Sukta 44

44.1

24 shanyurbarhaspatyah, indrah, trishtup, 1- 6 anushtup, 7- 9 [ 8 va ] virat

यो र॑यिवो र॒यिंत॑मो॒ यो द्यु॒म्नैर्द्यु॒म्नव॑त्तमः । सोम॑ः सु॒तः स इ॑न्द्र॒ तेऽस्ति॑ स्वधापते॒ मद॑ः ॥१॥

Yo rayivo rayintamo yo dyumnairdyumnavattamah, somah sutah sa indra testi svadhapate madah

44.2

यः श॒ग्मस्तु॑विशग्म ते रा॒यो दा॒मा म॑ती॒नाम् । सोम॑ः सु॒तः स इ॑न्द्र॒ तेऽस्ति॑ स्वधापते॒ मद॑ः ॥२॥

Yah shagmastuvishagma te rayo dama matinam, somah sutah sa indra testi svadhapate madah

44.3

येन॑ वृ॒द्धो न शव॑सा तु॒रो न स्वाभि॑रू॒तिभि॑ः । सोम॑ः सु॒तः स इ॑न्द्र॒ तेऽस्ति॑ स्वधापते॒ मद॑ः ॥३॥

Yena vriddho na shavasa turo na svabhirutibhih, somah sutah sa indra testi svadhapate madah

44.4

त्यमु॑ वो॒ अप्र॑हणं गृणी॒षे शव॑स॒स्पति॑म् । इन्द्रं॑ विश्वा॒साहं॒ नरं॒ मंहि॑ष्ठं वि॒श्वच॑र्षणिम् ॥४॥

Tyamu vo aprahanam grinishe shavasaspatim, indram vishvasaham naram manhishtham vishvacharshanim

44.5

यं व॒र्धय॒न्तीद्गिर॒ः पतिं॑ तु॒रस्य॒ राध॑सः । तमिन्न्व॑स्य॒ रोद॑सी दे॒वी शुष्मं॑ सपर्यतः ॥५॥

Yam vardhayantidgirah patim turasya radhasah, taminnvasya rodasi devi shushmam saparyatah

44.6

तद्व॑ उ॒क्थस्य॑ ब॒र्हणेन्द्रा॑योपस्तृणी॒षणि॑ । विपो॒ न यस्यो॒तयो॒ वि यद्रोह॑न्ति स॒क्षित॑ः ॥६॥

Tadva ukthasya barhanendrayopastrinishani, vipo na yasyotayo vi yadrohanti sakshitah

44.7

अवि॑द॒द्दक्षं॑ मि॒त्रो नवी॑यान्पपा॒नो दे॒वेभ्यो॒ वस्यो॑ अचैत् ।
स॒स॒वान्त्स्तौ॒लाभि॑र्धौ॒तरी॑भिरुरु॒ष्या पा॒युर॑भव॒त्सखि॑भ्यः ॥७॥

Avidaddaksham mitro naviyanpapano devebhyo vasyo achait
Sasavantstaulabhirdhautaribhirurushya payurabhavatsakhibhyah

44.8

ऋ॒तस्य॑ प॒थि वे॒धा अ॑पायि श्रि॒ये मनां॑सि दे॒वासो॑ अक्रन् ।
दधा॑नो॒ नाम॑ म॒हो वचो॑भि॒र्वपु॑र्दृ॒शये॑ वे॒न्यो व्या॑वः ॥८॥

Ritasya pathi vedha apayi shriye manansi devaso akran
Dadhano nama maho vachobhirvapurdrishaye venyo vyavah

44.9

द्यु॒मत्त॑मं॒ दक्षं॑ धेह्य॒स्मे सेधा॒ जना॑नां पू॒र्वीररा॑तीः ।
वर्षी॑यो॒ वय॑ः कृणुहि॒ शची॑भि॒र्धन॑स्य सा॒ताव॒स्माँ अ॑विड्ढि ॥९॥

Dyumattamam daksham dhehyasme sedha jananam purviraratih
Varshiyo vayah krinuhi shachibhirdhanasya satavasmam aviddhi

44.10

इन्द्र॒ तुभ्य॒मिन्म॑घवन्नभूम व॒यं दा॒त्रे ह॑रिवो॒ मा वि वे॑नः ।
नकि॑रा॒पिर्द॑दृशे मर्त्य॒त्रा किम॒ङ्ग र॑ध्र॒चोद॑नं त्वाहुः ॥१०॥

Indra tubhyaminmaghavannabhuma vayam datre harivo ma vi venah
Nakirapirdadrishe martyatra kimanga radhrachodanam tvahuh

44.11

मा जस्व॑ने वृषभ नो ररीथा॒ मा ते॑ रे॒वत॑ः स॒ख्ये रि॑षाम ।
पू॒र्वीष्ट॑ इन्द्र नि॒ष्षिधो॒ जने॑षु ज॒ह्यसु॑ष्वी॒न्प्र वृ॒हापृ॑णतः ॥११॥

Ma jasvane vrishabha no raritha ma te revatah sakhye rishama
Purvishta indra nishshidho janeshu jahyasushvinpra vrihaprinatah

44.12

उद॒भ्राणी॑व स्त॒नय॑न्निय॒र्तीन्द्रो॒ राधां॒स्यश्व्या॑नि॒ गव्या॑ ।
त्वम॑सि प्र॒दिव॑ः का॒रुधा॑या॒ मा त्वा॑दा॒मान॒ आ द॑भन्म॒घोन॑ः ॥१२॥

Udabhraniva stanayanniyartindro radhansyashvyani gavya
Tvamasi pradivah karudhaya ma tvadamana a dabhanmaghonah

44.13

अध्व॑र्यो वीर॒ प्र म॒हे सु॒ताना॒मिन्द्रा॑य भर॒ स ह्य॑स्य॒ राजा॑ ।
यः पू॒र्व्याभि॑रु॒त नूत॑नाभिर्गी॒र्भिर्वा॑वृ॒धे गृ॑ण॒तामृषी॑णाम् ॥१३॥

Adhvaryo vira pra mahe sutanamindraya bhara sa hyasya raja
Yah purvyabhiruta nutanabhirgirbhirvavridhe grinatamrishinam

44.14

अ॒स्य मदे॑ पु॒रु वर्पां॑सि वि॒द्वानिन्द्रो॑ वृ॒त्राण्य॑प्र॒ती ज॑घान ।
तमु॒ प्र हो॑षि॒ मधु॑मन्तमस्मै॒ सोमं॑ वी॒राय॑ शि॒प्रिणे॒ पिब॑ध्यै ॥१४॥

Asya made puru varpansi vidvanindro vritranyaprati jaghana
Tamu pra hoshi madhumantamasmai somam viraya shiprine pibadhyai

44.15

पाता॑ सु॒तमिन्द्रो॑ अस्तु॒ सोमं॒ हन्ता॑ वृ॒त्रं वज्रे॑ण मन्दसा॒नः ।
गन्ता॑ य॒ज्ञं प॑रा॒वत॑श्चि॒दच्छा॒ वसु॑र्धी॒नाम॑वि॒ता का॒रुधा॑याः ॥१५॥

Pata sutamindro astu somam hanta vritram vajrena mandasanah
Ganta yagyam paravatashchidachchha vasurdhinamavita karudhayah

44.16

इ॒दं त्यत्पात्र॑मिन्द्र॒पान॒मिन्द्र॑स्य प्रि॒यम॒मृत॑मपायि ।
मत्स॒द्यथा॑ सौमन॒साय॑ दे॒वं व्य१स्मद्द्वेषो॑ यु॒यव॒द्व्यंह॑ः ॥१६॥

Idam tyatpatramindrapanamindrasya priyamamritamapayi
Matsadyatha saumanasaya devam vya1smaddvesho yuyavadvyanhah

44.17

ए॒ना म॑न्दा॒नो ज॒हि शू॑र॒ शत्रू॑ञ्जा॒मिमजा॑मिं मघवन्न॒मित्रा॑न् ।
अ॒भि॒षे॒णाँ अ॒भ्या॒३देदि॑शाना॒न्परा॑च इन्द्र॒ प्र मृ॑णा ज॒ही च॑ ॥१७॥

Ena mandano jahi shura shatrunjamimajamim maghavannamitran
Abhishenam abhya3dedishananparacha indra pra mrina jahi cha

44.18

आ॒सु ष्मा॑ णो मघवन्निन्द्र पृ॒त्स्व१स्मभ्यं॒ महि॒ वरि॑वः सु॒गं क॑ः ।
अ॒पां तो॒कस्य॒ तन॑यस्य जे॒ष इन्द्र॑ सू॒रीन्कृ॑णु॒हि स्मा॑ नो अ॒र्धम् ॥१८॥

Asu shma no maghavannindra pritsva1smabhyam mahi varivah sugam kah
Apam tokasya tanayasya jesha indra surinkrinuhi sma no ardham

44.19

आ त्वा॒ हर॑यो॒ वृष॑णो युजा॒ना वृष॑रथासो॒ वृष॑रश्म॒योऽत्या॑ः ।
अ॒स्म॒त्राञ्चो॒ वृष॑णो वज्र॒वाहो॒ वृष्णे॒ मदा॑य सु॒युजो॑ वहन्तु ॥१९॥

A tva harayo vrishano yujana vrisharathaso vrisharashmayotyah
Asmatrancho vrishano vajravaho vrishne madaya suyujo vahantu

44.20

आ ते॑ वृष॒न्वृष॑णो॒ द्रोण॑मस्थुर्घृत॒प्रुषो॒ नोर्मयो॒ मद॑न्तः ।
इन्द्र॒ प्र तुभ्यं॒ वृष॑भिः सु॒तानां॒ वृष्णे॑ भरन्ति वृष॒भाय॒ सोम॑म् ॥२०॥

A te vrishanvrishano dronamasthurghritaprusho normayo madantah
Indra pra tubhyam vrishabhih sutanam vrishne bharanti vrishabhaya somam

44.21

वृषा॑सि दि॒वो वृ॑ष॒भः पृ॑थि॒व्या वृषा॒ सिन्धू॑नां वृष॒भः स्तिया॑नाम् ।
वृष्णे॑ त॒ इन्दु॑र्वृषभ पीपाय स्वा॒दू रसो॑ मधु॒पेयो॒ वरा॑य ॥२१॥

Vrishasi divo vrishabhah prithivya vrisha sindhunam vrishabhah stiyanam
Vrishne ta indurvrishabha pipaya svadu raso madhupeyo varaya

44.22

अ॒यं दे॒वः सह॑सा॒ जाय॑मान॒ इन्द्रे॑ण यु॒जा प॒णिम॑स्तभायत् ।
अ॒यं स्वस्य॑ पि॒तुरायु॑धा॒नीन्दु॑रमुष्णा॒दशि॑वस्य मा॒याः ॥२२॥

Ayam devah sahasa jayamana indrena yuja panimastabhayat
Ayam svasya piturayudhaninduramushnadashivasya mayah

44.23

अ॒यम॑कृणोदु॒षस॑ः सु॒पत्नी॑र॒यं सूर्ये॑ अदधा॒ज्ज्योति॑र॒न्तः ।
अ॒यं त्रि॒धातु॑ दि॒वि रो॑च॒नेष॒॑ त्रि॒तेषु॑ विन्दद॒मृतं॒ निगू॑ळ्हम् ॥२३॥

Ayamakrinodushasah supatnirayam surye adadhajjyotirantah
Ayam tridhatu divi rochanesha triteshu vindadamritam nigulham

44.24

अ॒यं द्यावा॑पृथि॒वी वि ष्क॑भायद॒यं रथ॑मयुनक्स॒प्तर॑श्मिम् ।
अ॒यं गोषु॒ शच्या॑ प॒क्वम॒न्तः सोमो॑ दाधार॒ दश॑यन्त्र॒मुत्स॑म् ॥२४॥

Ayam dyavaprithivi vi shkabhayadayam rathamayunaksaptarashmim
Ayam goshu shachya pakvamantah somo dadhara dashayantramutsam