Sukta 5

5.1

7 barhaspatyo bharadvajah, agni :, trishtup

हु॒वे व॑ः सू॒नुं सह॑सो॒ युवा॑न॒मद्रो॑घवाचं म॒तिभि॒र्यवि॑ष्ठम् ।
य इन्व॑ति॒ द्रवि॑णानि॒ प्रचे॑ता वि॒श्ववा॑राणि पुरु॒वारो॑ अ॒ध्रुक् ॥१॥

Huve vah sunum sahaso yuvanamadroghavacham matibhiryavishtham
Ya invati dravinani pracheta vishvavarani puruvaro adhruk

त्वे वसू॑नि पुर्वणीक होतर्दो॒षा वस्तो॒रेरि॑रे य॒ज्ञिया॑सः ।
क्षामे॑व॒ विश्वा॒ भुव॑नानि॒ यस्मि॒न् त्सं सौभ॑गानि दधि॒रे पा॑व॒के ॥२॥

Tve vasuni purvanika hotardosha vastorerire yagyiyasah
Kshameva vishva bhuvanani yasmin tsam saubhagani dadhire pavake

त्वं वि॒क्षु प्र॒दिव॑ः सीद आ॒सु क्रत्वा॑ र॒थीर॑भवो॒ वार्या॑णाम् ।
अत॑ इनोषि विध॒ते चि॑कित्वो॒ व्या॑नु॒षग्जा॑तवेदो॒ वसू॑नि ॥३॥

Tvam vikshu pradivah sida asu kratva rathirabhavo varyanam
Ata inoshi vidhate chikitvo vyanushagjatavedo vasuni

यो न॒ः सनु॑त्यो अभि॒दास॑दग्ने॒ यो अन्त॑रो मित्रमहो वनु॒ष्यात् ।
तम॒जरे॑भि॒र्वृष॑भि॒स्तव॒ स्वैस्तपा॑ तपिष्ठ॒ तप॑सा॒ तप॑स्वान् ॥४॥

Yo nah sanutyo abhidasadagne yo antaro mitramaho vanushyat
Tamajarebhirvrishabhistava svaistapa tapishtha tapasa tapasvan

यस्ते॑ य॒ज्ञेन॑ स॒मिधा॒ य उ॒क्थैर॒र्केभि॑ः सूनो सहसो॒ ददा॑शत् ।
स मर्त्ये॑ष्वमृत॒ प्रचे॑ता रा॒या द्यु॒म्नेन॒ श्रव॑सा॒ वि भा॑ति ॥५॥

Yaste yagyena samidha ya ukthairarkebhih suno sahaso dadashat
Sa martyeshvamrita pracheta raya dyumnena shravasa vi bhati

स तत् कृ॑धीषि॒तस्तूय॑मग्ने॒ स्पृधो॑ बाधस्व॒ सह॑सा॒ सह॑स्वान् ।
यच्छ॒स्यसे॒ द्युभि॑र॒क्तो वचो॑भि॒स्तज्जु॑षस्व जरि॒तुर्घोषि॒ मन्म॑ ॥६॥

Sa tat kridhishitastuyamagne spridho badhasva sahasa sahasvan
Yachchhasyase dyubhirakto vachobhistajjushasva jariturghoshi manma

अ॒श्याम॒ तं काम॑मग्ने॒ तवो॒ती अ॒श्याम॑ र॒यिं र॑यिवः सु॒वीर॑म् ।
अ॒श्याम॒ वाज॑म॒भि वा॒जय॑न्तो॒ ऽश्याम॑ द्यु॒म्नम॑जरा॒जरं॑ ते ॥७॥

Ashyama tam kamamagne tavoti ashyama rayim rayivah suviram
Ashyama vajamabhi vajayanto shyama dyumnamajarajaram te