Sukta 91

91.1

7 atreyi apala, indrah, anushtup, 1-2 panktih

क॒न्या॒३ वार॑वाय॒ती सोम॒मपि॑ स्रु॒तावि॑दत् । अस्तं॒ भर॑न्त्यब्रवी॒दिन्द्रा॑य सुनवै त्वा श॒क्राय॑ सुनवै त्वा ॥१॥

Kanya3 varavayati somamapi srutavidat, astam bharantyabravidindraya sunavai tva shakraya sunavai tva

अ॒सौ य एषि॑ वीर॒को गृ॒हंगृ॑हं वि॒चाक॑शद् । इ॒मं जम्भ॑सुतं पिब धा॒नाव॑न्तं कर॒म्भिण॑मपू॒पव॑न्तमु॒क्थिन॑म् ॥२॥

Asau ya eshi virako grihangriham vichakashad, imam jambhasutam piba dhanavantam karambhinamapupavantamukthinam

आ च॒न त्वा॑ चिकित्सा॒मोऽधि॑ च॒न त्वा॒ नेम॑सि । शनै॑रिव शन॒कैरि॒वेन्द्रा॑येन्दो॒ परि॑ स्रव ॥३॥

A chana tva chikitsamodhi chana tva nemasi, shanairiva shanakairivendrayendo pari srava

कु॒विच्छक॑त्कु॒वित्कर॑त्कु॒विन्नो॒ वस्य॑स॒स्कर॑त् । कु॒वित्प॑ति॒द्विषो॑ य॒तीरिन्द्रे॑ण सं॒गमा॑महै ॥४॥

Kuvichchhakatkuvitkaratkuvinno vasyasaskarat, kuvitpatidvisho yatirindrena sangamamahai

इ॒मानि॒ त्रीणि॑ वि॒ष्टपा॒ तानी॑न्द्र॒ वि रो॑हय । शिर॑स्त॒तस्यो॒र्वरा॒मादि॒दं म॒ उपो॒दरे॑ ॥५॥

Imani trini vishtapa tanindra vi rohaya, shirastatasyorvaramadidam ma upodare

अ॒सौ च॒ या न॑ उ॒र्वरादि॒मां त॒न्वं१ मम॑ । अथो॑ त॒तस्य॒ यच्छिर॒ः सर्वा॒ ता रो॑म॒शा कृ॑धि ॥६॥

Asau cha ya na urvaradimam tanvan1 mama, atho tatasya yachchhirah sarva ta romasha kridhi

खे रथ॑स्य॒ खेऽन॑स॒ः खे यु॒गस्य॑ शतक्रतो । अ॒पा॒लामि॑न्द्र॒ त्रिष्पू॒त्व्यकृ॑णो॒ः सूर्य॑त्वचम् ॥७॥

Khe rathasya khenasah khe yugasya shatakrato, apalamindra trishputvyakrinoh suryatvacham