मवर्धयत् ।
गा॒य॒त्र्या छन्द॑सेन्द्रि॒यं चक्षु॒रिन्द्रे॒ वयो॒ दध॑द्वसु॒वने॑ वसु॒धेय॑स्य वेतु॒ यज॑ ॥१॥

(3) 34 (1715)
Devam barhirvayodhasam devamindramavardhayat
Gayatrya chhandasendriyam chakshurindre vayo dadhadvasuvane vasudheyasya vetu yaja

30.36

दे॒वीर्द्वारो॑ वयो॒धस॒ᳪ शुचि॒मिन्द्र॑मवर्धयन् ।
उ॒ष्णिहा॒ छन्द॑सेन्द्रि॒यं प्रा॒णमिन्द्रे॒ वयो॒ दध॑द्वसु॒वने॑ वसु॒धेय॑स्य व्यन्तु॒ यज॑ ॥२॥

Devirdvaro vayodhasam shuchimindramavardhayan
Ushniha chhandasendriyam pranamindre vayo dadhadvasuvane vasudheyasya vyantu yaja

30.37

दे॒वी उ॒षासा॒नक्ता॑ दे॒वमिन्द्रं॑ वयो॒धसं॑ दे॒वी दे॒वम॑वर्धताम् ।
अ॒नु॒ष्टुभा॒ छन्द॑सेन्द्रि॒यं बल॒मिन्द्रे॒ वयो॒ दध॑द्वसु॒वने॑ वसु॒धेय॑स्य वीतां॒ यज॑ ॥३॥

Devi ushasanakta devamindram vayodhasam devi devamavardhatam
Anushtubha chhandasendriyam balamindre vayo dadhadvasuvane vasudheyasya vitam yaja

30.38

दे॒वी जोष्ट्री॒ वसु॑धिती दे॒वमिन्द्रं॑ वयो॒धसं॑ दे॒वी दे॒वम॑वर्धताम् ।
बृ॒ह॒त्या छन्द॑सेन्द्रि॒यᳪ श्रोत्र॒मिन्द्रे॒ वयो॒ दध॑द्वसु॒वने॑ वसु॒धेय॑स्य वीतां॒ यज॑ ॥४॥

Devi joshtri vasudhiti devamindram vayodhasam devi devamavardhatam
Brihatya chhandasendriyam shrotramindre vayo dadhadvasuvane vasudheyasya vitam yaja

30.39

दे॒वी ऊ॒र्जाहु॑ती॒ दुघे॑ सु॒दुघे॒ पय॒सेन्द्रं॑ वयो॒धसं॑ दे॒वी दे॒वम॑वर्धताम् ।
प॒ङ्क्त्या छन्द॑सेन्द्रि॒यᳪ शु॒क्रमिन्द्रे॒ वयो॒ दध॑द्वसु॒वने॑ वसु॒धेय॑स्य वीतां॒ यज॑ ॥५॥

Devi urjahuti dughe sudughe payasendram vayodhasam devi devamavardhatam
Panktya chhandasendriyam shukramindre vayo dadhadvasuvane vasudheyasya vitam yaja

30.40

दे॒वा दैव्या॒ होता॑रा दे॒वमिन्द्रं॑ वयो॒धसं॑ दे॒वौ दे॒वम॑वर्धताम् ।
त्रि॒ष्टुभा॒ छन्द॑सेन्द्रि॒यं त्विषि॒मिन्द्रे॒ वयो॒ दध॑द्वसु॒वने॑ वसु॒धेय॑स्य वीतां॒ यज॑ ॥६॥

Deva daivya hotara devamindram vayodhasam devau devamavardhatam
Trishtubha chhandasendriyam tvishimindre vayo dadhadvasuvane vasudheyasya vitam yaja

30.41

दे॒वीस्ति॒स्रस्ति॒स्रो दे॒वीर्व॑यो॒धसं॒ पति॒मिन्द्र॑मवर्धयन् ।
जग॑त्या॒ छन्द॑सेन्द्रि॒यᳪ शूष॒मिन्द्रे॒ वयो॒ दध॑द्वसु॒वने॑ वसु॒धेय॑स्य व्यन्तु॒ यज॑ ॥७॥

Devistisrastisro devirvayodhasam patimindramavardhayan
Jagatya chhandasendriyam shushamindre vayo dadhadvasuvane vasudheyasya vyantu yaja

30.42

दे॒वो नरा॒शᳪसो॑ दे॒वमिन्द्रं॑ वयो॒धसं॑ दे॒वो दे॒वम॑वर्धयत् ।
वि॒राजा॒ छन्द॑सेन्द्रि॒यᳪ रु॒पमिन्द्रे॒ वयो॒ दध॑द्वसु॒वने॑ वसु॒धेय॑स्य वेतु॒ यज॑ ॥८॥

Devo narashanso devamindram vayodhasam devo devamavardhayat
Viraja chhandasendriyam rupamindre vayo dadhadvasuvane vasudheyasya vetu yaja

30.43

दे॒वो वन॒स्पति॑र्दे॒वमिन्द्रं॑ वयो॒धसं॑ दे॒वो दे॒वम॑वर्धयत् ।
द्वि॒पदा॒ छन्द॑सेन्द्रि॒यं भग॒मिन्द्रे॒ वयो॒ दध॑द्वसु॒वने॑ वसु॒धेय॑स्य वेतु॒ यज॑ ॥९॥

Devo vanaspatirdevamindram vayodhasam devo devamavardhayat
Dvipada chhandasendriyam bhagamindre vayo dadhadvasuvane vasudheyasya vetu yaja

30.44

दे॒वं ब॒र्हिर्वारि॑तीनां दे॒वमिन्द्रं॑ वयो॒धसं॑ दे॒वं दे॒वम॑वर्धयत् ।
क॒कुभा॒ छन्द॑सेन्द्रि॒यं यश॒ इन्द्रे॒ वयो॒ दध॑द्वसु॒वने॑ वसु॒धेय॑स्य वेतु॒ यज॑ ॥१०॥

Devam barhirvaritinam devamindram vayodhasam devam devamavardhayat
Kakubha chhandasendriyam yasha indre vayo dadhadvasuvane vasudheyasya vetu yaja

30.45

दे॒वो अ॒ग्निः स्वि॑ष्ट॒कृद्दे॒वमिन्द्रं॑ वयो॒धसं॑ दे॒वो दे॒वम॑वर्धयत् ।
अति॑च्छन्दसा॒ छन्द॑सेन्द्रि॒यं क्ष॒त्रमिन्द्रे॒ वयो॒ दध॑द्वसु॒वने॑ वसु॒धेय॑स्य वेतु॒ यज॑ ॥११॥

Devo agnih svishtakriddevamindram vayodhasam devo devamavardhayat
Atichchhandasa chhandasendriyam kshatramindre vayo dadhadvasuvane vasudheyasya vetu yaja

30.46

अ॒ग्निम॒द्य होता॑रमवृणीता॒यं यज॑मानः॒ पच॒न्पक्तीः॒ पच॑न्पुरो॒ळाशं॑ ब॒ध्नन्निन्द्रा॑य वयो॒धसे॒ छाग॑म् ।
सू॒प॒स्था अ॒द्य दे॒वो वन॒स्पति॑रभव॒दिन्द्रा॑य वयो॒धसे॒ छागे॑न ।
अघ॒त्तं मे॑द॒स्तः प्रति॑पच॒ताग्र॑भी॒दवी॑वृधत्पुरो॒ळाशे॑न । त्वाम॒द्य ऋ॑षे ॥१२॥

Agnimadya hotaramavrinitayam yajamanah pachanpaktih pachanpurolasham badhnannindraya vayodhase chhagam
Supastha adya devo vanaspatirabhavadindraya vayodhase chhagena
Aghattam medastah pratipachatagrabhidavivridhatpurolashena, tvamadya rishe

30.47

(४) ४६ (१७२७)
॥इति शुक्लयजुःकाण्वसंहितायां त्रिंशतितमोऽध्यायः ॥३०॥

(4) 46 (1727)
, Iti shuklayajuhkanvasanhitayam trinshatitamodhyayah