Sukta 84

84.1

9 ushana kavyah, agnih, gayatri

प्रेष्ठं॑ वो॒ अति॑थिं स्तु॒षे मि॒त्रमि॑व प्रि॒यम् । अ॒ग्निं रथं॒ न वेद्य॑म् ॥१॥

Preshtham vo atithim stushe mitramiva priyam, agnim ratham na vedyam

क॒विमि॑व॒ प्रचे॑तसं॒ यं दे॒वासो॒ अध॑ द्वि॒ता । नि मर्त्ये॑ष्वाद॒धुः ॥२॥

Kavimiva prachetasam yam devaso adha dvita, ni martyeshvadadhuh

त्वं य॑विष्ठ दा॒शुषो॒ नॄँः पा॑हि शृणु॒धी गिर॑ः । रक्षा॑ तो॒कमु॒त त्मना॑ ॥३॥

Tvam yavishtha dashusho nrinh pahi shrinudhi girah, raksha tokamuta tmana

कया॑ ते अग्ने अङ्गिर॒ ऊर्जो॑ नपा॒दुप॑स्तुतिम् । वरा॑य देव म॒न्यवे॑ ॥४॥

Kaya te agne angira urjo napadupastutim, varaya deva manyave

दाशे॑म॒ कस्य॒ मन॑सा य॒ज्ञस्य॑ सहसो यहो । कदु॑ वोच इ॒दं नम॑ः ॥५॥

Dashema kasya manasa yagyasya sahaso yaho, kadu vocha idam namah

अधा॒ त्वं हि न॒स्करो॒ विश्वा॑ अ॒स्मभ्यं॑ सुक्षि॒तीः । वाज॑द्रविणसो॒ गिर॑ः ॥६॥

Adha tvam hi naskaro vishva asmabhyam sukshitih, vajadravinaso girah

कस्य॑ नू॒नं परी॑णसो॒ धियो॑ जिन्वसि दम्पते । गोषा॑ता॒ यस्य॑ ते॒ गिर॑ः ॥७॥

Kasya nunam parinaso dhiyo jinvasi dampate, goshata yasya te girah

तं म॑र्जयन्त सु॒क्रतुं॑ पुरो॒यावा॑नमा॒जिषु॑ । स्वेषु॒ क्षये॑षु वा॒जिन॑म् ॥८॥

Tam marjayanta sukratum puroyavanamajishu, sveshu kshayeshu vajinam

क्षेति॒ क्षेमे॑भिः सा॒धुभि॒र्नकि॒र्यं घ्नन्ति॒ हन्ति॒ यः । अग्ने॑ सु॒वीर॑ एधते ॥९॥

Ksheti kshemebhih sadhubhirnakiryam ghnanti hanti yah, agne suvira edhate