Sukta 58

58.1

4 barhaspatyo bharadvajah, pusha, trishtup, 2 jagati

शु॒क्रं ते॑ अ॒न्यद्य॑ज॒तं ते॑ अ॒न्यद्विषु॑रूपे॒ अह॑नी॒ द्यौरि॑वासि ।
विश्वा॒ हि मा॒या अव॑सि स्वधावो भ॒द्रा ते॑ पूषन्नि॒ह रा॒तिर॑स्तु ॥१॥

Shukram te anyadyajatam te anyadvishurupe ahani dyaurivasi
Vishva hi maya avasi svadhavo bhadra te pushanniha ratirastu

अ॒जाश्व॑ः पशु॒पा वाज॑पस्त्यो धियंजि॒न्वो भुव॑ने॒ विश्वे॒ अर्पि॑तः ।
अष्ट्रां॑ पू॒षा शि॑थि॒रामु॒द्वरी॑वृजत्सं॒चक्षा॑णो॒ भुव॑ना दे॒व ई॑यते ॥२॥

Ajashvah pashupa vajapastyo dhiyanjinvo bhuvane vishve arpitah
Ashtram pusha shithiramudvarivrijatsanchakshano bhuvana deva iyate

यास्ते॑ पूष॒न्नावो॑ अ॒न्तः स॑मु॒द्रे हि॑र॒ण्ययी॑र॒न्तरि॑क्षे॒ चर॑न्ति ।
ताभि॑र्यासि दू॒त्यां सूर्य॑स्य॒ कामे॑न कृत॒ श्रव॑ इ॒च्छमा॑नः ॥३॥

Yaste pushannavo antah samudre hiranyayirantarikshe charanti
Tabhiryasi dutyam suryasya kamena krita shrava ichchhamanah

पू॒षा सु॒बन्धु॑र्दि॒व आ पृ॑थि॒व्या इ॒ळस्पति॑र्म॒घवा॑ द॒स्मव॑र्चाः ।
यं दे॒वासो॒ अद॑दुः सू॒र्यायै॒ कामे॑न कृ॒तं त॒वसं॒ स्वञ्च॑म् ॥४॥

Pusha subandhurdiva a prithivya ilaspatirmaghava dasmavarchah
Yam devaso adaduh suryayai kamena kritam tavasam svancham