Sukta 3

3.1

8 barhaspatyo bharadvajah, agni :, trishtup

अग्ने॒ स क्षे॑षदृत॒पा ऋ॑ते॒जा उ॒रु ज्योति॑र्नशते देव॒युष्टे॑ ।
यं त्वं मि॒त्रेण॒ वरु॑णः स॒जोषा॒ देव॒ पासि॒ त्यज॑सा॒ मर्त॒मंह॑ः ॥१॥

Agne sa ksheshadritapa riteja uru jyotirnashate devayushte
Yam tvam mitrena varunah sajosha deva pasi tyajasa martamanhah

ई॒जे य॒ज्ञेभि॑ः शश॒मे शमी॑भिॠ॒धद्वा॑राया॒ग्नये॑ ददाश ।
ए॒वा च॒न तं य॒शसा॒मजु॑ष्टि॒र्नांहो॒ मर्तं॑ नशते॒ न प्रदृ॑प्तिः ॥२॥

Ije yagyebhih shashame shamibhiridhadvarayagnaye dadasha
Eva chana tam yashasamajushtirnanho martam nashate na pradriptih

सूरो॒ न यस्य॑ दृश॒तिर॑रे॒पा भी॒मा यदेति॑ शुच॒तस्त॒ आ धीः ।
हेष॑स्वतः शु॒रुधो॒ नायम॒क्तोः कुत्रा॑ चिद् र॒ण्वो व॑स॒तिर्व॑ने॒जाः ॥३॥

Suro na yasya drishatirarepa bhima yadeti shuchatasta a dhih
Heshasvatah shurudho nayamaktoh kutra chid ranvo vasatirvanejah

ति॒ग्मं चि॒देम॒ महि॒ वर्पो॑ अस्य॒ भस॒दश्वो॒ न य॑मसा॒न आ॒सा ।
वि॒जेह॑मानः पर॒शुर्न जि॒ह्वां द्र॒विर्न द्रा॑वयति॒ दारु॒ धक्ष॑त् ॥४॥

Tigmam chidema mahi varpo asya bhasadashvo na yamasana asa
Vijehamanah parashurna jihvam dravirna dravayati daru dhakshat

स इदस्ते॑व॒ प्रति॑ धादसि॒ष्यञ्छिशी॑त॒ तेजोऽय॑सो॒ न धारा॑म् ।
चि॒त्रध्र॑जतिरर॒तिर्यो अ॒क्तोर्वेर्न द्रु॒षद्वा॑ रघु॒पत्म॑जंहाः ॥५॥

Sa idasteva prati dhadasishyanchhishita tejoyaso na dharam
Chitradhrajatiraratiryo aktorverna drushadva raghupatmajanhah

स ईं॑ रे॒भो न प्रति॑ वस्त उ॒स्राः शो॒चिषा॑ रारपीति मि॒त्रम॑हाः ।
नक्तं॒ य ई॑मरु॒षो यो दिवा॒ नॄनम॑र्त्यो अरु॒षो यो दिवा॒ नॄन् ॥६॥

Sa im rebho na prati vasta usrah shochisha rarapiti mitramahah
Naktam ya imarusho yo diva nrinamartyo arusho yo diva nrin

दि॒वो न यस्य॑ विध॒तो नवी॑नो॒द् वृषा॑ रु॒क्ष ओष॑धीषु नूनोत् ।
घृणा॒ न यो ध्रज॑सा॒ पत्म॑ना॒ यन्ना रोद॑सी॒ वसु॑ना॒ दं सु॒पत्नी॑ ॥७॥

Divo na yasya vidhato navinod vrisha ruksha oshadhishu nunot
Ghrina na yo dhrajasa patmana yanna rodasi vasuna dam supatni

धायो॑भिर्वा॒ यो युज्ये॑भिर॒र्कैर्वि॒द्युन्न द॑विद्यो॒त् स्वेभि॒ः शुष्मै॑ः ।
शर्धो॑ वा॒ यो म॒रुतां॑ त॒तक्ष॑ ऋ॒भुर्न त्वे॒षो र॑भसा॒नो अ॑द्यौत् ॥८॥

Dhayobhirva yo yujyebhirarkairvidyunna davidyot svebhih shushmaih
Shardho va yo marutam tataksha ribhurna tvesho rabhasano adyaut