UtshovSarga 1
1.1
गच्छता मातुलकुलं भरतेन तदाऽनघः ।
शत्रुघ्नो नित्यशत्रुघ्नो नीतः प्रीतिपुरस्कृतः ॥२-१-१॥
Gachchhata matulakulam bharatena tadanaghah
Shatrughno nityashatrughno nitah pritipuraskritah
1.2
स तत्र न्यवसद्भ्रात्रा सह सत्कारसत्कृतः ।
मातुलेनाश्वपतिना पुत्रस्नेहेन लालितः ॥२-१-२॥
Sa tatra nyavasadbhratra saha satkarasatkritah
Matulenashvapatina putrasnehena lalitah
1.3
तत्रापि निवसन्तौ तौ तर्प्यमाणौ च कामतः ।
भ्रातरौ स्मरतां वीरौ वृद्धं दसरथं नृपम् ॥२-१-३॥
Tatrapi nivasantau tau tarpyamanau cha kamatah
Bhratarau smaratam virau vriddham dasaratham nripam
1.4
राजापि तौ महातेजाः सस्मार प्रोषितौ सुतौ ।
उभौ भरतशत्रुघ्नौ महेन्द्रवरुणोपमौ ॥२-१-४॥
Rajapi tau mahatejah sasmara proshitau sutau
Ubhau bharatashatrughnau mahendravarunopamau
1.5
सर्व एव तु तस्येष्ट श्चत्वारः पुरुषर्षभाः ।
स्वशरीराद्विनिर्वृत्ताश्चत्वार इव बाहवः ॥२-१-५॥
Sarva eva tu tasyeshta shchatvarah purusharshabhah
Svashariradvinirvrittashchatvara iva bahavah
1.6
तेषामपि महातेजा रामो रतिकरः पितुः ।
स्वयम्भूरिव भूतानां बभूव गुणवत्तरः ॥२-१-६॥
Teshamapi mahateja ramo ratikarah pituh
Svayambhuriva bhutanam babhuva gunavattarah
1.7
स हि देवै रुदीर्णस्य रावणस्य वधार्थिभिः ।
अर्थितो मानुषे लोके जज्ञे विष्णुः सनातनः ॥२-१-७॥
Sa hi devai rudirnasya ravanasya vadharthibhih
Arthito manushe loke jagye vishnuh sanatanah
1.8
कौसल्या शुशुभे पुत्रेणामिततेजसा ।
यथा वरेण देवानामदितिर्वज्रपाणिना ॥२-१-८॥
Kausalya shushubhe putrenamitatejasa
Yatha varena devanamaditirvajrapanina
1.9
स हि रूपोपपन्नश्च वीर्यवाननसूयकः ।
भूमावनुपमः सूनुर्गणैर्धशरथोपमः ॥२-१-९॥
Sa hi rupopapannashcha viryavananasuyakah
Bhumavanupamah sunurganairdhasharathopamah
1.10
स च नित्यं प्रशान्तात्मा मृदुपूर्वं तु भाषते ।
उच्यमानोऽपि परुषं नोत्तरं प्रतिपद्यते ॥२-१-१०॥
Sa cha nityam prashantatma mridupurvam tu bhashate
Uchyamanopi parusham nottaram pratipadyate
1.11
कथंचिदुपकारेण कृतेनै केन तुष्यति ।
न स्मरत्यपकाराणां शतमप्यात्मवत्तया ॥२-१-११॥
Kathanchidupakarena kritenai kena tushyati
Na smaratyapakaranam shatamapyatmavattaya
1.12
शीलवृद्धै र्ज्ञानवृद्धैर्वयोवृद्धैश्च सज्जनैः ।
कथयन्नास्त वैनित्य मस्त्रयोग्यान्तरेष्वपि ॥२-१-१२॥
Shilavriddhai rgyanavriddhairvayovriddhaishcha sajjanaih
Kathayannasta vainitya mastrayogyantareshvapi
1.13
बुद्धिमान् मधुराभाषी पूर्वभाषी प्रियंवदः ।
वीर्यवान्न च वीर्येण महता स्वेन विस्मितः ॥२-१-१३॥
Buddhiman madhurabhashi purvabhashi priyanvadah
Viryavanna cha viryena mahata svena vismitah
1.14
न चानृतकथो विद्वान् वृद्धानां प्रतिपूजकः ।
अनुरक्तः प्रजाभिश्च प्रजाश्चाप्यनुरज्यते ॥२-१-१४॥
Na chanritakatho vidvan vriddhanam pratipujakah
Anuraktah prajabhishcha prajashchapyanurajyate
1.15
सानुक्रोशो जितक्रोधो ब्राह्मणप्रतिपूजकः ।
दीनानुकम्पी धर्मज्ञो नित्यं प्रग्रहवाञ्छुचिः ॥२-१-१५॥
Sanukrosho jitakrodho brahmanapratipujakah
Dinanukampi dharmagyo nityam pragrahavanchhuchih
1.16
कुलोचितमतिः क्षात्रं धर्मं स्वं बहुमन्यते ।
मन्यते परया कीर्त्य महत्स्वर्गफलं ततः ॥२-१-१६॥
Kulochitamatih kshatram dharmam svam bahumanyate
Manyate paraya kirtya mahatsvargaphalam tatah
1.17
नाश्रेयसि रतो विद्वान्न विरुद्धकथारुचिः ।
उत्तरोत्तरयुक्तौ च वक्ता वाचस्पति र्यथा ॥२-१-१७॥
Nashreyasi rato vidvanna viruddhakatharuchih
Uttarottarayuktau cha vakta vachaspati ryatha
1.18
अरोगस्तरुणो वाग्मी वपुष्मान् देशकालवित् ।
लोके पुरुषसारज्ञस्साधुरेको विनिर्मितः ॥२-१-१८॥
Arogastaruno vagmi vapushman deshakalavit
Loke purushasaragyassadhureko vinirmitah
1.19
स तु स्रेष्ठैर्गुणैर्युक्तः प्रजानां पार्थिवात्मजः ।
बहिश्चर इव प्राणो बभूव गुणतः प्रियः ॥२-१-१९॥
Sa tu sreshthairgunairyuktah prajanam parthivatmajah
Bahishchara iva prano babhuva gunatah priyah
1.20
सम्यग्विद्याव्रतस्नातो यथावत्साङ्गवेदवित् ।
इष्वस्त्रे च पितुः श्रेष्ठो बभूव भरताग्रजः ॥२-१-२०॥
Samyagvidyavratasnato yathavatsangavedavit
Ishvastre cha pituh shreshtho babhuva bharatagrajah
1.21
कल्याणाभिजनः साधुरदीनः सत्यवागृजुः ।
वृद्धैरभिविनीतश्च द्विजैर्धर्मार्थदर्शिभिः ॥२-१-२१॥
Kalyanabhijanah sadhuradinah satyavagrijuh
Vriddhairabhivinitashcha dvijairdharmarthadarshibhih
1.22
धर्मकामार्थतत्त्वज्ञः स्मृतिमान् प्रतिभानवान् ।
लौकिके समयाचारे कृतकल्पो विशारदः ॥२-१-२२॥
Dharmakamarthatattvagyah smritiman pratibhanavan
Laukike samayachare kritakalpo visharadah
1.23
निभृतः संवृताकारो गुप्तमन्त्रः सहायवान् ।
अमोघक्रोधहर्षश्च त्यागसंयमकालवित् ॥२-१-२३॥
Nibhritah sanvritakaro guptamantrah sahayavan
Amoghakrodhaharshashcha tyagasanyamakalavit
1.24
दृढभक्तिः स्थिरप्रज्ञो नासद्ग्राही न दुर्वचाः ।
निस्तन्द्रिरप्रमत्तश्च स्वदोषपरदोषवित् ॥२-१-२४॥
Dridhabhaktih sthirapragyo nasadgrahi na durvachah
Nistandrirapramattashcha svadoshaparadoshavit
1.25
शास्त्रज्ञश्च कृतज्ञश्च पुरुषान्तरकोविदः ।
यः प्रग्रहानुग्रहयोर्यथान्यायं विचक्षणः ॥२-१-२५॥
Shastragyashcha kritagyashcha purushantarakovidah
Yah pragrahanugrahayoryathanyayam vichakshanah
1.26
सत्संग्रहप्रग्रहणे स्थानविन्निग्रहस्य च ।
आयकर्मण्युपायज्ञः संदृष्टव्ययकर्मवित् ॥२-१-२६॥
Satsangrahapragrahane sthanavinnigrahasya cha
Ayakarmanyupayagyah sandrishtavyayakarmavit
1.27
श्रैष्ठ्यं शास्त्रसमूहेषु प्राप्तो व्यामिश्रकेषु च ।
अर्थधर्मौ च संगृह्य सुखतन्त्रो न चालसः ॥२-१-२७॥
Shraishthyam shastrasamuheshu prapto vyamishrakeshu cha
Arthadharmau cha sangrihya sukhatantro na chalasah
1.28
वैहारिकाणां शिल्पानां विज्ञातार्थविभागवित् ।
आरोहे विनये चैव युक्तोवारणवाजिनाम् ॥२-१-२८॥
Vaiharikanam shilpanam vigyatarthavibhagavit
Arohe vinaye chaiva yuktovaranavajinam
1.29
धनुर्वेदविदां स्रेष्ठो लोकेऽतिरथसंमतः ।
अभियाता प्रहर्ता च सेनानयविशारदः ॥२-१-२९॥
Dhanurvedavidam sreshtho loketirathasammatah
Abhiyata praharta cha senanayavisharadah
1.30
अप्रधृष्यश्च संग्रामे क्रुद्धैरपि सुरासुरैः ।
अनसूयो जितक्रोधो न दृप्तो न च मत्सरी ।न चावमन्ता भूतानां न च कालवशानुगः ॥२-१-३०॥
Apradhrishyashcha sangrame kruddhairapi surasuraih
Anasuyo jitakrodho na dripto na cha matsari, na chavamanta bhutanam na cha kalavashanugah
1.31
एवं श्रेष्ठगुणैर्युक्तः प्रजानां पार्थिवात्मजः ।
संमतस्त्रिषु लोकेषुवसुधायाः क्षमागुणैः ॥२-१-३१॥
Evam shreshthagunairyuktah prajanam parthivatmajah
Sammatastrishu lokeshuvasudhayah kshamagunaih
1.32
बुद्द्या बृहस्पतेस्तुल्यो वीर्येणापि शचीपतेः ।
तथा सर्वप्रजाकान्तैः प्रीतिसंजननैः पितुः ॥२-१-३२॥
Buddya brihaspatestulyo viryenapi shachipateh
Tatha sarvaprajakantaih pritisanjananaih pituh
1.33
गुणैर्विरुरुचे रामो दीप्तः सूर्य इवांशुभिः ।
तमेवंव्रतसंपन्नमप्रधृष्यपराक्रमम् ॥२-१-३३॥
Gunairviruruche ramo diptah surya ivanshubhih
Tamevanvratasampannamapradhrishyaparakramam
1.34
लोकपालोपमं नाथमकामयत मेदिनी ।
एतैस्तु बहुभिर्युक्तं गुणैरनुपमैः सुतम् ॥२-१-३४॥
Lokapalopamam nathamakamayata medini
Etaistu bahubhiryuktam gunairanupamaih sutam
1.35
दृष्ट्वा दशरथो राजा चक्रे चिन्तां परंतपः ।
अथ राज्ञो बभूवैवं वृद्धस्य चिरजीविनः ॥२-१-३५॥
Drishtva dasharatho raja chakre chintam parantapah
Atha ragyo babhuvaivam vriddhasya chirajivinah
1.36
प्रीतिरेषा कथं रामो राजा स्यान्मयि जीवति ।
एषा ह्यस्य परा प्रीतिर्हृदि संपरिवर्तते ॥२-१-३६॥
Pritiresha katham ramo raja syanmayi jivati
Esha hyasya para pritirhridi samparivartate
1.37
कदा नाम सुतं द्रक्ष्याम्यभिषिक्तमहं प्रियम् ।
वृद्धिकामो हि लोकस्य सर्वभूतानुकम्पनः ॥२-१-३७॥
Kada nama sutam drakshyamyabhishiktamaham priyam
Vriddhikamo hi lokasya sarvabhutanukampanah
1.38
मत्तः प्रियतरो लोके पर्ङन्य इव वृष्टिमान् ।
यमशक्रसमो वीर्ये बृहस्पतिसमो मतौ ॥२-१-३८॥
Mattah priyataro loke parnganya iva vrishtiman
Yamashakrasamo virye brihaspatisamo matau
1.39
महीधरसमो धृत्यां मत्तश्च गुणवत्तरः ।
महीमहमिमां कृत्स्नामधितिष्ठन्तमात्मजम् ॥२-१-३९॥
Mahidharasamo dhrityam mattashcha gunavattarah
Mahimahamimam kritsnamadhitishthantamatmajam
1.40
अनेन वयसा दृष्ट्वा यथा स्वर्गमवाप्नुयाम् ।
इत्येतै र्विविधै स्तैस्तै रन्यपार्थिवदुर्लभैः ॥२-१-४०॥
Anena vayasa drishtva yatha svargamavapnuyam
Ityetai rvividhai staistai ranyaparthivadurlabhaih
1.41
शिष्टैरपरिमेयैश्छ लोके लोकोत्तरैर्गुणैः ।
तं समीक्ष्य महाराजो युक्तं समुदितैः शुभैः ॥२-१-४१॥
Shishtairaparimeyaishchha loke lokottarairgunaih
Tam samikshya maharajo yuktam samuditaih shubhaih
1.42
निश्चित्य सचिवैः सार्धं युवराजममन्यत ।
दिव्यन्तरिक्षे भूमौ च घोरमुत्पातजं भयम् ॥२-१-४२॥
Nishchitya sachivaih sardham yuvarajamamanyata
Divyantarikshe bhumau cha ghoramutpatajam bhayam
1.43
संचचक्षेऽथ मेधावी शरीरे चात्मनो जराम् ।
पूर्णचन्द्राननस्याथ शोकापनुदमात्मनः ॥२-१-४३॥
Sanchachakshetha medhavi sharire chatmano jaram
Purnachandrananasyatha shokapanudamatmanah
1.44
लोके रामस्य बुबुधे संप्रियत्वं महात्मनः ।
आत्मनश्च प्रजानां च श्रेयसे च प्रियेण च ॥२-१-४४॥
Loke ramasya bubudhe sampriyatvam mahatmanah
Atmanashcha prajanam cha shreyase cha priyena cha
1.45
प्राप्तकालेन धर्मात्मा भक्त्या त्वरितवान् नृपः ।
नानानगरवास्तव्यान् पृथग्जानपदानपि ॥२-१-४५॥
Praptakalena dharmatma bhaktya tvaritavan nripah
Nananagaravastavyan prithagjanapadanapi
1.46
समानिनाय मेदिन्याः प्रधानान् पृथिवीपतीन् ।
न तु केकयराजानं जनकं वा नराधिपः ॥२-१-४६॥
Samaninaya medinyah pradhanan prithivipatin
Na tu kekayarajanam janakam va naradhipah
1.47
त्वरया चानयामास पश्चात्तौ श्रोष्यतः प्रियम् ।
तान्वेश्मनानाभरणैर्यथार्हं प्रतिपूजितान् ॥२-१-४७॥
Tvaraya chanayamasa pashchattau shroshyatah priyam
Tanveshmananabharanairyatharham pratipujitan
1.48
ददर्शालंकृतो राजा प्रजापतिरिव प्रजाः ।
अथोपविष्टे नृपतौ तस्मिन् परबलार्दने ॥२-१-४८॥
Dadarshalankrito raja prajapatiriva prajah
Athopavishte nripatau tasmin parabalardane
1.49
ततः प्रविविशुः शेष राजानो लोकसम्मताः ।
अथ राजवितीर्णेषु विविधेष्वासनेषु च ॥२-१-४९॥
Tatah pravivishuh shesha rajano lokasammatah
Atha rajavitirneshu vividheshvasaneshu cha
1.50
राजानमेवाभिमुखा निषेदुर्नियता नृपाः ।
स लब्धमानैर्विनयान्वितैर्नृपैः ।पुरालयै र्जानपदैश्च मानवैः ।उपोपविष्टैर्नृतो बभौ ।सहस्रचक्षुर्भगवानिवामरैः ॥२-१-५०॥
Rajanamevabhimukha nishedurniyata nripah
Sa labdhamanairvinayanvitairnripaih, puralayai rjanapadaishcha manavaih, upopavishtairnrito babhau, sahasrachakshurbhagavanivamaraih