Sukta 71

71.1

9 rishabho vaishvamitrah, pavamanah somah, jagati, 9 trishtup

आ दक्षि॑णा सृज्यते शु॒ष्म्या॒३सदं॒ वेति॑ द्रु॒हो र॒क्षस॑ः पाति॒ जागृ॑विः ।
हरि॑रोप॒शं कृ॑णुते॒ नभ॒स्पय॑ उप॒स्तिरे॑ च॒म्वो॒३र्ब्रह्म॑ नि॒र्णिजे॑ ॥१॥

A dakshina srijyate shushmya3sadam veti druho rakshasah pati jagrivih
Hariropasham krinute nabhaspaya upastire chamvo3rbrahma nirnije

71.2

प्र कृ॑ष्टि॒हेव॑ शू॒ष ए॑ति॒ रोरु॑वदसु॒र्यं१ वर्णं॒ नि रि॑णीते अस्य॒ तम् ।
जहा॑ति व॒व्रिं पि॒तुरे॑ति निष्कृ॒तमु॑प॒प्रुतं॑ कृणुते नि॒र्णिजं॒ तना॑ ॥२॥

Pra krishtiheva shusha eti roruvadasuryan1 varnam ni rinite asya tam
Jahati vavrim pitureti nishkritamupaprutam krinute nirnijam tana

71.3

अद्रि॑भिः सु॒तः प॑वते॒ गभ॑स्त्योर्वृषा॒यते॒ नभ॑सा॒ वेप॑ते म॒ती ।
स मो॑दते॒ नस॑ते॒ साध॑ते गि॒रा ने॑नि॒क्ते अ॒प्सु यज॑ते॒ परी॑मणि ॥३॥

Adribhih sutah pavate gabhastyorvrishayate nabhasa vepate mati
Sa modate nasate sadhate gira nenikte apsu yajate parimani

71.4

परि॑ द्यु॒क्षं सह॑सः पर्वता॒वृधं॒ मध्व॑ः सिञ्चन्ति ह॒र्म्यस्य॑ स॒क्षणि॑म् ।
आ यस्मि॒न्गाव॑ः सुहु॒ताद॒ ऊध॑नि मू॒र्धञ्छ्री॒णन्त्य॑ग्रि॒यं वरी॑मभिः ॥४॥

Pari dyuksham sahasah parvatavridham madhvah sinchanti harmyasya sakshanim
A yasmingavah suhutada udhani murdhanchhrinantyagriyam varimabhih

71.5

समी॒ रथं॒ न भु॒रिजो॑रहेषत॒ दश॒ स्वसा॑रो॒ अदि॑तेरु॒पस्थ॒ आ ।
जिगा॒दुप॑ ज्रयति॒ गोर॑पी॒च्यं॑ प॒दं यद॑स्य म॒तुथा॒ अजी॑जनन् ॥५॥

Sami ratham na bhurijoraheshata dasha svasaro aditerupastha a
Jigadupa jrayati gorapichyam padam yadasya matutha ajijanan

71.6

श्ये॒नो न योनिं॒ सद॑नं धि॒या कृ॒तं हि॑र॒ण्यय॑मा॒सदं॑ दे॒व एष॑ति ।
ए रि॑णन्ति ब॒र्हिषि॑ प्रि॒यं गि॒राऽश्वो॒ न दे॒वाँ अप्ये॑ति य॒ज्ञिय॑ः ॥६॥

Shyeno na yonim sadanam dhiya kritam hiranyayamasadam deva eshati
E rinanti barhishi priyam girashvo na devam apyeti yagyiyah

71.7

परा॒ व्य॑क्तो अरु॒षो दि॒वः क॒विर्वृषा॑ त्रिपृ॒ष्ठो अ॑नविष्ट॒ गा अ॒भि ।
स॒हस्र॑णीति॒र्यति॑ः परा॒यती॑ रे॒भो न पू॒र्वीरु॒षसो॒ वि रा॑जति ॥७॥

Para vyakto arusho divah kavirvrisha triprishtho anavishta ga abhi
Sahasranitiryatih parayati rebho na purvirushaso vi rajati

71.8

त्वे॒षं रू॒पं कृ॑णुते॒ वर्णो॑ अस्य॒ स यत्राश॑य॒त्समृ॑ता॒ सेध॑ति स्रि॒धः ।
अ॒प्सा या॑ति स्व॒धया॒ दैव्यं॒ जनं॒ सं सु॑ष्टु॒ती नस॑ते॒ सं गोअ॑ग्रया ॥८॥

Tvesham rupam krinute varno asya sa yatrashayatsamrita sedhati sridhah
Apsa yati svadhaya daivyam janam sam sushtuti nasate sam goagraya

71.9

उ॒क्षेव॑ यू॒था प॑रि॒यन्न॑रावी॒दधि॒ त्विषी॑रधित॒ सूर्य॑स्य ।
दि॒व्यः सु॑प॒र्णोऽव॑ चक्षत॒ क्षां सोम॒ः परि॒ क्रतु॑ना पश्यते॒ जाः ॥९॥

Uksheva yutha pariyannaravidadhi tvishiradhita suryasya
Divyah suparnova chakshata ksham somah pari kratuna pashyate jah