Sukta 3

3.1

10 ajigartih shunah shepa :, kritrimo vaishvamitro devaratah, pavamanah somah, gayatri

ए॒ष दे॒वो अम॑र्त्यः पर्ण॒वीरि॑व दीयति । अ॒भि द्रोणा॑न्या॒सद॑म् ॥१॥

Esha devo amartyah parnaviriva diyati, abhi dronanyasadam

3.2

ए॒ष दे॒वो वि॒पा कृ॒तोऽति॒ ह्वरां॑सि धावति । पव॑मानो॒ अदा॑भ्यः ॥२॥

Esha devo vipa kritoti hvaransi dhavati, pavamano adabhyah

3.3

ए॒ष दे॒वो वि॑प॒न्युभि॒ः पव॑मान ऋता॒युभि॑ः । हरि॒र्वाजा॑य मृज्यते ॥३॥

Esha devo vipanyubhih pavamana ritayubhih, harirvajaya mrijyate

3.4

ए॒ष विश्वा॑नि॒ वार्या॒ शूरो॒ यन्नि॑व॒ सत्व॑भिः । पव॑मानः सिषासति ॥४॥

Esha vishvani varya shuro yanniva satvabhih, pavamanah sishasati

3.5

ए॒ष दे॒वो र॑थर्यति॒ पव॑मानो दशस्यति । आ॒विष्कृ॑णोति वग्व॒नुम् ॥५॥

Esha devo ratharyati pavamano dashasyati, avishkrinoti vagvanum

3.6

ए॒ष विप्रै॑र॒भिष्टु॑तो॒ऽपो दे॒वो वि गा॑हते । दध॒द्रत्ना॑नि दा॒शुषे॑ ॥६॥

Esha viprairabhishtutopo devo vi gahate, dadhadratnani dashushe

3.7

ए॒ष दिवं॒ वि धा॑वति ति॒रो रजां॑सि॒ धार॑या । पव॑मान॒ः कनि॑क्रदत् ॥७॥

Esha divam vi dhavati tiro rajansi dharaya, pavamanah kanikradat

3.8

ए॒ष दिवं॒ व्यास॑रत्ति॒रो रजां॒स्यस्पृ॑तः । पव॑मानः स्वध्व॒रः ॥८॥

Esha divam vyasarattiro rajansyaspritah, pavamanah svadhvarah

3.9

ए॒ष प्र॒त्नेन॒ जन्म॑ना दे॒वो दे॒वेभ्य॑ः सु॒तः । हरि॑ः प॒वित्रे॑ अर्षति ॥९॥

Esha pratnena janmana devo devebhyah sutah, harih pavitre arshati

3.10

ए॒ष उ॒ स्य पु॑रुव्र॒तो ज॑ज्ञा॒नो ज॒नय॒न्निष॑ः । धार॑या पवते सु॒तः ॥१०॥

Esha u sya puruvrato jagyano janayannishah, dharaya pavate sutah