Sukta 70

70.1

15 puruhanma angirasah, indrah, brihati ; 1-6 pragathah = ( vishama brihati, sama satobrihati ) 12 shankumati, 13 ushnik, 14 anushtup, 15 puraushnik

यो राजा॑ चर्षणी॒नां याता॒ रथे॑भि॒रध्रि॑गुः । विश्वा॑सां तरु॒ता पृत॑नानां॒ ज्येष्ठो॒ यो वृ॑त्र॒हा गृ॒णे ॥१॥

Yo raja charshaninam yata rathebhiradhriguh, vishvasam taruta pritananam jyeshtho yo vritraha grine

इन्द्रं॒ तं शु॑म्भ पुरुहन्म॒न्नव॑से॒ यस्य॑ द्वि॒ता वि॑ध॒र्तरि॑ । हस्ता॑य॒ वज्र॒ः प्रति॑ धायि दर्श॒तो म॒हो दि॒वे न सूर्य॑ः ॥२॥

Indram tam shumbha puruhanmannavase yasya dvita vidhartari, hastaya vajrah prati dhayi darshato maho dive na suryah

नकि॒ष्टं कर्म॑णा नश॒द्यश्च॒कार॑ स॒दावृ॑धम् । इन्द्रं॒ न य॒ज्ञैर्वि॒श्वगू॑र्त॒मृभ्व॑स॒मधृ॑ष्टं धृ॒ष्ण्वो॑जसम् ॥३॥

Nakishtam karmana nashadyashchakara sadavridham, indram na yagyairvishvagurtamribhvasamadhrishtam dhrishnvojasam

अषा॑ळ्हमु॒ग्रं पृत॑नासु सास॒हिं यस्मि॑न्म॒हीरु॑रु॒ज्रय॑ः । सं धे॒नवो॒ जाय॑माने अनोनवु॒र्द्याव॒ः क्षामो॑ अनोनवुः ॥४॥

Ashalhamugram pritanasu sasahim yasminmahirurujrayah, sam dhenavo jayamane anonavurdyavah kshamo anonavuh

यद्द्याव॑ इन्द्र ते श॒तं श॒तं भूमी॑रु॒त स्युः । न त्वा॑ वज्रिन्त्स॒हस्रं॒ सूर्या॒ अनु॒ न जा॒तम॑ष्ट॒ रोद॑सी ॥५॥

Yaddyava indra te shatam shatam bhumiruta syuh, na tva vajrintsahasram surya anu na jatamashta rodasi

आ प॑प्राथ महि॒ना वृष्ण्या॑ वृष॒न्विश्वा॑ शविष्ठ॒ शव॑सा । अ॒स्माँ अ॑व मघव॒न्गोम॑ति व्र॒जे वज्रि॑ञ्चि॒त्राभि॑रू॒तिभि॑ः ॥६॥

A papratha mahina vrishnya vrishanvishva shavishtha shavasa, asmam ava maghavangomati vraje vajrinchitrabhirutibhih

न सी॒मदे॑व आप॒दिषं॑ दीर्घायो॒ मर्त्य॑ः । एत॑ग्वा चि॒द्य एत॑शा यु॒योज॑ते॒ हरी॒ इन्द्रो॑ यु॒योज॑ते ॥७॥

Na simadeva apadisham dirghayo martyah, etagva chidya etasha yuyojate hari indro yuyojate

तं वो॑ म॒हो म॒हाय्य॒मिन्द्रं॑ दा॒नाय॑ स॒क्षणि॑म् । यो गा॒धेषु॒ य आर॑णेषु॒ हव्यो॒ वाजे॒ष्वस्ति॒ हव्य॑ः ॥८॥

Tam vo maho mahayyamindram danaya sakshanim, yo gadheshu ya araneshu havyo vajeshvasti havyah

उदू॒ षु णो॑ वसो म॒हे मृ॒शस्व॑ शूर॒ राध॑से । उदू॒ षु म॒ह्यै म॑घवन्म॒घत्त॑य॒ उदि॑न्द्र॒ श्रव॑से म॒हे ॥९॥

Udu shu no vaso mahe mrishasva shura radhase, udu shu mahyai maghavanmaghattaya udindra shravase mahe

त्वं न॑ इन्द्र ऋत॒युस्त्वा॒निदो॒ नि तृ॑म्पसि । मध्ये॑ वसिष्व तुविनृम्णो॒र्वोर्नि दा॒सं शि॑श्नथो॒ हथै॑ः ॥१०॥

Tvam na indra ritayustvanido ni trimpasi, madhye vasishva tuvinrimnorvorni dasam shishnatho hathaih

अ॒न्यव्र॑त॒ममा॑नुष॒मय॑ज्वान॒मदे॑वयुम् । अव॒ स्वः सखा॑ दुधुवीत॒ पर्व॑तः सु॒घ्नाय॒ दस्युं॒ पर्व॑तः ॥११॥

Anyavratamamanushamayajvanamadevayum, ava svah sakha dudhuvita parvatah sughnaya dasyum parvatah

त्वं न॑ इन्द्रासां॒ हस्ते॑ शविष्ठ दा॒वने॑ । धा॒नानां॒ न सं गृ॑भायास्म॒युर्द्विः सं गृ॑भायास्म॒युः ॥१२॥

Tvam na indrasam haste shavishtha davane, dhananam na sam gribhayasmayurdvih sam gribhayasmayuh

सखा॑य॒ः क्रतु॑मिच्छत क॒था रा॑धाम श॒रस्य॑ । उप॑स्तुतिं भो॒जः सू॒रिर्यो अह्र॑यः ॥१३॥

Sakhayah kratumichchhata katha radhama sharasya, upastutim bhojah suriryo ahrayah

भूरि॑भिः समह॒ ऋषि॑भिर्ब॒र्हिष्म॑द्भिः स्तविष्यसे । यदि॒त्थमेक॑मेक॒मिच्छर॑ व॒त्सान्प॑रा॒दद॑ः ॥१४॥

Bhuribhih samaha rishibhirbarhishmadbhih stavishyase, yaditthamekamekamichchhara vatsanparadadah

क॒र्ण॒गृह्या॑ म॒घवा॑ शौरदे॒व्यो व॒त्सं न॑स्त्रि॒भ्य आन॑यत् । अ॒जां सू॒रिर्न धात॑वे ॥१५॥

Karnagrihya maghava shauradevyo vatsam nastribhya anayat, ajam surirna dhatave