Sukta 41

41.1

10 nabhakah kanvah, varuna :, mahapanktih

अ॒स्मा ऊ॒ षु प्रभू॑तये॒ वरु॑णाय म॒रुद्भ्योऽर्चा॑ वि॒दुष्ट॑रेभ्यः ।
यो धी॒ता मानु॑षाणां प॒श्वो गा इ॑व॒ रक्ष॑ति॒ नभ॑न्तामन्य॒के स॑मे ॥१॥

Asma u shu prabhutaye varunaya marudbhyorcha vidushtarebhyah
Yo dhita manushanam pashvo ga iva rakshati nabhantamanyake same

तमू॒ षु स॑म॒ना गि॒रा पि॑तॄ॒णां च॒ मन्म॑भिः ।
ना॒भा॒कस्य॒ प्रश॑स्तिभि॒र्यः सिन्धू॑ना॒मुपो॑द॒ये स॒प्तस्व॑सा॒ स म॑ध्य॒मो नभ॑न्तामन्य॒के स॑मे ॥२॥

Tamu shu samana gira pitrinam cha manmabhih
Nabhakasya prashastibhiryah sindhunamupodaye saptasvasa sa madhyamo nabhantamanyake same

स क्षप॒ः परि॑ षस्वजे॒ न्यु१स्रो मा॒यया॑ दधे॒ स विश्वं॒ परि॑ दर्श॒तः ।
तस्य॒ वेनी॒रनु॑ व्र॒तमु॒षस्ति॒स्रो अ॑वर्धय॒न्नभ॑न्तामन्य॒के स॑मे ॥३॥

Sa kshapah pari shasvaje nyu1sro mayaya dadhe sa vishvam pari darshatah
Tasya veniranu vratamushastisro avardhayannabhantamanyake same

यः क॒कुभो॑ निधार॒यः पृ॑थि॒व्यामधि॑ दर्श॒तः ।
स माता॑ पू॒र्व्यं प॒दं तद्वरु॑णस्य॒ सप्त्यं॒ स हि गो॒पा इ॒वेर्यो॒ नभ॑न्तामन्य॒के स॑मे ॥४॥

Yah kakubho nidharayah prithivyamadhi darshatah
Sa mata purvyam padam tadvarunasya saptyam sa hi gopa iveryo nabhantamanyake same

यो ध॒र्ता भुव॑नानां॒ य उ॒स्राणा॑मपी॒च्या॒३ वेद॒ नामा॑नि॒ गुह्या॑ ।
स क॒विः काव्या॑ पु॒रु रू॒पं द्यौरि॑व पुष्यति॒ नभ॑न्तामन्य॒के स॑मे ॥५॥

Yo dharta bhuvananam ya usranamapichya3 veda namani guhya
Sa kavih kavya puru rupam dyauriva pushyati nabhantamanyake same

यस्मि॒न्विश्वा॑नि॒ काव्या॑ च॒क्रे नाभि॑रिव श्रि॒ता ।
त्रि॒तं जू॒ती स॑पर्यत व्र॒जे गावो॒ न सं॒युजे॑ यु॒जे अश्वाँ॑ अयुक्षत॒ नभ॑न्तामन्य॒के स॑मे ॥६॥

Yasminvishvani kavya chakre nabhiriva shrita
Tritam juti saparyata vraje gavo na sanyuje yuje ashvam ayukshata nabhantamanyake same

य आ॒स्वत्क॑ आ॒शये॒ विश्वा॑ जा॒तान्ये॑षाम् ।
परि॒ धामा॑नि॒ मर्मृ॑श॒द्वरु॑णस्य पु॒रो गये॒ विश्वे॑ दे॒वा अनु॑ व्र॒तं नभ॑न्तामन्य॒के स॑मे ॥७॥

Ya asvatka ashaye vishva jatanyesham
Pari dhamani marmrishadvarunasya puro gaye vishve deva anu vratam nabhantamanyake same

स स॑मु॒द्रो अ॑पी॒च्य॑स्तु॒रो द्यामि॑व रोहति॒ नि यदा॑सु॒ यजु॑र्द॒धे ।
स मा॒या अ॒र्चिना॑ प॒दाऽस्तृ॑णा॒न्नाक॒मारु॑ह॒न्नभ॑न्तामन्य॒के स॑मे ॥८॥

Sa samudro apichyasturo dyamiva rohati ni yadasu yajurdadhe
Sa maya archina padastrinannakamaruhannabhantamanyake same

यस्य॑ श्वे॒ता वि॑चक्ष॒णा ति॒स्रो भूमी॑रधिक्षि॒तः ।
त्रिरुत्त॑राणि प॒प्रतु॒र्वरु॑णस्य ध्रु॒वं सद॒ः स स॑प्ता॒नामि॑रज्यति॒ नभ॑न्तामन्य॒के स॑मे ॥९॥

Yasya shveta vichakshana tisro bhumiradhikshitah
Triruttarani papraturvarunasya dhruvam sadah sa saptanamirajyati nabhantamanyake same

यः श्वे॒ताँ अधि॑निर्णिजश्च॒क्रे कृ॒ष्णाँ अनु॑ व्र॒ता ।
स धाम॑ पू॒र्व्यं म॑मे॒ यः स्क॒म्भेन॒ वि रोद॑सी अ॒जो न द्यामधा॑रय॒न्नभ॑न्तामन्य॒के स॑मे ॥१०॥

Yah shvetam adhinirnijashchakre krishnam anu vrata
Sa dhama purvyam mame yah skambhena vi rodasi ajo na dyamadharayannabhantamanyake same