Sukta 67

67.1

11 barhaspatyo bharadvajah, mitravarunau, trishtup

विश्वे॑षां वः स॒तां ज्येष्ठ॑तमा गी॒र्भिर्मि॒त्रावरु॑णा वावृ॒धध्यै॑ ।
सं या र॒श्मेव॑ य॒मतु॒र्यमि॑ष्ठा॒ द्वा जनाँ॒ अस॑मा बा॒हुभि॒ः स्वैः ॥१॥

Vishvesham vah satam jyeshthatama girbhirmitravaruna vavridhadhyai
Sam ya rashmeva yamaturyamishtha dva janam asama bahubhih svaih

67.2

इ॒यं मद्वां॒ प्र स्तृ॑णीते मनी॒षोप॑ प्रि॒या नम॑सा ब॒र्हिरच्छ॑ ।
य॒न्तं नो॑ मित्रावरुणा॒वधृ॑ष्टं छ॒र्दिर्यद्वां॑ वरू॒थ्यं॑ सुदानू ॥२॥

Iyam madvam pra strinite manishopa priya namasa barhirachchha
Yantam no mitravarunavadhrishtam chhardiryadvam varuthyam sudanu

67.3

आ या॑तं मित्रावरुणा सुश॒स्त्युप॑ प्रि॒या नम॑सा हू॒यमा॑ना ।
सं याव॑प्न॒ःस्थो अ॒पसे॑व॒ जना॑ञ्छ्रुधीय॒तश्चि॑द्यतथो महि॒त्वा ॥३॥

A yatam mitravaruna sushastyupa priya namasa huyamana
Sam yavapnahstho apaseva jananchhrudhiyatashchidyatatho mahitva

67.4

अश्वा॒ न या वा॒जिना॑ पू॒तब॑न्धू ऋ॒ता यद्गर्भ॒मदि॑ति॒र्भर॑ध्यै ।
प्र या महि॑ म॒हान्ता॒ जाय॑माना घो॒रा मर्ता॑य रि॒पवे॒ नि दी॑धः ॥४॥

Ashva na ya vajina putabandhu rita yadgarbhamaditirbharadhyai
Pra ya mahi mahanta jayamana ghora martaya ripave ni didhah

67.5

विश्वे॒ यद्वां॑ मं॒हना॒ मन्द॑मानाः क्ष॒त्रं दे॒वासो॒ अद॑धुः स॒जोषा॑ः ।
परि॒ यद्भू॒थो रोद॑सी चिदु॒र्वी सन्ति॒ स्पशो॒ अद॑ब्धासो॒ अमू॑राः ॥५॥

Vishve yadvam manhana mandamanah kshatram devaso adadhuh sajoshah
Pari yadbhutho rodasi chidurvi santi spasho adabdhaso amurah

67.6

ता हि क्ष॒त्रं धा॒रये॑थे॒ अनु॒ द्यून्दृं॒हेथे॒ सानु॑मुप॒मादि॑व॒ द्योः ।
दृ॒ळ्हो नक्ष॑त्र उ॒त वि॒श्वदे॑वो॒ भूमि॒माता॒न्द्यां धा॒सिना॒योः ॥६॥

Ta hi kshatram dharayethe anu dyundrinhethe sanumupamadiva dyoh
Drilho nakshatra uta vishvadevo bhumimatandyam dhasinayoh

67.7

ता वि॒ग्रं धै॑थे ज॒ठरं॑ पृ॒णध्या॒ आ यत्सद्म॒ सभृ॑तयः पृ॒णन्ति॑ ।
न मृ॑ष्यन्ते युव॒तयोऽवा॑ता॒ वि यत्पयो॑ विश्वजिन्वा॒ भर॑न्ते ॥७॥

Ta vigram dhaithe jatharam prinadhya a yatsadma sabhritayah prinanti
Na mrishyante yuvatayovata vi yatpayo vishvajinva bharante

67.8

ता जि॒ह्वया॒ सद॒मेदं सु॑मे॒धा आ यद्वां॑ स॒त्यो अ॑र॒तिॠ॒ते भूत् ।
तद्वां॑ महि॒त्वं घृ॑तान्नावस्तु यु॒वं दा॒शुषे॒ वि च॑यिष्ट॒मंह॑ः ॥८॥

Ta jihvaya sadamedam sumedha a yadvam satyo aratirite bhut
Tadvam mahitvam ghritannavastu yuvam dashushe vi chayishtamanhah

67.9

प्र यद्वां॑ मित्रावरुणा स्पू॒र्धन्प्रि॒या धाम॑ यु॒वधि॑ता मि॒नन्ति॑ ।
न ये दे॒वास॒ ओह॑सा॒ न मर्ता॒ अय॑ज्ञसाचो॒ अप्यो॒ न पु॒त्राः ॥९॥

Pra yadvam mitravaruna spurdhanpriya dhama yuvadhita minanti
Na ye devasa ohasa na marta ayagyasacho apyo na putrah

67.10

वि यद्वाचं॑ की॒स्तासो॒ भर॑न्ते॒ शंस॑न्ति॒ के चि॑न्नि॒विदो॑ मना॒नाः ।
आद्वां॑ ब्रवाम स॒त्यान्यु॒क्था नकि॑र्दे॒वेभि॑र्यतथो महि॒त्वा ॥१०॥

Vi yadvacham kistaso bharante shansanti ke chinnivido mananah
Advam bravama satyanyuktha nakirdevebhiryatatho mahitva

67.11

अ॒वोरि॒त्था वां॑ छ॒र्दिषो॑ अ॒भिष्टौ॑ यु॒वोर्मि॑त्रावरुणा॒वस्कृ॑धोयु ।
अनु॒ यद्गाव॑ः स्फु॒रानृ॑जि॒प्यं धृ॒ष्णुं यद्रणे॒ वृष॑णं यु॒नज॑न् ॥११॥

Avorittha vam chhardisho abhishtau yuvormitravarunavaskridhoyu
Anu yadgavah sphuranrijipyam dhrishnum yadrane vrishanam yunajan