Sukta 76

76.1

5 kavirbhargavah, pavamanah somah, jagati

ध॒र्ता दि॒वः प॑वते॒ कृत्व्यो॒ रसो॒ दक्षो॑ दे॒वाना॑मनु॒माद्यो॒ नृभि॑ः ।
हरि॑ः सृजा॒नो अत्यो॒ न सत्व॑भि॒र्वृथा॒ पाजां॑सि कृणुते न॒दीष्वा ॥१॥

Dharta divah pavate kritvyo raso daksho devanamanumadyo nribhih
Harih srijano atyo na satvabhirvritha pajansi krinute nadishva

76.2

शूरो॒ न ध॑त्त॒ आयु॑धा॒ गभ॑स्त्यो॒ः स्व१ः सिषा॑सन्रथि॒रो गवि॑ष्टिषु ।
इन्द्र॑स्य॒ शुष्म॑मी॒रय॑न्नप॒स्युभि॒रिन्दु॑र्हिन्वा॒नो अ॑ज्यते मनी॒षिभि॑ः ॥२॥

Shuro na dhatta ayudha gabhastyoh sva1h sishasanrathiro gavishtishu
Indrasya shushmamirayannapasyubhirindurhinvano ajyate manishibhih

76.3

इन्द्र॑स्य सोम॒ पव॑मान ऊ॒र्मिणा॑ तवि॒ष्यमा॑णो ज॒ठरे॒ष्वा वि॑श ।
प्र ण॑ः पिन्व वि॒द्युद॒भ्रेव॒ रोद॑सी धि॒या न वाजाँ॒ उप॑ मासि॒ शश्व॑तः ॥३॥

Indrasya soma pavamana urmina tavishyamano jathareshva visha
Pra nah pinva vidyudabhreva rodasi dhiya na vajam upa masi shashvatah

76.4

विश्व॑स्य॒ राजा॑ पवते स्व॒र्दृश॑ ऋ॒तस्य॑ धी॒तिमृ॑षि॒षाळ॑वीवशत् ।
यः सूर्य॒स्यासि॑रेण मृ॒ज्यते॑ पि॒ता म॑ती॒नामस॑मष्टकाव्यः ॥४॥

Vishvasya raja pavate svardrisha ritasya dhitimrishishalavivashat
Yah suryasyasirena mrijyate pita matinamasamashtakavyah

76.5

वृषे॑व यू॒था परि॒ कोश॑मर्षस्य॒पामु॒पस्थे॑ वृष॒भः कनि॑क्रदत् ।
स इन्द्रा॑य पवसे मत्स॒रिन्त॑मो॒ यथा॒ जेषा॑म समि॒थे त्वोत॑यः ॥५॥

Vrisheva yutha pari koshamarshasyapamupasthe vrishabhah kanikradat
Sa indraya pavase matsarintamo yatha jeshama samithe tvotayah