Sukta 7

7.1

7 barhaspatyo bharadvajah, vaishvanarosgni :, trishtup, 6 – 7 jagati

मू॒र्धानं॑ दि॒वो अ॑र॒तिं पृ॑थि॒व्या वै॑श्वान॒रमृ॒त आ जा॒तम॒ग्निम् ।
क॒विं स॒म्राज॒मति॑थिं॒ जना॑नामा॒सन्ना पात्रं॑ जनयन्त दे॒वाः ॥१॥

Murdhanam divo aratim prithivya vaishvanaramrita a jatamagnim
Kavim samrajamatithim jananamasanna patram janayanta devah

नाभिं॑ य॒ज्ञानां॒ सद॑नं रयी॒णां म॒हामा॑हा॒वम॒भि सं न॑वन्त ।
वै॒श्वा॒न॒रं र॒थ्य॑मध्व॒राणां॑ य॒ज्ञस्य॑ के॒तुं ज॑नयन्त दे॒वाः ॥२॥

Nabhim yagyanam sadanam rayinam mahamahavamabhi sam navanta
Vaishvanaram rathyamadhvaranam yagyasya ketum janayanta devah

त्वद् विप्रो॑ जायते वा॒ज्य॑ग्ने॒ त्वद् वी॒रासो॑ अभिमाति॒षाह॑ः ।
वैश्वा॑नर॒ त्वम॒स्मासु॑ धेहि॒ वसू॑नि राजन् त्स्पृह॒याय्या॑णि ॥३॥

Tvad vipro jayate vajyagne tvad viraso abhimatishahah
Vaishvanara tvamasmasu dhehi vasuni rajan tsprihayayyani

त्वां विश्वे॑ अमृत॒ जाय॑मानं॒ शिशुं॒ न दे॒वा अ॒भि सं न॑वन्ते ।
तव॒ क्रतु॑भिरमृत॒त्वमा॑य॒न् वैश्वा॑नर॒ यत् पि॒त्रोरदी॑देः ॥४॥

Tvam vishve amrita jayamanam shishum na deva abhi sam navante
Tava kratubhiramritatvamayan vaishvanara yat pitroradideh

वैश्वा॑नर॒ तव॒ तानि॑ व्र॒तानि॑ म॒हान्य॑ग्ने॒ नकि॒रा द॑धर्ष ।
यज्जाय॑मानः पि॒त्रोरु॒पस्थे ऽवि॑न्दः के॒तुं व॒युने॒ष्वह्ना॑म् ॥५॥

Vaishvanara tava tani vratani mahanyagne nakira dadharsha
Yajjayamanah pitrorupasthe vindah ketum vayuneshvahnam

वै॒श्वा॒न॒रस्य॒ विमि॑तानि॒ चक्ष॑सा॒ सानू॑नि दि॒वो अ॒मृत॑स्य के॒तुना॑ ।
तस्येदु॒ विश्वा॒ भुव॒नाधि॑ मू॒र्धनि॑ व॒या इ॑व रुरुहुः स॒प्त वि॒स्रुह॑ः ॥६॥

Vaishvanarasya vimitani chakshasa sanuni divo amritasya ketuna
Tasyedu vishva bhuvanadhi murdhani vaya iva ruruhuh sapta visruhah

वि यो रजां॒स्यमि॑मीत सु॒क्रतु॑र्वैश्वान॒रो वि दि॒वो रो॑च॒ना क॒विः ।
परि॒ यो विश्वा॒ भुव॑नानि पप्र॒थे ऽद॑ब्धो गो॒पा अ॒मृत॑स्य रक्षि॒ता ॥७॥

Vi yo rajansyamimita sukraturvaishvanaro vi divo rochana kavih
Pari yo vishva bhuvanani paprathe dabdho gopa amritasya rakshita