Sukta 95

95.1

9 tirashchirangirasah, indrah, anushtup

आ त्वा॒ गिरो॑ र॒थीरि॒वाऽस्थु॑ः सु॒तेषु॑ गिर्वणः । अ॒भि त्वा॒ सम॑नूष॒तेन्द्र॑ व॒त्सं न मा॒तर॑ः ॥१॥

A tva giro rathirivasthuh suteshu girvanah, abhi tva samanushatendra vatsam na matarah

आ त्वा॑ शु॒क्रा अ॑चुच्यवुः सु॒तास॑ इन्द्र गिर्वणः । पिबा॒ त्व१स्यान्ध॑स॒ इन्द्र॒ विश्वा॑सु ते हि॒तम् ॥२॥

A tva shukra achuchyavuh sutasa indra girvanah, piba tva1syandhasa indra vishvasu te hitam

पिबा॒ सोमं॒ मदा॑य॒ कमिन्द्र॑ श्ये॒नाभृ॑तं सु॒तम् । त्वं हि शश्व॑तीनां॒ पती॒ राजा॑ वि॒शामसि॑ ॥३॥

Piba somam madaya kamindra shyenabhritam sutam, tvam hi shashvatinam pati raja vishamasi

श्रु॒धी हवं॑ तिर॒श्च्या इन्द्र॒ यस्त्वा॑ सप॒र्यति॑ । सु॒वीर्य॑स्य॒ गोम॑तो रा॒यस्पू॑र्धि म॒हाँ अ॑सि ॥४॥

Shrudhi havam tirashchya indra yastva saparyati, suviryasya gomato rayaspurdhi maham asi

इन्द्र॒ यस्ते॒ नवी॑यसीं॒ गिरं॑ म॒न्द्रामजी॑जनत् । चि॒कि॒त्विन्म॑नसं॒ धियं॑ प्र॒त्नामृ॒तस्य॑ पि॒प्युषी॑म् ॥५॥

Indra yaste naviyasim giram mandramajijanat, chikitvinmanasam dhiyam pratnamritasya pipyushim

तमु॑ ष्टवाम॒ यं गिर॒ इन्द्र॑मु॒क्थानि॑ वावृ॒धुः । पु॒रूण्य॑स्य॒ पौंस्या॒ सिषा॑सन्तो वनामहे ॥६॥

Tamu shtavama yam gira indramukthani vavridhuh, purunyasya paunsya sishasanto vanamahe

एतो॒ न्विन्द्रं॒ स्तवा॑म शु॒द्धं शु॒द्धेन॒ साम्ना॑ । शु॒द्धैरु॒क्थैर्वा॑वृ॒ध्वांसं॑ शु॒द्ध आ॒शीर्वा॑न्ममत्तु ॥७॥

Eto nvindram stavama shuddham shuddhena samna, shuddhairukthairvavridhvansam shuddha ashirvanmamattu

इन्द्र॑ शु॒द्धो न॒ आ ग॑हि शु॒द्धः शु॒द्धाभि॑रू॒तिभि॑ः । शु॒द्धो र॒यिं नि धा॑रय शु॒द्धो म॑मद्धि सो॒म्यः ॥८॥

Indra shuddho na a gahi shuddhah shuddhabhirutibhih, shuddho rayim ni dharaya shuddho mamaddhi somyah

इन्द्र॑ शु॒द्धो हि नो॑ र॒यिं शु॒द्धो रत्ना॑नि दा॒शुषे॑ । शु॒द्धो वृ॒त्राणि॑ जिघ्नसे शु॒द्धो वाजं॑ सिषाससि ॥९॥

Indra shuddho hi no rayim shuddho ratnani dashushe, shuddho vritrani jighnase shuddho vajam sishasasi