Sukta 100

100.1

(12) 1-3, 6-12 nemo bhargavah, 4-5 indrah, indrah, 8 suparnah, 9 vajro va, 10-11 vak, trishtup, 6 jagati, 7-9 anushtup

अ॒यं त॑ एमि त॒न्वा॑ पु॒रस्ता॒द्विश्वे॑ दे॒वा अ॒भि मा॑ यन्ति प॒श्चात् ।
य॒दा मह्यं॒ दीध॑रो भा॒गमि॒न्द्राऽऽदिन्मया॑ कृणवो वी॒र्या॑णि ॥१॥

Ayam ta emi tanva purastadvishve deva abhi ma yanti pashchat
Yada mahyam didharo bhagamindradinmaya krinavo viryani

100.2

दधा॑मि ते॒ मधु॑नो भ॒क्षमग्रे॑ हि॒तस्ते॑ भा॒गः सु॒तो अ॑स्तु॒ सोम॑ः ।
अस॑श्च॒ त्वं द॑क्षिण॒तः सखा॒ मेऽधा॑ वृ॒त्राणि॑ जङ्घनाव॒ भूरि॑ ॥२॥

Dadhami te madhuno bhakshamagre hitaste bhagah suto astu somah
Asashcha tvam dakshinatah sakha medha vritrani janghanava bhuri

100.3

प्र सु स्तोमं॑ भरत वाज॒यन्त॒ इन्द्रा॑य स॒त्यं यदि॑ स॒त्यमस्ति॑ ।
नेन्द्रो॑ अ॒स्तीति॒ नेम॑ उ त्व आह॒ क ईं॑ ददर्श॒ कम॒भि ष्ट॑वाम ॥३॥

Pra su stomam bharata vajayanta indraya satyam yadi satyamasti
Nendro astiti nema u tva aha ka im dadarsha kamabhi shtavama

100.4

अ॒यम॑स्मि जरित॒ः पश्य॑ मे॒ह विश्वा॑ जा॒तान्य॒भ्य॑स्मि म॒ह्ना ।
ऋ॒तस्य॑ मा प्र॒दिशो॑ वर्धयन्त्यादर्दि॒रो भुव॑ना दर्दरीमि ॥४॥

Ayamasmi jaritah pashya meha vishva jatanyabhyasmi mahna
Ritasya ma pradisho vardhayantyadardiro bhuvana dardarimi

100.5

आ यन्मा॑ वे॒ना अरु॑हन्नृ॒तस्यँ॒ एक॒मासी॑नं हर्य॒तस्य॑ पृ॒ष्ठे ।
मन॑श्चिन्मे हृ॒द आ प्रत्य॑वोच॒दचि॑क्रद॒ञ्छिशु॑मन्त॒ः सखा॑यः ॥५॥

A yanma vena aruhannritasyam ekamasinam haryatasya prishthe
Manashchinme hrida a pratyavochadachikradanchhishumantah sakhayah

100.6

विश्वेत्ता ते॒ सव॑नेषु प्र॒वाच्या॒ या च॒कर्थ॑ मघवन्निन्द्र सुन्व॒ते ।
पारा॑वतं॒ यत्पु॑रुसम्भृ॒तं वस्व॒पावृ॑णोः शर॒भाय॒ ऋषि॑बन्धवे ॥६॥

Vishvetta te savaneshu pravachya ya chakartha maghavannindra sunvate
Paravatam yatpurusambhritam vasvapavrinoh sharabhaya rishibandhave

100.7

प्र नू॒नं धा॑वता॒ पृथ॒ङ्नेह यो वो॒ अवा॑वरीत् । नि षीं॑ वृ॒त्रस्य॒ मर्म॑णि॒ वज्र॒मिन्द्रो॑ अपीपतत् ॥७॥

Pra nunam dhavata prithanneha yo vo avavarit, ni shim vritrasya marmani vajramindro apipatat

100.8

मनो॑जवा॒ अय॑मान आय॒सीम॑तर॒त्पुर॑म् । दिवं॑ सुप॒र्णो ग॒त्वाय॒ सोमं॑ व॒ज्रिण॒ आभ॑रत् ॥८॥

Manojava ayamana ayasimataratpuram, divam suparno gatvaya somam vajrina abharat

100.9

स॒मु॒द्रे अ॒न्तः श॑यत उ॒द्ना वज्रो॑ अ॒भीवृ॑तः । भर॑न्त्यस्मै सं॒यत॑ः पु॒रःप्र॑स्रवणा ब॒लिम् ॥९॥

Samudre antah shayata udna vajro abhivritah, bharantyasmai sanyatah purahprasravana balim

100.10

यद्वाग्वद॑न्त्यविचेत॒नानि॒ राष्ट्री॑ दे॒वानां॑ निष॒साद॑ म॒न्द्रा ।
चत॑स्र॒ ऊर्जं॑ दुदुहे॒ पयां॑सि॒ क्व॑ स्विदस्याः पर॒मं ज॑गाम ॥१०॥

Yadvagvadantyavichetanani rashtri devanam nishasada mandra
Chatasra urjam duduhe payansi kva svidasyah paramam jagama

100.11

दे॒वीं वाच॑मजनयन्त दे॒वास्तां वि॒श्वरू॑पाः प॒शवो॑ वदन्ति ।
सा नो॑ म॒न्द्रेष॒मूर्जं॒ दुहा॑ना धे॒नुर्वाग॒स्मानुप॒ सुष्टु॒तैतु॑ ॥११॥

Devim vachamajanayanta devastam vishvarupah pashavo vadanti
Sa no mandreshamurjam duhana dhenurvagasmanupa sushtutaitu

100.12

सखे॑ विष्णो वित॒रं वि क्र॑मस्व॒ द्यौर्दे॒हि लो॒कं वज्रा॑य वि॒ष्कभे॑ ।
हना॑व वृ॒त्रं रि॒णचा॑व॒ सिन्धू॒निन्द्र॑स्य यन्तु प्रस॒वे विसृ॑ष्टाः ॥१२॥

Sakhe vishno vitaram vi kramasva dyaurdehi lokam vajraya vishkabhe
Hanava vritram rinachava sindhunindrasya yantu prasave visrishtah