Sukta 46

46.1

33 vashoshvyah, indrah; 21 -24 kanitah prithushravah; 25-28, 32 vayuh, gayatri, 1 padanichrit ; 5 kakup, 7 brihati, 8 anushtup, 9 satobrihati, 11-12 viparitottarah pragathah = ( brihati, viparita ), 13 dvipada jagati, 14 brihati pipilikamadhya, 15 kakumnyankushira, 16 virat, 17 jagati, 18 uparishtad brihati, 19 brihati, 20 vishamapada brihati ; 21, 24 panktih; 22 sanstarapanktih, 24 -28 ; pragathah = ( brihati, satobrihati ), 30 dvipada virat, 31 ushnik, 32 panktih

त्वाव॑तः पुरूवसो व॒यमि॑न्द्र प्रणेतः । स्मसि॑ स्थातर्हरीणाम् ॥१॥

Tvavatah puruvaso vayamindra pranetah, smasi sthatarharinam

46.2

त्वां हि स॒त्यम॑द्रिवो वि॒द्म दा॒तार॑मि॒षाम् । वि॒द्म दा॒तारं॑ रयी॒णाम् ॥२॥

Tvam hi satyamadrivo vidma dataramisham, vidma dataram rayinam

46.3

आ यस्य॑ ते महि॒मानं॒ शत॑मूते॒ शत॑क्रतो । गी॒र्भिर्गृ॒णन्ति॑ का॒रव॑ः ॥३॥

A yasya te mahimanam shatamute shatakrato, girbhirgrinanti karavah

46.4

सु॒नी॒थो घा॒ स मर्त्यो॒ यं म॒रुतो॒ यम॑र्य॒मा । मि॒त्रः पान्त्य॒द्रुह॑ः ॥४॥

Sunitho gha sa martyo yam maruto yamaryama, mitrah pantyadruhah

46.5

दधा॑नो॒ गोम॒दश्व॑वत्सु॒वीर्य॑मादि॒त्यजू॑त एधते । सदा॑ रा॒या पु॑रु॒स्पृहा॑ ॥५॥

Dadhano gomadashvavatsuviryamadityajuta edhate, sada raya puruspriha

46.6

तमिन्द्रं॒ दान॑मीमहे शवसा॒नमभी॑र्वम् । ईशा॑नं रा॒य ई॑महे ॥६॥

Tamindram danamimahe shavasanamabhirvam, ishanam raya imahe

46.7

तस्मि॒न्हि सन्त्यू॒तयो॒ विश्वा॒ अभी॑रव॒ः सचा॑ । तमा व॑हन्तु॒ सप्त॑यः पुरू॒वसुं॒ मदा॑य॒ हर॑यः सु॒तम् ॥७॥

Tasminhi santyutayo vishva abhiravah sacha, tama vahantu saptayah puruvasum madaya harayah sutam

46.8

यस्ते॒ मदो॒ वरे॑ण्यो॒ य इ॑न्द्र वृत्र॒हन्त॑मः । य आ॑द॒दिः स्व१र्नृभि॒र्यः पृत॑नासु दु॒ष्टर॑ः ॥८॥

Yaste mado varenyo ya indra vritrahantamah, ya adadih sva1rnribhiryah pritanasu dushtarah

46.9

यो दु॒ष्टरो॑ विश्ववार श्र॒वाय्यो॒ वाजे॒ष्वस्ति॑ तरु॒ता । स न॑ः शविष्ठ॒ सव॒ना व॑सो गहि ग॒मेम॒ गोम॑ति व्र॒जे ॥९॥

Yo dushtaro vishvavara shravayyo vajeshvasti taruta, sa nah shavishtha savana vaso gahi gamema gomati vraje

46.10

ग॒व्यो षु णो॒ यथा॑ पु॒राऽश्व॒योत र॑थ॒या । व॒रि॒व॒स्य म॑हामह ॥१०॥

Gavyo shu no yatha purashvayota rathaya, varivasya mahamaha

46.11

न॒हि ते॑ शूर॒ राध॒सोऽन्तं॑ वि॒न्दामि॑ स॒त्रा । द॒श॒स्या नो॑ मघव॒न्नू चि॑दद्रिवो॒ धियो॒ वाजे॑भिराविथ ॥११॥

Nahi te shura radhasontam vindami satra, dashasya no maghavannu chidadrivo dhiyo vajebhiravitha

46.12

य ऋ॒ष्वः श्रा॑व॒यत्स॑खा॒ विश्वेत्स वे॑द॒ जनि॑मा पुरुष्टु॒तः । तं विश्वे॒ मानु॑षा यु॒गेन्द्रं॑ हवन्ते तवि॒षं य॒तस्रु॑चः ॥१२॥

Ya rishvah shravayatsakha vishvetsa veda janima purushtutah, tam vishve manusha yugendram havante tavisham yatasruchah

46.13

स नो॒ वाजे॑ष्ववि॒ता पु॑रू॒वसु॑ः पुरस्था॒ता म॒घवा॑ वृत्र॒हा भु॑वत् ॥१३॥

Sa no vajeshvavita puruvasuh purasthata maghava vritraha bhuvat

46.14

अ॒भि वो॑ वी॒रमन्ध॑सो॒ मदे॑षु गाय गि॒रा म॒हा विचे॑तसम् । इन्द्रं॒ नाम॒ श्रुत्यं॑ शा॒किनं॒ वचो॒ यथा॑ ॥१४॥

Abhi vo viramandhaso madeshu gaya gira maha vichetasam, indram nama shrutyam shakinam vacho yatha

46.15

द॒दी रेक्ण॑स्त॒न्वे॑ द॒दिर्वसु॑ द॒दिर्वाजे॑षु पुरुहूत वा॒जिन॑म् । नू॒नमथ॑ ॥१५॥

Dadi reknastanve dadirvasu dadirvajeshu puruhuta vajinam, nunamatha

46.16

विश्वे॑षामिर॒ज्यन्तं॒ वसू॑नां सास॒ह्वांसं॑ चिद॒स्य वर्प॑सः । कृ॒प॒य॒तो नू॒नमत्यथ॑ ॥१६॥

Vishveshamirajyantam vasunam sasahvansam chidasya varpasah, kripayato nunamatyatha

46.17

म॒हः सु वो॒ अर॑मिषे॒ स्तवा॑महे मी॒ळ्हुषे॑ अरंग॒माय॒ जग्म॑ये ।
य॒ज्ञेभि॑र्गी॒र्भिर्वि॒श्वम॑नुषां म॒रुता॑मियक्षसि॒ गाये॑ त्वा॒ नम॑सा गि॒रा ॥१७॥

Mahah su vo aramishe stavamahe milhushe arangamaya jagmaye
Yagyebhirgirbhirvishvamanusham marutamiyakshasi gaye tva namasa gira

46.18

ये पा॒तय॑न्ते॒ अज्म॑भिर्गिरी॒णां स्नुभि॑रेषाम् । य॒ज्ञं म॑हि॒ष्वणी॑नां सु॒म्नं तु॑वि॒ष्वणी॑नां॒ प्राध्व॒रे ॥१८॥

Ye patayante ajmabhirgirinam snubhiresham, yagyam mahishvaninam sumnam tuvishvaninam pradhvare

46.19

प्र॒भ॒ङ्गं दु॑र्मती॒नामिन्द्र॑ शवि॒ष्ठा भ॑र । र॒यिम॒स्मभ्यं॒ युज्यं॑ चोदयन्मते॒ ज्येष्ठं॑ चोदयन्मते ॥१९॥

Prabhangam durmatinamindra shavishtha bhara, rayimasmabhyam yujyam chodayanmate jyeshtham chodayanmate

46.20

सनि॑त॒ः सुस॑नित॒रुग्र॒ चित्र॒ चेति॑ष्ठ॒ सूनृ॑त । प्रा॒सहा॑ सम्रा॒ट् सहु॑रिं॒ सह॑न्तं भु॒ज्युं वाजे॑षु॒ पूर्व्य॑म् ॥२०॥

Sanitah susanitarugra chitra chetishtha sunrita, prasaha samrat sahurim sahantam bhujyum vajeshu purvyam

46.21

आ स ए॑तु॒ य ईव॒दाँ अदे॑वः पू॒र्तमा॑द॒दे । यथा॑ चि॒द्वशो॑ अ॒श्व्यः पृ॑थु॒श्रव॑सि कानी॒ते॒३ऽस्या व्युष्या॑द॒दे ॥२१॥

A sa etu ya ivadam adevah purtamadade, yatha chidvasho ashvyah prithushravasi kanite3sya vyushyadade

46.22

ष॒ष्टिं स॒हस्राश्व्य॑स्या॒युता॑सन॒मुष्ट्रा॑नां विंश॒तिं श॒ता ।
दश॒ श्यावी॑नां श॒ता दश॒ त्र्य॑रुषीणां॒ दश॒ गवां॑ स॒हस्रा॑ ॥२२॥

Shashtim sahasrashvyasyayutasanamushtranam vinshatim shata
Dasha shyavinam shata dasha tryarushinam dasha gavam sahasra

46.23

दश॑ श्या॒वा ऋ॒धद्र॑यो वी॒तवा॑रास आ॒शव॑ः । म॒थ्रा ने॒मिं नि वा॑वृतुः ॥२३॥

Dasha shyava ridhadrayo vitavarasa ashavah, mathra nemim ni vavrituh

46.24

दाना॑सः पृथु॒श्रव॑सः कानी॒तस्य॑ सु॒राध॑सः । रथं॑ हिर॒ण्ययं॒ दद॒न्मंहि॑ष्ठः सू॒रिर॑भू॒द्वर्षि॑ष्ठमकृत॒ श्रव॑ः ॥२४॥

Danasah prithushravasah kanitasya suradhasah, ratham hiranyayam dadanmanhishthah surirabhudvarshishthamakrita shravah

46.25

आ नो॑ वायो म॒हे तने॑ या॒हि म॒खाय॒ पाज॑से । व॒यं हि ते॑ चकृ॒मा भूरि॑ दा॒वने॑ स॒द्यश्चि॒न्महि॑ दा॒वने॑ ॥२५॥

A no vayo mahe tane yahi makhaya pajase, vayam hi te chakrima bhuri davane sadyashchinmahi davane

46.26

यो अश्वे॑भि॒र्वह॑ते॒ वस्त॑ उ॒स्रास्त्रिः स॒प्त स॑प्तती॒नाम् ।
ए॒भिः सोमे॑भिः सोम॒सुद्भि॑ः सोमपा दा॒नाय॑ शुक्रपूतपाः ॥२६॥

Yo ashvebhirvahate vasta usrastrih sapta saptatinam
Ebhih somebhih somasudbhih somapa danaya shukraputapah

46.27

यो म॑ इ॒मं चि॑दु॒ त्मनाम॑न्दच्चि॒त्रं दा॒वने॑ । अ॒र॒ट्वे अक्षे॒ नहु॑षे सु॒कृत्व॑नि सु॒कृत्त॑राय सु॒क्रतु॑ः ॥२७॥

Yo ma imam chidu tmanamandachchitram davane, aratve akshe nahushe sukritvani sukrittaraya sukratuh

46.28

उ॒च॒थ्ये॒३ वपु॑षि॒ यः स्व॒राळु॒त वा॑यो घृत॒स्नाः । अश्वे॑षितं॒ रजे॑षितं॒ शुने॑षितं॒ प्राज्म॒ तदि॒दं नु तत् ॥२८॥

Uchathye3 vapushi yah svaraluta vayo ghritasnah, ashveshitam rajeshitam shuneshitam prajma tadidam nu tat

46.29

अध॑ प्रि॒यमि॑षि॒राय॑ ष॒ष्टिं स॒हस्रा॑सनम् । अश्वा॑ना॒मिन्न वृष्णा॑म् ॥२९॥

Adha priyamishiraya shashtim sahasrasanam, ashvanaminna vrishnam

46.30

गावो॒ न यू॒थमुप॑ यन्ति॒ वध्र॑य॒ उप॒ मा य॑न्ति॒ वध्र॑यः ॥३०॥

Gavo na yuthamupa yanti vadhraya upa ma yanti vadhrayah

46.31

अध॒ यच्चार॑थे ग॒णे श॒तमुष्ट्राँ॒ अचि॑क्रदत् । अध॒ श्वित्ने॑षु विंश॒तिं श॒ता ॥३१॥

Adha yachcharathe gane shatamushtram achikradat, adha shvitneshu vinshatim shata

46.32

श॒तं दा॒से ब॑ल्बू॒थे विप्र॒स्तरु॑क्ष॒ आ द॑दे । ते ते॑ वायवि॒मे जना॒ मद॒न्तीन्द्र॑गोपा॒ मद॑न्ति दे॒वगो॑पाः ॥३२॥

Shatam dase balbuthe viprastaruksha a dade, te te vayavime jana madantindragopa madanti devagopah

46.33

अध॒ स्या योष॑णा म॒ही प्र॑ती॒ची वश॑म॒श्व्यम् । अधि॑रुक्मा॒ वि नी॑यते ॥३३॥

Adha sya yoshana mahi pratichi vashamashvyam, adhirukma vi niyate