Sukta 63

63.1

11 barhaspatyo bharadvajah, ashvinau, trishtup, 1 virat, 11 ekapada trishtup

क्व१ त्या व॒ल्गू पु॑रुहू॒ताद्य दू॒तो न स्तोमो॑ऽविद॒न्नम॑स्वान् ।
आ यो अ॒र्वाङ्नास॑त्या व॒वर्त॒ प्रेष्ठा॒ ह्यस॑थो अस्य॒ मन्म॑न् ॥१॥

Kva1 tya valgu puruhutadya duto na stomovidannamasvan
A yo arvannasatya vavarta preshtha hyasatho asya manman

63.2

अरं॑ मे गन्तं॒ हव॑नाया॒स्मै गृ॑णा॒ना यथा॒ पिबा॑थो॒ अन्ध॑ः ।
परि॑ ह॒ त्यद्व॒र्तिर्या॑थो रि॒षो न यत्परो॒ नान्त॑रस्तुतु॒र्यात् ॥२॥

Aram me gantam havanayasmai grinana yatha pibatho andhah
Pari ha tyadvartiryatho risho na yatparo nantarastuturyat

63.3

अका॑रि वा॒मन्ध॑सो॒ वरी॑म॒न्नस्ता॑रि ब॒र्हिः सु॑प्राय॒णत॑मम् ।
उ॒त्ता॒नह॑स्तो युव॒युर्व॑व॒न्दा ऽऽवां॒ नक्ष॑न्तो॒ अद्र॑य आञ्जन् ॥३॥

Akari vamandhaso varimannastari barhih suprayanatamam
Uttanahasto yuvayurvavanda vam nakshanto adraya anjan

63.4

ऊ॒र्ध्वो वा॑म॒ग्निर॑ध्व॒रेष्व॑स्था॒त्प्र रा॒तिरे॑ति जू॒र्णिनी॑ घृ॒ताची॑ ।
प्र होता॑ गू॒र्तम॑ना उरा॒णोऽयु॑क्त॒ यो नास॑त्या॒ हवी॑मन् ॥४॥

Urdhvo vamagniradhvareshvasthatpra ratireti jurnini ghritachi
Pra hota gurtamana uranoyukta yo nasatya haviman

63.5

अधि॑ श्रि॒ये दु॑हि॒ता सूर्य॑स्य॒ रथं॑ तस्थौ पुरुभुजा श॒तोति॑म् ।
प्र मा॒याभि॑र्मायिना भूत॒मत्र॒ नरा॑ नृतू॒ जनि॑मन्य॒ज्ञिया॑नाम् ॥५॥

Adhi shriye duhita suryasya ratham tasthau purubhuja shatotim
Pra mayabhirmayina bhutamatra nara nritu janimanyagyiyanam

63.6

यु॒वं श्री॒भिर्द॑र्श॒ताभि॑रा॒भिः शु॒भे पु॒ष्टिमू॑हथुः सू॒र्याया॑ः ।
प्र वां॒ वयो॒ वपु॒षेऽनु॑ पप्त॒न्नक्ष॒द्वाणी॒ सुष्टु॑ता धिष्ण्या वाम् ॥६॥

Yuvam shribhirdarshatabhirabhih shubhe pushtimuhathuh suryayah
Pra vam vayo vapushenu paptannakshadvani sushtuta dhishnya vam

63.7

आ वां॒ वयोऽश्वा॑सो॒ वहि॑ष्ठा अ॒भि प्रयो॑ नासत्या वहन्तु ।
प्र वां॒ रथो॒ मनो॑जवा असर्जी॒षः पृ॒क्ष इ॒षिधो॒ अनु॑ पू॒र्वीः ॥७॥

A vam vayoshvaso vahishtha abhi prayo nasatya vahantu
Pra vam ratho manojava asarjishah priksha ishidho anu purvih

63.8

पु॒रु हि वां॑ पुरुभुजा दे॒ष्णं धे॒नुं न॒ इषं॑ पिन्वत॒मस॑क्राम् ।
स्तुत॑श्च वां माध्वी सुष्टु॒तिश्च॒ रसा॑श्च॒ ये वा॒मनु॑ रा॒तिमग्म॑न् ॥८॥

Puru hi vam purubhuja deshnam dhenum na isham pinvatamasakram
Stutashcha vam madhvi sushtutishcha rasashcha ye vamanu ratimagman

63.9

उ॒त म॑ ऋ॒ज्रे पुर॑यस्य र॒घ्वी सु॑मी॒ळ्हे श॒तं पे॑रु॒के च॑ प॒क्वा ।
शा॒ण्डो दा॑द्धिर॒णिन॒ः स्मद्दि॑ष्टी॒न्दश॑ व॒शासो॑ अभि॒षाच॑ ऋ॒ष्वान् ॥९॥

Uta ma rijre purayasya raghvi sumilhe shatam peruke cha pakva
Shando daddhiraninah smaddishtindasha vashaso abhishacha rishvan

63.10

सं वां॑ श॒ता ना॑सत्या स॒हस्राऽश्वा॑नां पुरु॒पन्था॑ गि॒रे दा॑त् ।
भ॒रद्वा॑जाय वीर॒ नू गि॒रे दा॑द्ध॒ता रक्षां॑सि पुरुदंससा स्युः ॥१०॥

Sam vam shata nasatya sahasrashvanam purupantha gire dat
Bharadvajaya vira nu gire daddhata rakshansi purudansasa syuh

63.11

आ वां॑ सु॒म्ने वरि॑मन्त्सू॒रिभि॑ः ष्याम् ॥११॥

A vam sumne varimantsuribhih shyam