Sukta 44

44.1

6 ayasya angirasah, pavamanah somah, gayatri

प्र ण॑ इन्दो म॒हे तन॑ ऊ॒र्मिं न बिभ्र॑दर्षसि । अ॒भि दे॒वाँ अ॒यास्य॑ः ॥१॥

Pra na indo mahe tana urmim na bibhradarshasi, abhi devam ayasyah

म॒ती जु॒ष्टो धि॒या हि॒तः सोमो॑ हिन्वे परा॒वति॑ । विप्र॑स्य॒ धार॑या क॒विः ॥२॥

Mati jushto dhiya hitah somo hinve paravati, viprasya dharaya kavih

अ॒यं दे॒वेषु॒ जागृ॑विः सु॒त ए॑ति प॒वित्र॒ आ । सोमो॑ याति॒ विच॑र्षणिः ॥३॥

Ayam deveshu jagrivih suta eti pavitra a, somo yati vicharshanih

स न॑ः पवस्व वाज॒युश्च॑क्रा॒णश्चारु॑मध्व॒रम् । ब॒र्हिष्माँ॒ आ वि॑वासति ॥४॥

Sa nah pavasva vajayushchakranashcharumadhvaram, barhishmam a vivasati

स नो॒ भगा॑य वा॒यवे॒ विप्र॑वीरः स॒दावृ॑धः । सोमो॑ दे॒वेष्वा य॑मत् ॥५॥

Sa no bhagaya vayave vipravirah sadavridhah, somo deveshva yamat

स नो॑ अ॒द्य वसु॑त्तये क्रतु॒विद्गा॑तु॒वित्त॑मः । वाजं॑ जेषि॒ श्रवो॑ बृ॒हत् ॥६॥

Sa no adya vasuttaye kratuvidgatuvittamah, vajam jeshi shravo brihat